1Marĩ masĩꞌi, marĩ ya upʉ wiꞌi weronojõ boadijarosaꞌa. Tojo waꞌacã, Õꞌacʉ̃ ʉꞌmʉse cja upʉ peꞌtitiatji upʉre oꞌogʉsami. Ti upʉ masã wééca upʉ nitisaꞌa.
2Diacjʉ̃ta niꞌi. Marĩ aꞌtiro upʉtirã uti, caributiꞌi. Maꞌma upʉ suꞌtiwetisĩꞌrĩsaꞌa.
3Marĩ maꞌma upʉre cʉorã, suꞌti marĩrã weronojõ nisome.
4Marĩ aꞌti upʉ meꞌrã caributiꞌi. Pũrõ piꞌetiꞌi. Marĩ ya upʉre wẽrĩato nigʉ̃ mejẽta weeꞌe. Marĩ maꞌma suꞌti sãñarõ weronojõ dʉcayuato nígʉ̃ tojo niꞌi. Maꞌma upʉ peꞌtitiatji upʉre cʉorãsaꞌa. Õꞌacʉ̃ meꞌrã catinuꞌcũcãꞌrãsaꞌa. Mejã upʉ boadijati upʉ boabajudutia waꞌarosaꞌa.
5Õꞌacʉ̃ta marĩrẽ aꞌtere apoyucʉ niwĩ. Cʉ̃ marĩrẽ weeatjere masĩmʉꞌtãdutigʉ Espíritu Santure oꞌóyumʉꞌtãcʉ niwĩ.
6Tere wãcũrã, wãcũtutuanuꞌcũꞌu. Masĩnoꞌo, marĩ aꞌti upʉ meꞌrã nírã, marĩ wiogʉ Õꞌacʉ̃ tiropʉ niweꞌe.
7Tojo weerã cʉ̃rẽ ĩꞌatimirã, Jesucristore ẽjõpeoꞌo. Cʉ̃rẽ sirutuꞌu. Beꞌropʉ waꞌatje quẽꞌrãrẽ añurõ masĩtimirã, “Õꞌacʉ̃ tiropʉ waꞌarãsaꞌa”, niꞌi.
8Marĩ, marĩ ye niatjere eꞌcatiyutojaꞌa. Tojo weerã marĩ “Marĩ wiogʉ meꞌrã niajã, wẽrĩse ʉamisaꞌa”, niꞌi.
9Tojo nimirã, marĩ catirã o wẽ́rĩ́ca beꞌro marĩ wiogʉ ʉaro diaꞌcʉ̃ weenuꞌcũsĩꞌrĩꞌi.
10Aꞌtiro niꞌi. Cristo cʉ̃ beseatji nʉmʉ nicã, marĩ nipeꞌtirãrẽ besegʉsami. Marĩ niꞌcãrẽrãrẽ marĩ weeꞌquenʉcʉ̃ queoro marĩ añurõ o ñaꞌarõ weeꞌquere wapayegʉsami.
11Marĩ wiogʉ Cristo marĩrẽ beseatjere wãcũꞌu. Tere wãcũrã, cʉ̃rẽ wiopesase meꞌrã ẽjõpeoꞌo. Masãrẽ “Aꞌtiro weeroʉaꞌa”, ni wereꞌe. Õꞌacʉ̃ ʉ̃sã weesere añurõ masĩmi. Mʉsã quẽꞌrãrẽ tojota masĩcã ʉaꞌa.
12Ʉ̃sã basu ʉ̃sã yere apaturi añurõ ucũnemorã weeweꞌe. Aꞌtiro peꞌe weeꞌe. Ʉ̃sãrẽ añurõ wãcũdutirã, eꞌcatiato nírã tojo weeꞌe. Tojo weerã mʉsã ãpẽrã buꞌicjase diaꞌcʉ̃ bajusere wãcũrãrẽ, ejeripõꞌrãpʉ cjase wãcũtirãrẽ añurõ yʉꞌtimasĩrãsaꞌa.
13Ãpẽrã ʉ̃sãrẽ “Maatirã weema”, nisama. Na tojo nimicã, ʉ̃sã Õꞌacʉ̃ ʉaro weerã weeꞌe. Apeterore “Queoro weema”, nisama. Tere wéérã, mʉsã ye cjasere weerã weeꞌe.
14Cristo marĩrẽ maꞌimi. Tojo weerã cʉ̃ ye quetire wereꞌe. Masĩnoꞌo, Cristo nipeꞌtirãrẽ wẽrĩ dʉcayucʉ niwĩ. Te meꞌrã masĩnoꞌo, nipeꞌtirã Cristo wẽrĩ dʉcayunoꞌrã wẽrĩꞌcãrã weronojõ tojapã.
15Cristo nipeꞌtirãrẽ wẽrĩbosacʉ niwĩ. Catinuꞌcũse cʉorã na ʉaro diaꞌcʉ̃ weeticãꞌto nígʉ̃ tojo weecʉ niwĩ. Cʉ̃ ʉaro peꞌere weedutigʉ wẽrĩ masãcʉ niwĩ.
16Tojo weerã ʉ̃sã ne ãpẽrãrẽ aꞌti ʉmʉcocjãrã weewʉaro weronojõ ĩꞌaweeweꞌe. Yʉꞌʉ todʉporopʉre Cristore tojo weemiwʉ̃. “Aꞌti diꞌtacjʉ̃ nimi”, ni wãcũmiwʉ̃. Niꞌcãrõacãrẽ tojo wãcũnoꞌña marĩꞌi majã.
17Marĩ Cristo yarã waꞌarã, apesuꞌtiro sãjãrã weeꞌe. Añuse diaꞌcʉ̃ dʉcayuꞌu. Todʉporopʉ noꞌo ʉaro weesetiꞌquere weenemoweꞌe majã.
18Õꞌacʉ̃ta marĩrẽ tojo weecʉ niwĩ. Marĩ Cristore ĩꞌatuꞌtirã nicãrã niwʉ̃. Cʉ̃ peꞌe cʉ̃ wẽrĩse meꞌrã marĩrẽ cʉ̃ meꞌrãcjãrã sãjãcã weecʉ niwĩ. Nipeꞌtirãrẽ tojo waꞌacã ʉagʉ, cʉ̃ ye quetire weredutigʉ marĩrẽ oꞌócʉ niwĩ.
19Aꞌtiro niꞌi. Õꞌacʉ̃ nipeꞌtirã aꞌti turicjãrãrẽ cʉ̃ meꞌrãcjãrã sãjãcã ʉami. Tojo weegʉ Cristore wẽrĩduticʉ niwĩ. Te meꞌrã masãrẽ cʉ̃ yarã sãjãcã weegʉ weemi. Jesucristo wẽrĩse meꞌrã narẽ buꞌiri marĩrã ĩꞌami. Tere ãpẽrã masĩcã ʉagʉ ʉ̃sãrẽ weredutiwĩ.
20Tojo weerã ʉ̃sã Cristo dʉcayurã niꞌi. Cʉ̃rẽ, cʉ̃ ye quetire werebosaꞌa. Ʉ̃sã werese meꞌrã Õꞌacʉ̃ mʉsãrẽ “Yʉꞌʉ meꞌrãcjãrã nima”, nisami. Tojo weerã mʉsãrẽ Cristo dutiro meꞌrã “Añurõ Õꞌacʉ̃ meꞌrã niato”, niꞌi.
21Cristo ne cãꞌrõacã ñaꞌarõ weeticʉ niwĩ. Õꞌacʉ̃ peꞌe marĩ ñaꞌarõ weese buꞌiri cʉ̃rẽ wẽrĩbosa dʉcayuduticʉ niwĩ. Cʉ̃rẽ ñaꞌagʉ̃rẽ weronojõ buꞌiri daꞌrecʉ niwĩ. Tojo weese meꞌrã Õꞌacʉ̃ marĩrẽ Cristo yarã waꞌacã weecʉ niwĩ. Tojo nicã cʉ̃ ʉaro cʉ̃ weronojõ añurõ nidutigʉ tojo weecʉ niwĩ.
