1 Kings 7:13-35

¹³Me mol’og Solomon ni Pilung nge yib be’ ni pumo’on ni Huram fithingan, ni be’ nib salap i toy ya’an ban’en nga pa’ nma par u lan fare binaw nu Tyre, mab salap i ngongliy bogi ban’en ko wasey ni bronze.

¹⁴Ma chitamngin nike yim’ e ku be’ nu Tyre, ma ki immoy nreb e salap ni i ngongliy bogi ban’en ko bronze; ma chitiningin e be’ ko ganong rok Naftali. Huram be’ nib llowan’ ma ke yo’or bogi maruwel nga pa’ay nike ngongliy. Me pining e kefel’ ngak Solomon ni Pilung ko pong nike tay ngak ni nge milfan urngin e pi maruwel ko wasey ni bronze ngak.

¹⁵Me n’uf Huram l’agruw i duga’ ni bronze, nra reb ma rliw nge medlip e fit tolngin ma ragag nge meruk e fit ga’ngin lukngun, ngalang u langan e mab ko fare Tempel.

¹⁶Miki ngongliy ko bronze l’agruw yang i ban’en ni ngan tay nga p’ebugul fagal duga’, nra bang ma medlip nge baley e fit tolngin.

¹⁷Ma p’ebugul fagal duga’ e ke nunuwnag ko chen ni kan lifith ni bod e nug

¹⁸nge ya’an l’agruw thal i wom’ngin e pomegranate nni ngongliy ko bronze.

¹⁹Fagal yang i n’en nni ngongliy e ni fal’eg ni bod ya’an e floras ni lily, ma nel’ e fit tolngin,

²⁰me tay nga daken bangi ban’en nib lulbuy ni bay nga daken fare nunuw ni chen. Ma 200 e ya’an i wom’ngin e pomegranate ni l’agruw thal nib liyeg reb nge reb fa galyang i n’en ni bod ya’an e floras ni lily.

²¹Me tay Huram e gal ley i duga’ ni bronze ney u mit e mab ko fare Tempel: bin ni bay nga ba’ ni yimuch e fithingan e Jakin ma bin bay ko lel’och e fithingan e Boaz.

²²Ma fagal yang i n’en nni ngongliy ni bod ya’an e floras ni lily e bay u p’ebugul fagal duga’. Ma aram me lebug e maruwel ko duga’.

²³Me ngongliy Huram ba teang nib lulbuy ko wasey ni bronze, ni medlip nge baley e fit tom’arngin, ma ragag nge lal e fit ga’ngin radan u barba’ nga barba’, ma aningeg i ragag nge lal e fit ga’ngin lukngun.

²⁴Ma mirichren e re teang nem e ke nunuwnag ko gourd nib bronze, ni kan ngongliy nib peth ko fare teng.

²⁵Re teang ney e bay u daken keru’ ragag nge l’agruw i ya’an e garbaw ni pumo’on nib bronze ni yad ba sap nga orel, ra dalip i yad ma ta’bang e yad ba sap ngay.

²⁶Ma re teang nem e dalip e inch duba’gin. Ma merichlen e bod mirichlen ba kap, nib bug nga wuru’ ni bod ba floras ni lily nike puf. Re teang ney e ra sug ma gonap’an e 10,000 e galon.

²⁷Miki ngongliy Huram ragag i cart ni bronze; ra reb ma nel’ e fit n’umngin, ma nel’ e fit radan, ma aningeg nge baley e fit tolngin.

²⁸Ni ngongliy e pin’ey nga yungi palang ni ta’reb n’umngin nga radan, ni chamay nga ta’bang,

²⁹ni bay ya’an e layon, nge garbaw ni pumo’on, nge kerubim riy; mu daken ngu tanggin fapi layon nge garbaw ni pumo’on e bay ya’an bogi ban’en riy nib chichiygog.

³⁰Ra reb fapi cart ma bay aningeg e tayapyap riy ni bronze ma kub bronze e axles riy. Aningeg i tabthung nem e bay e wasey riy ni bronze ni tagil’ e dabiy; ma pi tagil’ nem e kan nununag nga ya’an bogi ban’en nib chichigog.

³¹Bay ban’en ni bod bbachel nib ga’ u daken ni fen fare dabiy. N’umngin ngalang e ragag nge meruk e inch nib tolang ko fare cart ma medlip inch nga but’ nga langgin fare cart. Ma bay ya’an bogi ban’en ni kan ker ngay nib liyeg.

³²Fapi tayapyap riy e ra reb ma rliw’ nge lal e inch tolngin u but’; ni bay nga tanggin fapi cart, ma fapi axles nib bronze e peth ko fapi cart.

³³Fapi tayapyap e bod ay e chariot; pi axles, nge pi rim riy, nge pi spoke riy, nge lukngun e pi tayapyap nem e go’ gubin mab bronze.

³⁴Ra reb fapi cart ma bay aningeg e rumog ni gelngin u tabthungen u but’, nib peth ngay.

³⁵Ra reb fapi cart ma bay bangi ban’en ni mereb e inch radan nike liyeg marichlen; ma fapi rumog ni gelngin nge yuyang i palang riy e ba peth ko fare cart.