1Taim King Demitrius i harim olsem Nikanor wantaim olgeta soldia bilong en i dai pinis, em i salim Bakides na Alkimus i go long Judia. Tupela i go namba 2 taim nau, na tupela i kisim sampela lain ami i go wantaim.
2Ol i wokabaut i go long rot bilong taun Gilgal, na ol i wokim kem bilong kirapim pait long ol manmeri bilong ples Mesalot long hap bilong Arbela. Ol i kisim dispela ples na ol i kilim i dai planti man.
3Long namba wan mun bilong yia 152 ol i wokim kem bilong pait long ol Jerusalem.
4Bihain ol i go long ples Beria. Namba bilong ol inap long 20,000 soldia nating na 2,000 soldia i save sindaun long ol hos.
5Judas i stap long kem long ples Elasa. Em i gat 3,000 man em yet i bin makim.
6Taim ol i lukim bikpela namba bilong ol birua, ol i pret nogut tru. Na planti man i ranawe, na i lusim kem. Samting olsem 800 man tasol i stap.
7Taim Judas i lukim klostu olgeta soldia bilong en i ranawe pinis, na ol birua i redi long pait, bel bilong en i pas olgeta. Long wanem, em i no gat taim bilong bungim gen ol soldia.
8Pastaim bel bilong en i seksek tru. Tasol bihain em i mekim tok olsem long ol man i stap yet, “Yumi kirap na go pait long ol birua. Ating yumi inap winim ol.”
9Tasol ol man i traim senisim tingting bilong em, na ol i tok olsem, “Yumi no inap. Mobeta yumi stap laip na yumi surik i go bek. Yumi bung wantaim ol brata. Na bihain yumi kam bek na pait long ol birua. Nau yumi liklik lain tumas.”
10Tasol Judas i tok olsem, “Nogat tru. Yumi no ken ranawe long ol birua. Sapos taim bilong yumi long dai i kam nau, yumi no ken pret. I orait, yumi ken i dai bilong helpim ol brata bilong yumi, na bai gutpela nem bilong yumi i no inap bagarap.”
11Orait ol ami bilong Bakides i lusim kem na i redi long pait long ol Juda. Ol soldia i save sindaun long ol hos i bruk long tupela lain. Ol man i save sut long katapel na ol lain i holim banara ol i go pas long bikpela lain ami. Na ol man i save gut tru long pait ol i sanap long namba wan lain.
12Bakides i stap long rait sait. Tupela lain bilong ol birua i winim ol biugel na i wokabaut i go. Na ol soldia bilong Judas tu i winim biugel.
13Nois bilong tupela lain ami i pait, em i mekim graun i guria. Pait i stat long moningtaim na i go i go inap long apinun tru.
14Judas i lukim Bakides wantaim ol nambawan soldia i stap long han sut.
15Olsem na Judas i kisim ol soldia i no save pret na ol i go krungutim dispela lain na ol i ranim ol i go inap long maunten Asdot.
16Taim ol birua i stap long lep sait i lukim ol lain bilong rait sait i pundaun pinis, ol i tanim na i kamap baksait long Judas wantaim ol lain bilong em, na ol i ranim ol i go.
17Orait pait i kamap strong tru na planti soldia bilong tupela lain ami i kisim bagarap na planti i dai.
18Judas tu i dai na ol lain bilong en i ranawe.
19Bihain Jonatan wantaim Saimon i kisim bodi bilong Judas, brata bilong tupela, na karim i go. Ol i planim em long matmat bilong ol lain tumbuna bilong ol long taun Modein, na ol i krai long em.
20Ol Israel i mekim bikpela krai sori inap long planti de, na ol i singaut olsem,
21“Sori tru, olsem wanem na bikman bilong kisim bek yumi Israel em i dai pinis?”
22Ol i no bin raitim olgeta arapela stori bilong ol pait na ol bikpela wok na ol arapela samting i bin givim biknem long Judas, long wanem, ol dispela stori i planti tumas.
23Taim Judas i dai pinis, ol man bilong sakim lo bilong God i kirap gen long olgeta hap bilong Israel. Na ol man nogut i kisim strong gen.
24Long dispela taim, taim bilong bikpela hangre i kamap, na olgeta manmeri i go bung wantaim ol birua.
25Na Bakides i kisim ol Juda i no pret long God na em i makim ol bilong bosim kantri.
26Ol dispela hetman i wok long painim ol pren bilong Judas na ol i bringim ol i go long Bakides bai em i ken semim ol na bagarapim ol.
27Nau taim nogut i kamap long ol Israel. Long taim bilong ol profet i kam inap nau, kain bikpela hevi olsem i no bin kamap long ol Israel.
28Nau ol pren bilong Judas i bung wantaim na ol i tokim Jonatan olsem,
29“Brata bilong yu i dai pinis na nau i no gat narapela man olsem em i stap, inap long mekim save long kain birua olsem Bakides na ol wantok nogut bilong yumi.
30Olsem na nau mipela i makim yu bilong kisim ples bilong Judas, bai yu stap hetman bilong mipela na lida bilong pait.”
31Long dispela de Jonatan i kisim ples bilong brata bilong em na em i kamap hetman bilong ol Israel.
32Bakides i harim tok long Jonatan i bin kamap hetman bilong ol Israel na em i trai hat long kilim Jonatan.
33Tasol Jonatan na brata bilong em Saimon, wantaim ol man bilong ol, ol i save pinis long samting Bakides i laik mekim, na ol i ranawe i go long ples nating bilong Tekoa, na ol i wokim kem klostu long hul wara bilong Aspar.
34Long wanpela de Sabat Bakides i painimaut olsem ol i stap long dispela hap na em wantaim olgeta ami bilong en i go brukim wara Jordan.
35Jonatan i singautim brata bilong em Jon, em i hetman bilong ol lain kagoboi bilong ami, na Jonatan i salim em i go lukim ol pren bilong em long graun bilong ol Nabatia. Jon i mas askim ol long larim em i putim ol kago bilong em long ples bilong ol.
36Tasol ol lain Jambri bilong taun Medeba i kamap, na ol i kalabusim Jon na stilim ol kago bilong em na karim i go.
37Bihain liklik, Jonatan na brata bilong em Saimon i harim tok olsem, “Ol lain Jambri i gat bikpela amamas. Nau tasol wanpela bikpela lain bilong ol i lusim taun Nadabat bilong bringim wanpela meri i laik marit. Dispela meri em i pikinini bilong wanpela bikman bilong ol Kenan.”
38Orait tupela i tingim i dai bilong Jon, brata bilong tupela, na tupela i go antap long wanpela liklik maunten, na i sanap redi long ples hait.
39Tupela i lukluk i stap, na tupela i lukim planti man i bung wantaim. Ol i mekim planti nois na ol i karim planti kago. Man i laik marit, wantaim ol pren na ol brata bilong em, ol i wokabaut i kam long rot bilong bungim lain bilong meri. Ol i karim ol samting bilong mekim musik na ol i holim ol samting bilong pait.
40Jonatan wantaim ol lain bilong en i lusim ples hait na ol i go kirapim pait wantaim ol Jambri. Planti man i dai na ol arapela i ranawe i go long ol maunten. Na ol Juda i karim ol kago bilong ol i go.
41Olsem na amamas bilong marit i senis na i kamap krai bilong sori. Nek bilong musik i senis na i kamap krai bilong planim man.
42Long dispela pasin tupela i bekim nogut blut bilong brata. Na bihain tupela i go bek long ples tais klostu long wara Jordan.
43Taim Bakides i harim tok long dispela samting tupela i bin mekim, em i kirap wantaim bikpela lain ami long de Sabat na i go kamap long arere bilong wara Jordan.
44Orait Jonatan i tokim ol man bilong em olsem, “Yumi kirap long pait. Wari yumi kisim nau em i narakain olgeta. Nau bai yumi win o yumi dai.
45Harim gut. Ol birua i stap long fran bilong yumi na wara Jordan i stap long baksait. Long tupela sait i gat tais na bus tasol i stap. I no gat rot bilong i go bek.
46Olsem na yumi mas singaut strong, bai God i kisim bek yumi long han bilong ol birua.”
47Pait i kirap na Jonatan i laik hamaim Bakides. Tasol Bakides i abrus na i surik i go bek.
48Orait Jonatan wantaim ol man bilong en i kalap long wara Jordan na i swim i go long hapsait. Tasol ol birua i no brukim wara na bihainim ol. Nogat.
49Na long dispela de samting olsem 1,000 man bilong Bakides i dai.
50Bakides i go bek long Jerusalem na em i strongim sampela taun bilong Judia. Em i wokim ol kem long taun Jeriko na Emeus na Bethoron na Betel na Timnat na Piraton na Tefon. Em i wokim ol banis i go antap moa, na em i wokim ol bikpela dua tu na em i pasim ol long ol ba ain.
51Na long olgeta taun em i putim ol lain soldia bilong givim hevi long ol Israel.
52Em i strongim tupela taun Betsur na Geser na strongpela haus long Jerusalem, na long ol dispela taun em i putim planti soldia na ol kago bilong ol.
53Na em i kisim ol pikinini man bilong ol lida bilong ol Juda na em i kalabusim ol long strongpela haus bilong Jerusalem.
54Long namba 2 mun bilong yia 153 Alkimus i tok olsem ol i mas rausim namba 2 banis i raunim tempel. Long dispela pasin em i laik bagarapim wok ol profet i bin mekim bipo.
55Tasol long taim ol i statim dispela wok, Alkimus i painim bikpela sik, na dispela sik i stopim wok bilong em. Maus bilong en i pas na han lek bilong en i dai. Em i no inap mekim wanpela tok o stretim ol samting bilong haus bilong em.
56Na Alkimus i dai wantaim bikpela pen.
57Taim Bakides i kisim tok long Alkimus i dai pinis, em i go bek long king na ol Juda i sindaun isi inap long tupela yia.
58Orait ol man bilong sakim lo bilong God ol i bung wantaim, na ol i tok olsem, “Lukim. Jonatan wantaim ol manmeri bilong em ol i sindaun isi na i no gat trabel. Yumi mas bringim Bakides i kam bek, na em i ken kalabusim ol long wanpela nait tasol.”
59Na ol i go lukim Bakides
60na em i kam wantaim bikpela lain ami. Em i salim ol pas hait i go long olgeta pren bilong en i stap long distrik Judia, bai ol i kalabusim Jonatan wantaim ol lain bilong em. Tasol ol i no inap, long wanem, Jonatan i painimaut pinis tingting bilong ol.
61Na lain bilong Jonatan i kalabusim 50 hetman i bin mekim dispela wok nogut na ol i kilim ol i dai.
62Orait Jonatan na Saimon wantaim ol lain bilong ol, ol i lusim ples na i go long Betbasi, em wanpela taun i stap long ples nating. Ol i kirapim gen hap bilong dispela taun i bin bagarap pinis, na ol i strongim olgeta.
63Taim Bakides i harim tok long samting tupela i mekim, em i bungim olgeta soldia bilong em na em i singautim ol man bilong Judia.
64Na bihain em yet i kam na em i wokim kem bilong bringim pait i go long Betbasi. Em i sanapim ol masin bilong pait, na ol i pait i go inap long planti de.
65Jonatan i larim brata bilong em Saimon i stap long taun. Na em yet i lusim ples na i go long bus wantaim liklik lain soldia bilong em.
66Em i bagarapim Odomera wantaim lain bilong em, na em i pinisim tu ol lain bilong Fasiron i stap long kem bilong ol. Na Jonatan wantaim ol ami bilong en i stat long pait long lain bilong Bakides.
67Long dispela taim Saimon wantaim ol lain bilong en i lusim taun na ol i kukim ol masin bilong pait.
68Ol i pait long Bakides na krungutim na winim ami bilong em. Bakides i les tru nau, long wanem, olgeta tingting na wok bilong en i popaia stret.
69Em i kros tru long ol man nogut bilong Juda i bin singautim em long kam insait long kantri bilong ol. Na em i kilim planti bilong ol. Bihain em i pasim tingting long i go bek long kantri bilong em yet.
70Taim Jonatan i harim olsem Bakides i laik i go bek long ples bilong em, em i salim sampela man i go bilong stretim tok bilong sekan na bilong kisim bek ol Juda i stap kalabus.
71Bakides i orait long dispela tingting na em i bihainim laik bilong Jonatan. Em i tok tru antap long Jonatan bai em i no inap givim hevi long em inap long taim em i dai.
72Olsem na em i salim bek ol kalabusman em i bin kisim long Judia. Em i go olgeta long ples bilong em na em i no kam bek moa.
73Long dispela pasin ol bikpela pait i pinis long Israel. Jonatan i go sindaun long taun Mikmas. Na em i stat long bosim ol manmeri na pinisim ol man i sakim lo bilong God.
