1Ego, kasa tasimami, ele tava tumatumae si gamu koa gami koasa guguana sa tinoa sapu qetu nia sa Tamasa. Asa sa tinoa sapu ele lulia gamu. Gua asa, ke tepa zoṉazoṉa gamu gami kamahire pa korapa pozana sa Baṉara Zisu Karisito, pude tavete gua asa doduru totoso.
2Ura gilani gamu sari na vina tumatumae saripu ele ponini gamu gami, pa korapa ginarunu tanisa Baṉara Zisu.
3Meke na hiniva tugo te Tamasa pude mi koa tava madi si gamu, mi koa va seu koari doduru hahanana kaleana tadi na koreo na vineki, maqota, meke na binarabarata, na gua.
4Mi hopeke tumae kopuni sari hiniva tadi tinimia. Hopeke koa turaṉia sa loamu pa hahanana toṉotona.
5Lopu pa korapa inokoro sea, gua rina tie huporo pu lopu gilania sa Tamasa.
6Koari na hahanana sea arini, si mani lopu sekesekei nia na va kaleania keke tie sa tasina koe Karisito. Ura sa Baṉara si kote va kilasa betoi sari doduru tie pa dia sinea gua hire, gua sapu ele tozini gamu gami, meke ele va balauni gamu.
7Ura lopu tioko gita Tamasa si gita pude luli sari na inokoro sea, ba pude koa va madi tu.
8Ke asa sapu va karia sa vina tumatumae hie, si lopu va kari au mo sa si arau, ba sa Tamasa tugo sapu ponini gamu sa Maqomaqo Hope.
9Ego, lopu vivinei nia rau koasa leta hie sa vinari tatarue tamatasi pa ekelesia, sina ele va tumatumaeni gamu tu Tamasa pude koa varivari tatarue si gamu.
10Hinokara sapu ele evaṉia gamu si hie, koari doduru tasimia pa ekelesia, koari doduru vasina pa Masedonia. Ba tepa gamu tugo gami, pude mi vari tatarue nono latu.
11Mi podeke sisigitia pude koa va bule koari na tie. Mi tavetavete telemia pa limamia soti, mi kopu nia sa mia tinavete, ba lopu sapu tanisa votiki tie, gua sapu ele tozini gamu gami visoroihe.
12Pude gua asa si kote ta pamaṉae si gamu koari pu lopu na tie te Karisito, meke lopu kote hite ehaka nia gamu si keketoṉa.
13Kasa tasimami, hiva va gilanani gamu gami sa hinokara koa rini pu ele mate, pude mi lopu koa hola pa kinuliusu, kekeṉoṉo gua rina tie pu loke dia rinaṉeraṉe koe Karisito.
14Va hinokaria gita sapu ele mate meke turu pule se Zisu, ke va hinokaria tugo gita sapu kote turaṉa somana pule mae ni Tamasa koe Zisu si arini pu va hinokaria si Asa meke ele mate.
15Ura saripu ele zama atu ni gami koa gamu, si mae guadi tu koasa Baṉara. Gita sapu toada koasa rane sapu kote pule mae ia sa Baṉara, si lopu kote tutuvu kekenua si Asa, ba saripu ele matedi tu si kote tutuvu kenua si Asa.
16Ura sa Baṉara telena si kote gore mae gua pa Maṉauru, meke velavela vura nia sa ginarunu, meke kote ta avoso sa mamalaiṉina sa ṉati mateana, meke sa kabona sa buki te Tamasa. Meke sarini pu va hinokaria se Zisu Karisito meke ele mate, si kote turu pule kekenu.
17Mudina asa si gita pu korapa toa pa totoso asa, si kote varigara somanae koarini pa lei, pude tutuvia sa Baṉara pa galegalearane. Gua asa, ke kote koa turaṉia gita sa Baṉara ninae rane ka rane.
18Gua asa ke, mi variva manoti koari na zinama hire.
