1Kasa tasiqu, hiva va gilana puleni gamu rau sa Inavoso Leana sapu ele tarae nia rau koa gamu, meke sapu ele tagoa gamu, meke vasina si ta sokirae sa mia rinaṉeraṉe.
2Koasa Inavoso Leana sapu tarae nia rau koa gamu si ta harupu si gamu. Ba be lopu raṉe va nabua gamu si asa, si loke guguana sa mia vina hinokara.
3Tozi va karovo atua rau koa gamu, gua sapu ele vagia rau, meke sa ṉatina si arilaena hola, sapu se Karisito si ele mate hobei sari nada sinea, gua sapu ta kubere pa Kinubekubere Hope,
4sapu ta pomunae si Asa, ba pa rane vina ṉeta si turu pule pa minate, gua sapu ta kubere pa Kinubekubere Hope,
5sapu ta dogoro si Asa koe Pita, meke beto asa si ta dogoro tugo koari ka manege rua apositolo.
6Beto asa, si pa keke totosona si vata dogoro pule nia si Asa koari ka lima gogoto tie pu va hinokara. Sokudi arini si korapa toa dia, ba kaiqa si ele mate.
7Beto asa si ta dogoro si Asa koe Zemisi, meke tiqe koari doduru apositolo.
8Meke mumudi hokara si ta dogoro si Asa koa rau. Kekeṉoṉo guana tie sapu lopu ele kamo valeana nana totoso meke ta podo si rau.
9Ura arau si hiteke hola koari doduru apositolo. Meke lopu hite garoqu rau si pude ta pozae na apositolo, sina ele ṉoṉovalia rau sa ekelesia te Tamasa.
10Ba koasa tataru variharupi te Tamasa, si boka ta evaṉae gua hie si arau. Meke sa tataru pu poni nau Sa si lopu ta okipalae hoboro. Ura pa kaiqa ginugua, si tavetavete va ṉiṉira hola ni rau sari doduru apositolo. Ba lopu na qua tinavete soti telequ, ba sa tataru variharupi tu te Tamasa sapu koa tavetavete koa rau.
11Ke gua asa, si be arau si tarae koa gamu, babe ari kaiqa apositolo pule, ba kekeṉoṉo mo sapu gua tarae nia gami, meke asa tugo si va hinokaria gamu.
12Ego, ele tarae nia gami sapu Karisito, si ele turu pule pa minate, gua. Ba vegua ke zama si kaiqa gamu, sapu sari na tie matedi si lopu kaqu toa pule pa minate, gua?
13Be hinokara sapu lopu kaqu toa pule saripu mate, si lopu hinokara tugo sa tinuru pule te Karisito.
14Meke be lopu turu pule pa minate se Karisito, si loke laena sa mami tinarae koa gamu, meke loke laena tugo sa mia rinaṉeraṉe koa Sa.
15Ba sapu kaleana hola, si gami na apositolo si kote ta zutu nia sapu gami si tarae nia sa kinohakoha koasa guguana sa Tamasa. Ura zama si gami sapu ele va toa pulea Tamasa pa minate se Karisito, gua. Ba pude hinokara sapu saripu mate si lopu kaqu toa pule pa minate, si lopu va turu pulea tugo Tamasa pa minate se Karisito.
16Ura be lopu tava toa pule pa minate saripu mate, si e Karisito ba lopu tava toa pule tugo pa minate.
17Meke be lopu va turu pulea Tamasa pa minate se Karisito, si loke guguana sa mia rinaṉeraṉe, meke korapa koa hola mia pa mia sinea si gamu.
18Meke arini pu ele va hinokaria se Karisito, meke ele mate, ba lopu kaqu toa pule tugo.
19Be sa nada kinalavarae koe Karisito si tana tinoa pa pepeso mo hie, si variva talotaṉa hola si asa, ke variva tataruda si gita, hola ni sari doduru tie pa kasia popoa.
20Ba sa hinokarana, si ele va turu pulea Tamasa se Karisito pa minate. Asa si na vina sosodena sapu, arini pu koa keke koe Karisito meke mate, si kaqu va toa pulei tugo Tamasa.
21Kekeṉoṉo gua tugo sapu keke tie va mae ia sa minate, si keke tie tugo va mae ia sa tinoa pule pa minate.
22Ura gua sapu pa dia sinoto koe Adama d si mate nia ri doduru tie, si pa dia sinoto koe Karisito si kaqu turu pule nia ri doduru.
23Hopeke rini si tava toa pule pa hopeke dia totoso. Kekenu se Karisito, meke mumudi sari Nana tie pana kaqu pule mae i Sa.
24Beto asa meke kaqu tiqe kamo sa vinabetona sa kasia popoa. Kaqu va kilasi Sa sari doduru tie na maqomaqo, pu tago ṉiniraṉira pa maṉauru meke pa pepeso. Meke kaqu va karovo vala Sa sa binaṉara koe Tamasa sa Tamana.
25Ura kaqu koa Baṉara se Karisito, osolae kaqu va boka ia Tamasa si Asa pude va kilasa beto pani sari doduru Nana kana, pude ṉati hiniva ni Sa si arini.
26Sa kana vina betobeto hokara pude tava kilasa, si na minate.
27Ura guahe si ta zamae koa sa Kinubekubere Hope: “Ele va boka ia Tamasa pude ṉati hiniva ni Sa sari doduru tiṉitoṉa”, gua. Bakala mo sapu sa zinama “doduru tiṉitoṉa,” si lopu nae somanae nia Sa sa Tamasa, sapu vekodi sari doduru tiṉitoṉa pa ṉiniraṉira te Karisito.
28Ba pana ele ta veko pa ṉiniraṉira te Karisito sari doduru tiṉitoṉa, si kaqu vala pule nia telena sa Tuna, koasa ṉiniraṉira te Tamasa sapu ponina sa ṉiniraṉira koa Sa, pude ṉati hiniva ni sari doduru tiṉitoṉa. Meke sa Tamasa si kaqu koa ṉati hiniva ni sari doduru.
29Ego, vegua saripu papitaiso poni saripu ele mate? Na sa laena si asa? Be hinokara sapu lopu kote toa pule saripu ele matedi gua, si pude vea ke papitaiso poni tu saripu ele mate?
30Meke sapu gami kasa na apositolo, si vegua ke vala puleni gami pa tinasuna doduru totoso?
31Hinokara hola kasa tasiqu, sapu hopeke rane si tata pa qua minate si rau. Meke hinokara hola tugo sapu qetu hola nia rau sa mia tinoa keke koe Karisito.
32Be pa ginuguana sa tinoa tini mo si ele varipera si rau koari na kana tani pa Episasi, saripu gua na kurukuru pinomo variva mate, si loke pinia kaqu vagi nia rau si asa. Be lopu toa pule saripu matedi, si “Mada henahena meke napo, ura na kote mate mo si gita vugo,” gua sapu hoke zama nia rina tie.
33Mi lopu sekesekei puleni gamu. Sina guahe si hoke zama nia rina tie: “Asa sapu koa baere koari na tie pu hoke tavete va sea, si kaqu ta turaṉa va sea koarini, meke kote ta ṉovala sa nana hahanana leana,” gua.
34Mi kekere pule mae koa sa tinoṉoto, mi noso nia sa kinaleana. Kaiqa gamu si lopu gilania sa Tamasa; zama nia rau si hie pude va kurekure gamu.
35Keke tie koa gamu si kote nanasa guahe: “Vegugua meke kote boka toa pule pa minate sari na tie matedi? Kote vegugua tinidi sarini?” gua.
36Duvili si goi! Sa kiko sapu letea goi pa pepeso si lopu boka toa be lopu mate paki si asa.
37Gua sapu letea goi si na kiko mo. Be na kiko huiti sia, ba be kaiqa votiki kiko, ba lopu sa ṉati huda sapu ele nomana si kote letea goi.
38E Tamasa tu ponia koasa kiko sana sa huda gua sapu hiva nia Sa. Ponia Sa pa hopeke kiko sa huda sapu garo koasa.
39Sari na masadi ri doduru kurukuru toadi si lopu kekeṉoṉo. Na tie si votiki masana, meke votikaena si tadi na kurukuru ṉame. Votikaena pule si tadi na kurukuru tapuru, meke sapu tadi na igana, ba votikaena tugo.
40Koa dia tugo sari na tini tana maṉauru, meke sari na tini tana pepeso. Sa tinolava tadi na tini tana maṉauru si votikaena koari na tini tana pepeso.
41Sa rimata si votiki nana tinolava, meke tanisa sidara si votikaena. Votikaena pule sa tinolava tadi na pinopino. Meke sari na pinopino teledia ba votivotiki dia tinolava tugo.
42Ego, kote guahe si ta evaṉa pana tava turu pule saripu mate. Pana ta pomunae sa tini pa pepeso, si kote muzi si asa, ba pana tava turu pule sa, si kaqu koa hola si asa.
43Pana ta pomunae sa si doṉo hikare, meke malohoro, ba pana ta va toa pule sa si kaqu tolavaena meke ṉiṉira.
44Na tini hokara mo si asa sapu mate, ba pana tava turu pule sa, si kaqu na tini maqomaqo. Gua sapu koa nana sa tini hokara, si koa nana tugo sa tini maqomaqo.
45Zama sa Kinubekubere Hope, sapu sa tie kekenu sapu se Adama, si ta tavete pude toa pa tinoa tini, ba sa Adama mumudi sapu se Zisu Karisito, si na maqomaqo variva toa.
46Sa tini maqomaqo si lopu mae kekenu, ba sa tini tana pepeso tu, meke mumudi si tiqe mae sa tini maqomaqo.
47Sa tie kekenu si maena koasa kavuruna sa popoa pepeso si asa, ba sa tie vina rua si mae guana pa Maṉauru.
48Arini sapu tanisa pepeso si kekeṉoṉo gua tugo Adama sapu tanisa pepeso, ba arini pu tanisa Maṉauru si kekeṉoṉo gua e Karisito, sapu tana Maṉauru.
49Kekeṉoṉo gua sapu tagoa gita sa kinehana Adama sapu tana pepeso, si gua tugo sapu kaqu tagoa tugo gita sa kinehana e Karisito sapu tana Maṉauru.
50Kasa tasiqu, sapu gunia rau si guahe: Sapu sa tinoa tini, pu ta tavetae masa, na ehara, si lopu boka nuquru pa Butubutu Baṉara te Tamasa. Sa tini sapu kaqu muzi, si lopu boka somana tagoa sa tinoa hola.
51Mi avosia sa ginugua tomena hie: Sapu lopu kaqu ele mate beto si gita doduru, si kaqu ta hobe beto si gita.
52Kaqu guana matapuri mo sa mata pana ta ivu sa buki vina betobeto, meke kaqu tava turu pule pa tinoa hola saripu matedi. Meke gita pu korapa toada si kaqu ta hobe.
53Ura sa tini sapu muzina si kaqu ta hobe na tini toa holana. Sa tini pu boka mate si kaqu ta hobe na tini pu lopu boka mate.
54Pana ta evaṉa sapu sa tini muzina si ta hobe na tini toa holana, si kote tava gorevura gua sapu ta kubere, sapu guahe: “Bokaboka si gita pana murimuri taloa sa minate,” gua.
55Meke gua pule hie: “Minate, avei sa mua ṉiniraṉira? Avei sa mua ṉiniraṉira pude variva matagutu?” gua.
56Sa ṉiniraṉira pude variva matagutu tana minate si na sinea. Meke sa ṉiniraṉira tana sinea si na Tinarae te Mosese.
57Ba mada zama leana koasa Tamasa, sapu ponini gita sa minataqara koe Zisu Karisito sa nada Baṉara.
58Ke gua asa, kasa tasiqu, mi soto va ṉiṉira, mamu turu va nabu. Mi va tupiti puleni gamu pa ninabuluna sa Baṉara. Sina gilania mia gamu sapu lopu gua hoboro mo sari na mia tinavete, pa korapa mia ninabuluna Sa.
