1Avoma kaetama nahavigaya kea tamahapaigahugi haviho. Nago kanomoa anea ali oatesiana kanaleya huno maigahie.
2Maigahianagi amaugafa age hamaye huya kumai he yamoa ala nehiafe mukia vemoya aneamia maitele hisigeya anemoya veamia maitele hisie.
3Alavemoya nehaya yana vemoa aamona “Aao.” hu oateno amoa ania huno anauamona “Aao.” hu oatesie.
4Amo augafa agaia augafa omalenegi anauamo yagai-mainea augafa hane. Ania huno vemo augafa agaia augafa omalenegi aamo yagai-mainea augafa hane.
5Naa humaineafe vemoga akamoene humo kavafena “Aao.” hu oategeno amoga anaukamoene humo kavafena “Aao.” hu oato. Nagote tokaetana mainetana tanakesa havitana “Osi kana kanoa humo kavala ohutaa afaa mainetaa nunamuna hugahue.” hutana hisaana kanale hugahianagi mukia kanafina ve alave humo kavala oataleho. Atalesaana Satania ayelana-vataga hinagetana alu veleene alu ateene age lanahaye hu yafenagi osia maigetana hio.
6Mage huna nehua kea nagainia mani kea nehugi Anumaya Koti kahegi kea nohue.
7Nagi nagainige mainena ama oalinoa yama huya mukia vayala maisaya yafe nenahaiyanagi Anumaya Kotia agaia alua lua mai yana nagoke nagokemogatina tamigeta tahaote tahaote auavate nemaune.
8Neyavene munanene keto anenefe mani kea nehue nagayama ama oalina mainoa avamete huya maisayana kanaleya hugahie.
9Hugahigi age hamayema hisaya yatela yagaisaya tokiyaamima omalesiana ata lamale-yafenagi anea alitesageya vea alisageya hisae.
10Alavemogatama kahegi kea, nagainia nagesafitila nohugi Anumayamo humainea kea tamahapaigahue. Anemogatama vetamia oamataletama kanaleya hutama maiho.
11Maigahayanagi vetamima amataletama vinutamahena alu velela omaiho. Afaa omaisaya tamakesa hisigetama etetama vetamile etama nagoke tamaipale emaiho. Vemogatama atamimona tamakaitamia hu oamateho.
12Nagoamogatamihena Anumayamoa ohunea kea nagainia mage nehue. Yisasite ametiti humainesia kanomoa Anumayamote ametiti nohisia amoa neveenema maisia agesama havisigenoa nevea “Nenataleka vuo.” huno oataleno.
13Yisasite ametiti hu-mainesia amoa Anumayamote ametiti nohisia velema mainesigeno ani vemoa aamoene maisia agesama havisigenoa “Nenataleka vuo.” huno nevena hu oateno.
14Nagi Yisasite ametiti hu-mainesia amoa Yisasite ametiti nohisia neveenema maisiana ailokaeana maisaa yamoa oniyaagela ohunegi ani vemoa Anumaya Koti kema havisia yafe alu aotage kano maine. Yisasite ametiti hu-mainesia vemoma Yisasite ametiti nohisia aenema maisiana ailokaeana maisaa yamoa oniyaagela ohunegi ani amoa Anumaya Koti kema havisia yafe alu aotage ane maine. Anumaya Koti aufima alu aotage veatalama omaisaana nafaneamimoya ania huya oniyaagela haleasinagi tamage huya Anumaya Koti kema havisaya yafe alu aotage nafaneyaga maigahae.
15Mainageno Yisasite ametiti nohia api vefi atalesayana afaa atalegahae. Atalesayana Yisasite ametiti hunesia veanefi mainaa nofila ago aigalu hetalegeya afaa mainae. Anumaya Kotia falu huta maisunafe ke higeta agaitega emainone.
16Yisasite kametiti hu-mainana amoga agaiene maineka aya hisanageno anaukamoa agua aiyahae hinageno Anumaya Kotia agu amena aligatisio? huka kagaya ohavinane. Yisasite kametiti hu-mainana kanomoga akamoene maineka aya hisanageno akamoa agua aiyahae hinageno Anumaya Kotia agu amena aligatisio? huka kagaya ohavinane.
17Anumaya Kotia mukia veala noma maisaya yana fako huno amamineanagitama mukiamogatama Anumayamoa hapali-lamatenea yapi maiho. Mani kea Anumayamo anagala alule alule mo hamapai-mainogi haviho.
18Anumayamoma hapalimatenea kanafina nagoa Yuta vayamoya amaugafa taga hu-malenaya amafugula hanegeya eteya ani amafugula aye hananeya fala okisae. Nagoa vayamoya Anumaya Kotia hapali-matenea kanaleti amaugafa taga ohunaya vayamoya menia laga ohisae.
19Taugafa laga nehaya yano taga ohunaya yano ani tole yamoa afa ya hanegi Anumaya Koti kema havita akave malesuna yana kanale yanagino aepaa hane.
20Nagi mukiamogatama Anumaya Kotia agoma hapali-lamatenea kanafina no maiyatamia oataletama nagoene anile maiho.
21Anumayamoa hapali-lamatenea yupa nofipi mainetama miya oalisaya aliya nealitama mainageno ani aliyana afaa aliho. Aligahagi kava kanotamimoa “Menia nofila huotamategahugi afaa lamatalegahue.” huno hisigetama muse nehutama afaa ugahae.
22Anumayamoa hapali-lamatenea yupa nofipi mainetama miya oalisaya aliya nealitama Anumayatimoene ailokaetama mainayafe Anumayamoa kefo yatamimoma alino nofi hulamatenefitila ago alino kalu he-taleneafe nofipina nagoene omainae. Omainagi nagoa veala afaa mainageno Anumayamoa hapali-lamateneafe Kalaisia miyana oalisia aliya veanea tamage hutama maigahae.
23Anumaya Kotia ala miyateti miya hu-lamategetama agai veane mainagi ma mopafi veamogami aliya veanea omaisae huna nehue.
24Nafunagana-gatama Anumayamoma hapali-lamatenea kanafina no maiyatamia oataletama nagoene Anumaya Kotia tamakaiene mainesigetama “Hai mainone.” hutama maiho.
25Anumaya Kotia kalagi ainategena tamagegeya hisua kanogina nago kea hugahe hue. Anumayamoa mani kahegi kea ohunegi nagaya nagesafiti nehue. Vene ofaenesaya munanene anene ofaenesaya veyagahe nehue.
26Meni kanafina tusia kana yana falote nehiafe nagesa mage huna nehavue neyavene munaneyagaene mainaya avamete hutama maiho.
27Nagi ama ago alitenesana vemoga akamofena “Kataloe.” huka hu oato. Ama oalinesana vemoga anea oalio huna nehue.
28Nehuanagi ama ali-tenukahena kefo yana omaleneanagika afaa aligane. Vene ofaenesaya munanemoya vele maisayana kefo yana omalenegi ma mopafi mainesaageno tanakaipina kasagoya kana yamo falote huyafenagina mani kea nehue.
29Nafunagana-gatama ma mopamoa aupa kanafi hano hisia yafe meni kanaleti aepa hetama ama atenesia kanomoa aamofena agesa ohavino aama omai kano kana huno maisie huna nehue.
30Nagoamoya avima neatesaya veamoya osi kanoa avia ateho. Musema nehisaya veamoya osi kanoa musena hiho. Afenoamima miya nehisaya veamoya oali vea kana huya maiho.
31Mama mainona mopa aupa kanafi fanane hugahigi mopafi aliyama nealisaya veamoya mani mopale yafekeyana amakesa havi havi huya omaisae.
32Ma mopale yafema tamakesa kumoma haya yafena nagaila nonahaiye. Ama oalino mainea kanomoa Anumayamona haisia yafeene aliyamaaene agesa havi havi huno nemaiye.
33Nemaiyanagi aama mainea kanomoa ma mopafi yafena, aamoa musema hisiafene agesa havi havi huno nemaiye.
34Nago kaiyaga Anumayamofena agesa nehavino nago agesamoa aamofena agesa nehavianagi keto anene vele ounaya munanene Anumayamo aliyafekeya amakesa haviya “Mukia taugafaene taguaene Anumayamona alu aotage nomaa hane.” huya kava yagaiya mainayanagi vele mainaya anemoya anauamimoya musema humatesayafene huya mopafi yafe amakesa nehaviye.
35Mani kemoa katilelamatesua kea nohugi tamaya hisuafe nehue. Kanaleya hutama Anumayamofena tamakesa havi havi hutama nago yamo tamavayu huno atifi mafi ohisie huna nehue.
36Nago kanomoa hage-malenesia aamofena hagoteno “Afaa tokaetaa omaigahue.” huno huteno haenagaa tusi haye hisigeno “Kanale kavala hu noatoe.” huno haisia kava huno ani munala alitesie. Alitesiana kefo yana ohugahie.
37Nago neyamoa agua amino hage-malenea aamofena “Anumayamo aliya alisuafe afaa aote maigahue.” huno agesa haviteno augafa age haye hisia agu agesa hinageno kanaleya huno kava yagaino “Afaa aote maigahue.” hisiana kanale kava hugahie.
38Ani yafe nago kanomoa hage-malenesia aama alitesiana kanale kava nehianagi nago kanomoa hage-malenesia aama ali oatesiana tusia kanale kava hugahie.
39Aneyaga velema faitesageno anauamoma ofalino afaa mainesigenoa nagopi mai hapaino maineno amoa ataleno alu vele ovisie. Anauamoma falitesigenoma “Alu kanole maigahue.” huno hisiana kanale hugahianagi Anumayamoene mai-lokaeno mainesia vea alisie.
40Aligahianagi nagaya nagesa havuana afaama maisiana tusia muse hugahie huna nehue. Manima hua kea Anumayamo Avamumo nahapaigena nehue.
