1 Qorontoose 12

1

2

3

4

5

6

7

8

9

10

11

12

13

14

15

16

¹Ta ishato! Ayanay immiza imotetha gish inte issi miish erana mala ta koyays.

²Inte ammananappe kase coo mela yaanne haanne guussan inte eronta kaalethettidi duuna duude gidida eeqatakko bidayssa inteka ereeta.

³Hessa gish oonikka Xoossa Ayanan haasayishe “Yesusi qangetidade” geenna. Hessathoka Xillo Ayanan gididi attin oonikka “Yesusi Goda” gaana asi doontayssa ta intes yootays.

⁴Asas imotethi dumma dumma gidishin Ayanay gidikko issino.

⁵Oosoykka dumma dumma gidishin Goday gidikko issino.

⁶Dumma dumma ooso ogeti diikkokka wursikka ooththizay issi Xoossa.

⁷Gido attin Xillo Ayana qonciso imotay issades imettizay issife go7ettanassa.

⁸Issades hiillan haasayana eratethi imetees. Hara asas qas he Ayananka eratetha qaalan haasayana qaalay imetees.

⁹Issades he Ayanan ammanoy imetees. Hara asas qas he Ayananikka hargizayta pathiza imotay imetees.

¹⁰Issades malalisiza ooso ooththiza imotay; qasseka hara asa buro tinbite qaala haasaya imotay; hara asa qasseka ayanata shaakki eroy; hara asas dumma dumma qaalan hasayay; qasseka hara asas hara dumma dumma qaalan haasayettidayssa birshana imotay imetees.

¹¹Heyti wurikka he issi Ayanay immiza imota gidishin issi issi asas ba koyda mala immees.

¹²Issi asatetha bolla daro billiteti diikkokka asatethay issino. Gido attin billiteti daro gidikkoka asatethay issino xalala. Kirstoosikka hessa mala.

¹³Ayhuda asata gidinka Girike asata gidinka, aylle gidinka woykko goqa asata gidinka nu wurikka issino gidanas issi Ayanan xammaqetidos. Nu wurikka ha issi Ayanappe uyidos.

¹⁴Asatethi medhetiday daro billitetappe attin issi billiteppe xalala gidenna.

¹⁵Tohoy “Ta kushe gidonta gish asatetha giddon diikke” giikko izi hizgida gish izas asatethan duussi attanee?

¹⁶Haythi “Ta ayfe gidonta gish asatetha giddon diikke” giikko hessa gish asateth giddon duussi izas attanee?

¹⁷Asatethi wurikka ayfe xalala gididakko aazan siyanee? Asatethi wurikka haythe xalala gididakko aazan singanee?

¹⁸Gido attin Xoossi issa issa ba koyda mala asatetha giddon daanas bessizason woththides.

¹⁹Billitey wurikka issino gididakko kumeththa asatethi awappe betanee?

²⁰Hessa gish billiteti daro shin asatethi gidikko issino xalala.

²¹Ayfey kushe “Nena ta koyikke” gaanas dandayenna. Hu7ey toho “Nena taas koshshenna” gaana dandayenna.

²²Haray attoshin ubbafe laafa misatiza billiteti daro koshshizayta.

²³Nuni laafa gi leqqiza billiteta hankoytaappe aaththi bonchos. Qasseka nu istan yeelatiza billiteta harappe aaththi naagos.

²⁴Nu istan yeelatonta billitetas gidikko hessa mala boncho koshshenna. Xoossi gidikko asateth billiteta issi bolla oythethidi bonchoy paacizaytas aadhdhetha boncho immides.

²⁵Izi hessa ooththiday asatetha billiteta garsan shaakotethi doonta isti ba garsan issoy issa banara gina gi qoppanassa.

²⁶Issi billitey saketikko hanko billiteti wurikka izara issife saketetes. Issi billitey bonchettikko biilliteti wurikka issife ufayetetes.

²⁷Histikko inte wurikka Kirstoosa asateth; inte issoy issoy iza asatetha billiteta.

²⁸Xoossi Woosa Keeththa giddon koyro Hawaareta, nam7antho qasse nabeta, heedzdzantho astamareta, kaalethidi malata ooththizayta, paathiza imotethi dizayta, harataka as maaddiza imotay dizayta, dere ayso eratethi dizaytanne dumma dumma qaala haasayana imotethi diza asata woththides.

²⁹Wurikka hawaratee? Wurikka nabetee? Wurikka astamaretee? Wurikka malalisiza miishe ooththizoo?

³⁰Ubbaska hargizayta paathiza imotay dizee? Asi wurikka dumma qaalan hasayizee? Dumma qaalan hasayettoyssa asi wuri birshizee?

³¹Gido attin inte wurikka ubbafe aadhdhiza imoteth lo7ethi koyite. Qasseka hara ubbafe aadhdhiza oge ta intena bessana.