1 Petrus 5

1

2

3

4

5

¹Mua o huriki a gare na lotu, iau tara a gare. Iau a matai a maregoa i bolea e Kristo. Bara te vaveru vona a bagetuanga vona, ra ge bele kavakava muri ma. I mavonga, a taki tora mua,

²mu matakari kamumu a kabu na Vure, ra ri made turane mua. Mu rata mavonga, i uka ma mu ramai kunana a nitagu. Nahea mu gu rata kunana a leho ni bole a moni. A naro iea, a naro ni maruhu vona. Mu matakari ria a vuhuna mu ngaru hateka ni rata, i manga a Vure i ngaru.

³Naha ni matakari hateka a kabu na Vure. Mu muga ria, mu vakasiri a naro kamumu ne ria, ri gi ramai.

⁴Muri, na tahuna a Matakari dagi i bele, bara i habi ne mua a mapa kamumu ge tabuli vakaroro.

⁵Mua o huriki a riau, mu longototo e huriki a gare ne mua. Mu vakakiroko mua, mu vakori, a vuhuna a Hinere i ta maea, “E huriki ri bibi rike mule a rane ria, a Vure bara i gege ria. Pali e huriki ri vakakiroko ria, a Vure bara i rata kamumu ria.”

⁶I mavonga, mu vakakiroko mua polo­tano na nitora dagi na Vure. Muri, na parava i vulakia, bara i kavurike mua.

⁷Mu habi na limana a maki lobo mu loho lege vona, a vuhuna i ngaru hateka mua.

⁸Mu matapara, mu matadoko, a vuhuna a pile ne mua, e Satan, i laho viliha manga a laion i roro, i matakana a viri ge ratapilea.

⁹Mu gegea, mu pesi tora na niluhoi tora, a vuhuna mu lohoka vona e huriki e turane mua na tabeke ranga na malala, ria ranga ri bole a nimadihi manga mua.

¹⁰I mavonga, na tahuna mu bole pali a nimadihi popote, a Vure na nidodo bara i kisi mua, i vakatora mua, i rata mua mu pesi tora. Ra Vure i rata kamumu mua, i gale mua mu gu made turana vakaroro na bagetuanga vona, a vuhuna mu luhoi torea e Isu Kristo.

¹¹A nitora lobo ge ne vona kunana vakaroro. I muholi.

¹²E Sailas i manga e turagu muholi, i rata kamumu a leho lobo a habi vona. I kori iau, i here poloa a raukea kiroko iea, ra a vara mua, a taki tala ne mua a naro kamumu muholi na Vure. Mu pesi tora vona.

¹³A ngatavine ra i made o Babilon i talo mua. Ia tara, a Vure i vulakia. E tugu e Markus tara, i talo mua.

¹⁴Mu vatagui na naro kamumu ni vangaru. Mua o huriki mu rihi e Kristo, a niva­lemu ge tabuli ne mua.