2 ፂምቶሳ 1

1

2

3

4

¹ዬሱስ ኪርስቶሳራ ኢሲፌቴꬃን ዲዛ ዴዖ ሂዶታ ቃላ ጊሽ ዮታና ማላ ፆሳ ሼኔን ዬሱስ ኪርስቶሳ ሃዋሬ ጊዲዳ ጳዉሎሳፔ፥

²ዶሴቲዳ ታ ና ፂምቶሳስ ኪያቴꬂ፥ ማሮቴꬂኔ ሳሮቴꬂ ፆሳ ኣዋፔ ጎዳ ዬሱስ ኪርስቶሳፔ ኔስ ጊዶ።

³ፓጬይ ባይንዳ ጋላሲኔ ቃማ ኔ ጊሽ ዎሳን ቆፊሳሼ ካሴ ኣዋቲ ኦꬂዳ ማላ ጌሻ ዎዝናራ ታ ጎይኒዛ ፆሳ ታ ጋላታይስ።

⁴ካሴ ኔ ኣፉንꬃ ቆፓ ኤካዳ ታ ኔና ቤያዳ ኡፋዬታና ላሞታይስ።

⁵ቆꬌፔ ቆሞን ጊዶንታ ኔ ኣማኖዛ ታ ቆፓይስ። ሄ ኣማኖይካ ኮይሮ ኔ ኣዬይ ኣይን ሎይዲኒኔ ቃሴካ ኔ ኣዬይን ኤዎንቄን ዴስ። ሃዒ ቃስ ኔ ቦላ ዲዛይሳካ ታ ኤራዲስ።

⁶ሄሳ ጊሽ ታኒ ታ ኩሼ ኔ ቦላ ዎꬂን ኔ ኤኪዳይሳ ኔ ቦላ ዲዛ ፆሳ ኢሞታ ኔ ዴንꬄꬃና ማላ ታ ኔና ቆፊሳይስ።

⁷ፆሲ ኑስ ኑኒ ኑ ሁዔ ሃራናስ ፆሳ ዎልቃ ኤራናሲኔ ሲቄታና ኣያና ኢሚዴስ ኣቲን ባቦ ኣያና ኢሚቤና።

⁸ሄሳ ጊሽ ጎዳ ጊሽ ማርካታናስ ዎይኮ ጎዳ ጊሽ ቃሼቲዳ ታናን ዬላቶፓ። ጊዶ ኣቲን ፆሳ ዎልቃራ ሚሺራቾ ቃላ ጊሽ ታናራ ሜቶ ኤካ።

⁹ኑ ኣይኮካ ኦꬂዳ ጊሽ ጊዶንታ ዲሺን ባ ቆፋ ማላኔ ባ ኪያቴꬃ ማላ ኑና ኣሺዳይኔ ኑና ኤራይስ ዱማሲዲ ኢዚ ፄይጊዴስ። ሄ ኢዛ ኪያቴꬃይ ሜርና ዎዴፔ ካሴ ዬሱስ ኪርስቶሳ ባጋራ ኑስ ኢሜቲዴስ።

¹⁰ሃዒ ቃስ ኢዚ ሃይቆ ዉርሲ ꬋይሲዲ ሚሺራቾ ቃላ ባጋራ ኑና ፖዖን ኬሲዳ ኑ ꬋሌ ዬሱስ ኪርስቶሳ ዩሳን ቆንጪዴስ።

¹¹ታካ ሃይሳ ሃ ሚሺራቾ ቃላ ዮቲዛዴ፥ ኪቴቲዳዴኔ ኣስታማሬ ጊዳዳ ሹሜታዲስ።

¹²ታኒ ሜቶ ቤዪዛይካ ሄሳ ጊሻሳ። ጊዲኮካ ታ ኦና ኣማኒዛኮኔ ታኒ ታ ኣማኒዛዴ ሻካ ኤሪዛ ጊሽ ኢዛን ዬላቲኬ። ታ ኢዛስ ኢሚዳ ሃዳራ ሄ ጋላሲያ ጋካናስ ኢዚ ናጋናስ ዳንዳዪዛይሳ ታ ሻካ ኤራዲስ።

¹³ኔ ታፔ ሲዪዳ ቲሚርቴዛ ዬሱስ ኪርስቶሳራ ኢሲፌቴꬃን ዲዛ ኣማኖኒኔ ሲቆን ሌሚሶ ሂስታዳ ኦይካ።

¹⁴ኔስ ኢሜቲዳ ሎዖ ሃዳራ ኑናን ዲዛ ፂሎ ኣያናን ናጋ።

¹⁵ኢሲያ ኣዉራጃ ጊዶን ዲዛይቲ ዉሪካ ታና ኣጊዳይሳ ኔ ኤራሳ። ፊልጎሲኔ ሄርሞጌኔሲ ታና ኣጊዳ ኣሳ ጊዶን ዴቴስ።

¹⁶ሄኔሲፎሬ ሶ ኣሳ ጎዳይ ማሮ፤ ኣይሲ ጊኮ ኢዚ ታና ዳሮ ዎዴ ሚንꬄꬂዴሲኔ፤ ታ ሳንሳላታን ቃሼታ ዲሺን ታና ቤይዲ ዬላቲቤና።

¹⁷ሃራፔካ ኢዚ ኦሮሜ ዪዳ ዎዴ ታና ኮይ ኮይዲ ዴሚዴስ።

¹⁸ዉርሴꬃ ፒርዳ ጋላስ ጎዳይ ኢዛ ፒርዳፌ ኣሾ። ኢዚ ታና ኤፌሶኔን ኣይ ማላ ማዲዳኮኔ ኔ ሎዔꬃ ኤራሳ።