1O lasitêwaac, gêmuŋgeŋ aê katôm gebe jasôm biŋ êndêŋ amac amboac kasôm gêdêŋ lau, taŋ sêwê kaiŋ Ŋalau naŋ atom. Aê kasŋôm biŋ amboac kasôm gêdêŋ lau toŋalêlôm laŋgwa to gêdêŋ lau, taŋ sêkôc Kilisi sa amboac ŋapalê dedecgeŋ.
2Aê kakêŋ su gêdêŋ amac anôm, kakêŋ mo atom, gebe amac atôm atom gebe aniŋ gêŋ ŋajaŋa. Ma galoc embe jakêŋ, oc atôm atom amboac tonaŋgeŋ,
3gebe amac asa lau toŋalêlôm laŋgwa nêŋ lêŋ amoa. Amac embe anam lêmuŋ taôm to akêŋ kisa êndêŋ taôm, go êwa amac sa gebe amac lau toŋalêlôm laŋgwa to asa lêŋ ŋamalacŋa amoa atom me.
4Ŋac teŋ embe êsôm gebe “Aê katu Paulunê gêŋ,” ma teŋ embe êsôm gebe “Aê katu Apolonê gêŋ,” oc asa lêŋ ŋamalacŋa atom me.
5Amboac ondoc, Apolo eŋ asa me Paulu eŋ asa. Aêagêc sakiŋwaga, taŋ awê amac akêŋ gêwiŋ Kilisi naŋ. Aêagêc ajam ma kôm gêdêŋ-gêdêŋgeŋ kêtôm Apômtau kêkêŋ gêdêŋ aêagêc.
6Aê kapuŋ ŋawê ma Apolo kêsanem bu, mago Anôtô kêkêŋ gêŋ tau kêpi.
7Amboac tonaŋ ŋac, taŋ kêpuŋ ŋawê agêc ŋac, taŋ kêsanem naŋ, talic amboac ŋanô atom, ŋanô tageŋ ŋac, taŋ kêkêŋ gêŋ tau kêpi. Ŋac tau eŋ Anôtô.
8Ŋac kêpuŋ ŋawêŋa agêc ŋac kêsanem buŋa agêc têtôm tauŋ. Êsêagêc lulugeŋ sêkôc nêŋ kôm ŋaôli êtôm nêŋ koleŋ, taŋ sêjam naŋ,
9gebe aêagêc ajam kôm awiŋ Anôtô, ma amac atu ênê kôm moŋa to atu Anôtônê andu, taŋ kêkwê gêmoa naŋ.
10Anôtô kêkêŋ moasiŋ gêdêŋ aê katu kamunda tokauc, tec kasuŋ andu tau ŋaalê, ma ŋac teŋ gêu demboŋ, go lau samob, taŋ sêkwê andu tau sêmoa naŋ, sejop nêŋ kôm ŋapepgeŋmaŋ.
11Alê ŋanô Jesu Kilisi tau tec kêkô sugac, ma ŋac teŋ êtôm gebe ênsuŋ alê teŋ êjô alê ŋanô tonaŋ atomanô.
12Mago ŋac teŋ embe êkwê andu êkô alê tau ŋaô, oc êtôm gebe êkôc gold me silber me pocawa me ka me oba me labilauŋ.
13Lau samob nêŋ kôm gêdêŋ-gêdêŋgeŋ oc êtu awê. Kilisinê bêc oc êkêŋ kôm tau ênêc awê ma eoc ŋanô lasê ŋa ja ma ja tau êwaka lau samob nêŋ kôm gêdêŋ-gêdêŋgeŋ ŋaŋanô sa.
14Ŋac teŋ nê kôm, taŋ kêkwê sa naŋ, embe êkô, naŋ ŋac tau oc êkôc ŋaôli.
15Embe ja êniŋ ŋac teŋ nê kôm, oc nê kôm ŋanô ênaŋa, mago eŋ tau, Anôtô oc ênam eŋ kêsi, êtôm êjaŋgo eŋ aŋga ja ŋalêlôm su.
16Amac atu Anôtônê lôm dabuŋ ma Anôtônê Ŋalau gêŋgôŋ amacnêm ŋalêlôm. Amac ajala biŋ tonaŋ me masi.
17Ŋac teŋ embe enseŋ Anôtônê lôm dabuŋ su, naŋ Anôtô oc enseŋ eŋ su, gebe Anôtônê lôm tonaŋ gêŋ dabuŋ, ma amac tec atu lôm dabuŋ tau.
18Ansau taôm atom. Amacnêm ŋac, taŋ geboc eŋ ŋac tokauc nom tonecŋa naŋ, êtu ŋac meloc acgom, ec êtu ŋac tokauc ŋanô,
19gebe kauc nom tonecŋa Anôtô gêlic amboac gêŋ meloc kêtôm teto gêc gebe “Eŋ gêwa lau tokauc nêŋ kaucdansaŋ kêtu lip ênac êsêacŋa.”
20Ma teto teŋ gêwiŋ gebe “Apômtau kêjala lau tokauc nêŋ taêŋ gêjam ma gêlic gebe ŋanô masi.”
21Amboac tonaŋ ŋac teŋ etoc tau sa êtu ŋamalac teŋŋa atom, gebe gêŋ samob kêtu amacnêm.
22Paulu agêc Apolo ma Kepa, nom tonec ma aŋgôŋ matem jaliŋa to amac ênduŋa, ma gêŋ galocŋa to gêŋ ŋamuŋaŋa, gêŋ samob tonaŋ ŋai kêtu amacnêm.
23Ma amac taôm tec atu Kilisinê gêŋ, ma Kilisi tau kêtu Anôtônê.
