Text copied!
CopyCompare
Buka Hope - 1 Koriniti

1 Koriniti 5

Help us?
Click on verse(s) to share them!
1Ego, ele ta tozi sapu ta evaṉa pa varikorapa mia gamu sari na vinarivosa na binarabarata kaleadi hola, sapu ari na tie huporo ba lopu hoke evaṉi. Ele avosia rau, sapu keke koa gamu si koa turaṉia sa loana sa tamana.
2Vegua ke va sagesage pule ni gamu si gamu? Pada mia si pude talotaṉa hola. Meke sa tie pu evaṉia sa kinaleana sana, si mani tava vura palae koasa mia kinoa binaere pa ekelesia.
3Arau si koa va seu koa gamu pa tiniqu, ba lopu hite muliṉini gamu rau pa qua binalabala, guana sapu korapa koa qua mo koa gamu si rau. Pa korapa ṉiniraṉira tanisa Baṉara Zisu Karisito, si ele vizatia rau sa vina kilasana sa tie sana.
4Pana varigara meke vivinei si gamu, si guana somana mo koa gamu si rau. Meke sa ṉiniraṉira tanisa nada Baṉara Zisu Karisito si koa Nana koa gamu pude tokani gamu pude tavetia gua sapu zama ni rau.
5Ke mi luara vala koe Setani sa tie sana, pude kaqu tava mate sa hiniva kaleana pa tinina, pude mani ta harupu sa maqomaqona, pana pule mae sa Baṉara.
6Lopu leana pude va lavalavata puleni gamu si gamu! Vegua, lopu ele gilania tu gamu sa vina balau sapu zama guahe: “Keke vasi isiti d hite mo, ba kote boka va sagea si keke doduru siniovo palava,” gua?
7Ke mi va vura taloa ia sa tie kaleana, gua sapu sari na tie Ziu si hoke okipani sari doduru isiti pa dia vetu, meke kinai rini sari na palava sapu loke isitidi, pude va namaia sa rane Pasova. Meke kaqu guana siniovo palava vaqura pu loke isitina si gamu. Asa tu sa mia tinoa hinokara koe Karisito. Ura ele mate se Karisito pude vulasa pani sari nada sinea guana nada vina vukivukihina sa lami tanisa Inevaṉa Pasova.
8Gua asa, ke mada keha luli sarini pu kopu nia sa Inevaṉa Tanisa Bereti pu Loke Isitina, mada okipania sa isiti koana, sa isiti tana ṉinovaṉovala pa tie meke kinaleana, mada toa nia sa tinoa viana, meke hinokara.
9Koa sa leta sapu ele kubere atunia rau, si ele tozini gamu tu rau, pude mi lopu somanae koari na tie pu evaṉi sari na vinari riqihi, na gua.
10Lopu sari na tie huporo si guni rau, saripu hoke evaṉi sari na vinari riqihi, na pinuhi, na hikohiko, meke na vinahesi beku. Pude lopu koa turaṉi gamu sari na tie huporo, si kote lopu koa hola koasa kasia popoa si gamu.
11Ba sapu gunia rau hie, si pude mi lopu somanae koa ke tie sapu poza pule nia tasimia koe Karisito si asa, gua, ba variriqihi, na puhi, vahesi beku, zama va kaleana pa tie, naponapo va hola, ba be hikohiko si asa. Sa tie gugua asa, si mi koromia hokara habotu turaṉia, na henahena turaṉia.
12Sarini pu lopu na tie te Karisito, si lopu qua ginugua rau pude va kilasi sari na dia sinea. Ba Tamasa tu si kaqu va kilasi sari na dia sinea. Ba mamu va kilasi tu sari na sinea tadi na tie te Karisito. Ura guahe si zama nia sa Kinubekubere Hope: “Va vura taloa ia sa tie kaleana koasa mia pukuna,” gua.