1 Kings 18:8-38

⁸Me fulweg ni ga’ar, “I gag Elijah. Mman ngamog ngak fare pilung ni masta rom ni gu bay u roy.”

⁹Me fulweg Obadiah ni ga’ar, “Be mang e kug bucheg ni kam leamnag ni ngam teg nga thathren e riya’ nge thang Ahab ni Pilung e pogofan rog?

¹⁰Gu be micheg u p’eowchen SOMOL ni be par nib fos, ni ir e Got rom, ni en ni pilung e ke gayem u gubin e nam u fayleng. Ma yira yog ngak u reb e nam nda mmoy u rom me yog ni pilung ko fare nam e ngari micheg ndawor ni piri’egem u rom.

¹¹Ere mog, ga ba’adag ni nggu wan gguy nggog ngak ni ga bay u roy?

¹²Fa’anra gu wan me yib SOMOL nge fekem ngabang ndariy be’ ni manang, me di’in? Fa gu wan gog ngak Ahab ni ga bay u roy me yib ma de piri’egem, ma nge thang e pogofan rog. Dab mpag talin ni ug par ni bay madgun SOMOL u wun’ug ma gub yul’yul’ ngak ni ka nap’an ni gub bitir ke mada’ ko chiney.

¹³Mog, dawor mu rung’ag ni fa ngiyal’nem ni be thang Jezebel e pogofan ko pi profet rok SOMOL ma ra’ay i yad e gu mithag ngalan e yiy ni yad l’agruw ulung nra reb e ulung ma wugem, mu ug pi’ garad nge garbod rorad?

¹⁴Ere uw rogon ni kamog ngog ni nggu wan gu weliy ngak e en ni pilung ni ga bay u roy? Ya mmudugil nra thang e pogofan rog!”

¹⁵Me fulweg Elijah ni ga’ar, “Nggu micheg ngom u fithingan SOMOL ni Gubin ma Rayag Rok ni gag e tapigpig rok, ni bay gu m’ug ngak e en ni pilung e daba’.”

¹⁶Me yan Obadiah ngak Ahab ni Pilung nge weliy ngak, me yib Ahab ni ngar mada’gow Elijah.

¹⁷Fa’ani guy Ahab Elijah me ga’ar ngak, “Mog, ri gur fa’anem ni ba ga’ e gafgow ni kam tay ngak yu Israel?”

¹⁸Me ga’ar Elijah, “Gathi gag e kug gafgownag yu Israel, ya gur, ni gur nge chitamam. Dakumur folgow ko thin rok SOMOL ma gimew be tayfan fapi liyos ni ya’an Baal.

¹⁹Chiney e ngamog ngak urngin e girdi’ nu Israel ni nggu mada’gad ko burey ni Karmel. Ngam pining fare 450 i profet rok Baal nge fare 400 i profet rok Asherah, ni Jezebel ni le’engim e be pi’ garad.”

²⁰Me ulunguy Ahab urngin piyu Israel nge fapi profet rok Baal ko burey ni Karmel.

²¹Me yan Elijah ngorad me ga’ar, “Uw n’umngin nap’an ni ngam pired mfin gimed duwgiliy lanin’med! Fa’anra SOMOL e ir Got, mi gimed fol rok; ma fa’anra Baal e ir e Got, mi gimed fol rok!” Me par e girdi’ nda rogned ta’ab bugithin.

²²Me ga’ar Elijah, “Kemus ni gag e kug magey ni profet rok SOMOL, machane 450 e pi profet rok Baal.

²³Ngan fek l’agruw e garbaw ni pumo’on i yib; mi ni pag fapi profet rok Baal ngar feked reb ngar li’ed ngar th’eth’abed ngar ted nga daken e l’ud, machane dab rup’ed e nifiy ngay. Ma ku aram e n’en ni bay gu rin’ ko fa bin nike magey e garbaw.

²⁴Me meybil e pi profet rok Baal ngak, mu gu meybil ngak SOMOL, ma arorow nra pag e nifiy ngay, ni aram e ke fulweg taban e meybil, e ir Got.” Me tolul e girdi’ ni aram e kar pininged e kefel’ ngay.

²⁵Me ga’ar Elijah ngak e pi profet rok Baal, “Gimed e gimed ba yo’or, ere gimed e som’on ni ngam feked reb e gal garbaw nir ngam ngongliyed rogon. Mi gimed meybil ngak e biromed e got, machane dab mup’ed e nifiy ko l’ud.”

²⁶Miyad fek fare garbaw ni ka ni fek i yib ngorad ngar ngongliyed rogon, miyad meybil ngak Baal nge mada’ ko misiw’. Miyad tolul ni lungurad, “Baal, mfulweg taban e meybil romad!” Miyad par ni yad be churu’ ma yad be liyeg fare altar ni kar ubunged, machane de fulweg Baal taban e meybil rorad.

²⁷Fa’ani misiw’ me par Elijah ngi i moning ngorad ni be ga’ar, “Mu ga’ niged lammed ko meybil! Ya sana bay ban’en ni be leamnag nib gel, fa ke yan ngabang ni nge pithig rogon, ara ke yan ko milekag! Fa reb e be mol ndabisiy ni ngam puged!”

²⁸Me meybil fapi profet ni kar ga’ niged lamrad, ma yad be rasey dowrad ko saydon nge yar nrogon ni yad ma rin’ ngar malukgad ko racha’.

²⁹Miyad par ni yad be non ni ba ga’ lamrad nge thig e yal’; machane de yib e fulweg ko meybil rorad, ma da nrung’ag ba lam ni non.

³⁰Me ga’ar Elijah ngak e girdi’, “Mu chuchugurgad ngog,” miyad mu’ulung nga charen ni karon’ed nga longob. Me tabab Elijah i ubung fare altar rok SOMOL ni fa’an nni buthug.

³¹Me fek ragag nge l’agruw i malang, nra reb ma fan ngak fare ragag nge l’agruw i ganong ni yad e pi’in owchen Jakob, ni fare mo’on ni tunguy SOMOL Israel ngak.

³²Pi malang nem e ubung bayay fare altar rok SOMOL ngay. Me ker wol’ e ran nib liyeg fare altar nra taw gonap’an aningeg e gallon e ran ngay.

³³Me tay e l’ud nga daken fare altar, me th’eth’ab fare garbaw nge tay nga daken fapi l’ud.

³⁴Me ga’ar, “Mu suguyed aningeg e rume’ ko ran ngam pu’oged nga daken e pi ufin e garbaw nir ni ngan pi’ ni maligach nge pi l’ud nir.” Miyad rin’, me ga’ar, “Kum rin’ed bayay ni bod fa yanem.” Miyad rin’ ni bod nike yog. Me ga’ar, “Ku bayay.” Miyad rin’.

³⁵Me yib e ran u daken e altar nga but’ nge suguy fare wol’ e ran nib liyeg fare altar.

³⁶Fa’ani taw ko ngiyal’ ni yima pi’ e maligach riy ko mithig yal’, me yib Elijah ko fare altar nge meybil ni ga’ar, “SOMOL ni gur fare Got rok Abraham nge Isak nge Jakob, mmicheg e chiney ni gur fare Got rok yu Israel, me gag e tapigpig rom ma urngin e pin’ey e kug ngongliy ni bod ni kamog ngog.

³⁷SOMOL, mfulweg taban e meybil rog, wenig ngom, mfulweg, ya nge nang e pi girdi’ ney ni gur SOMOL e gur e Got, ni gur e ngam fulwegrad ngom.”

³⁸Me pag SOMOL e nifiy u lang ko fare altar, me urfiy fare maligach, nge fapi l’ud, nge fapi malang, nge gowel e but’ me m’ay fapi ran u lan fare wol’ e ran nib liyeg fare altar.