1. King 18:8-38

⁸Elias a pälüeni, “Ewer, ngang Elias. Kopwe feila o üreni om samol pwe ngang Elias üa nom ikei.”

⁹Iwe, Opatia a üra, “Met üa tipis ren, pwe kopwe fangelong ngang noum chon angang lepöün Ahap pwe epwe nieila?

¹⁰Mwo manauen ewe Samol mi Lapalap om we Kot, esap wor eu mwichen aramas ika mwü, ia ai we samol esap tinala aramas ie pwe repwe küttok. Nge lupwen ewe mwichen aramas ika mwü ra apasa pwe kosap nom, Ahap a arianiir pwe repwe akapel are a let pwe rese künok.

¹¹Nge iei ka apasa pwe üpwe feila o üreni ai we samol pwe ka nom ikei.

¹²Ina epwe fis pwe lon ewe otun üpwe feila senuk, Ngünün ewe Samol mi Lapalap epwe uweekela ngeni eu leni ngang üsap silei. Iwe, lupwen üpwe üreni Ahap pwe ka nom ikei, nge i esap tongeni künok, epwe nieila. Nge ngang noum chon angang üa fokun meniniti ewe Samol mi Lapalap seni leküküni.

¹³Ifa usun, esap wor eman a ürenuk en ai samol mine üa föri, lupwen Isipel a popuetä le niela nöün ewe Samol mi Lapalap kewe soufos? Ifa usun, kosap rong pwe üa aopala ipükü mwän me lein nöün ewe Samol mi Lapalap kewe soufos, akalime lon eu föimw, üa pwal amongöniir pilawa o aünüür koluk?

¹⁴Nge iei ka apasa pwe üpwe feila o üreni ai samol pwe ka nom ikei. Iwe, Ahap epwe nieila.”

¹⁵Mürin, Elias a üra, “Mwo manauen ewe Samol mi Unusen Manaman, ewe Kot üa angang ngeni, üpwe fokun pwäriei ngeni Ahap ikenai.”

¹⁶Iei mine Opatia a feila pwe epwe churi Ahap o asile ngeni ekei kapas. Mürin, Ahap a feila pwe epwe churi Elias.

¹⁷Iwe, lupwen Ahap a küna Elias, a üreni, “Iei ka war, en ätewe mi atolonga Israel lon feiengau?”

¹⁸Nge Elias a üreni, “Sap ngang üa atolonga Israel lon feiengau, ngei en me chon leimwen semom, pun oua aleasolap ngeni än ewe Samol mi Lapalap kewe allük o fel ngeni ekewe uluulun anü Paal.

¹⁹Iei kopwe titi o amwichafengenieto rei chon Israel meinisin me won ewe chuk Karmel. Iwe, repwe pwal feito ekewe föpükü lime soufos nöün ewe anü Paal, pwal ekewe föpükü soufos nöün ewe anüfefin Asera mi mongö seni än Isipel chepel.”

²⁰Iwe, Ahap a titi ekewe aramasen Israel meinisin, a pwal amwichafengeni ekewe soufos me won ewe chuk Karmel.

²¹Nge Elias a ütä fän mesen ekewe aramas meinisin o üra, “Ifa ükükün fansoun ämi oupwe tipemwaramwar won ruu ekiek? Are ewe Samol mi Lapalap i Kot, oupwe fel ngeni, nge are ewe anü Paal i Kot, oupwe chök fel ngeni.” Iwe, ekewe aramas resap pälüeni ngeni och kapas.

²²Mürin, Elias a üreni ekewe aramas, “Ngang echök üa chüen manau me lein nöün ewe Samol mi Lapalap kewe soufos. Nge mi wor ükükün föpükü lime soufos nöün ewe anü Paal.

²³Repwe emwenato rech ruoman ätemwänin kow. Iwe, nöün Paal kewe soufos repwe filätä eman ätemwänin kow fän iter, repwe pökükisietiu o anomu ekewe kinikin won ewe mwüch, nge resap fisi. Iwe, ngang üpwe amolätä ewe aruomanün ätemwänin kow o anomu won ewe mwüch, nge üsap pwal fisi.

²⁴Iwe, nöün Paal kewe soufos repwe iotek ngeni ar we Kot, nge ngang üpwe iotek ngeni ewe Samol mi Lapalap. Iwe, ewe Kot mi pälüeni ren ekkei, i wesewesen Kot.” Iwe, ekewe aramas meinisin ra apasa pwe ra tipeeu ngeni.

²⁵Mürin, Elias a üreni nöün ewe anü Paal kewe soufos, “Oupwe akomwen filätä eman ätemwänin kow o amolätä, pun ämi oua kon chomong. Oupwe iotek ngeni ämi we kot, nge ousap fisi ewe mwüch.”

²⁶Iwe, ra angei ewe ätemwänin kow ra emwenato rer o amolätä. Mürin ra iotek ngeni ewe anü Paal seni lesosor tori leoloas o kökkö, “Paal, kopwe aüseling o pälüenikem.” Nge esap wor och möngüngü, esap pwal wor eman a päpälü. Iwe, ra pworukfetal pwelin ünükün ewe rongen asor ra senätä.

²⁷Nge leoloas Elias a ämängaueer o üreniir, “Oupwe leüömong le kökkö, pun i eman kot. Eli a chök ekekiek ika atapwalapwal, ika a saifetal, eli a möür, nge ämi oupwe apwökü.”

²⁸Iei mine ra leüömong le kökkö, ra pwal akinaseer ren ketilas me siles usun ar örüni, tori char a süküwu.

²⁹Iwe, seni ewe oloasan tori fansoun asoren lekuniol ra akürang o sarawaraufetal, nge esap wor och möngüngü, esap wor eman a päpälü ika aüseling.

³⁰Mürin, Elias a üreni ekewe aramas meinisin, “Oupwe kaneto rei.” Iwe, ekewe aramas meinisin ra kaneto ren. Elias a senisefälietä än ewe Samol mi Lapalap rongen asor mi katala.

³¹A angei engol me ruoföü fau ükükün iteiten ekewe engol me ruu ainang mi iteni iten nöün Jakop kewe mwän, ätewe ewe Samol mi Lapalap a aita ngeni Israel.

³²Iwe, a eäni ekei fau le senätä eu rongen asor fän iten ewe Samol mi Lapalap. A tuw eu warawar pwelin ünükün ewe rongen asor ükükün masouan ina epwe ükükün rüanü kalon koluk.

³³Iwe, a atettelöchü ewe mwüch, a pökükisietiu ewe ätemwänin kow o iseni won ewe mwüch. Mürin a üra, “Oupwe alölöü rüanü rumen koluk o ninätiu won ewe asoren kek pwal won ewe mwüch.” Iwe, ra föri.

³⁴Mürin a üra, “Oupwe föri fän aruuan.” Iwe, ra föri fän aruuan. A pwal üra, “Oupwe föri fän aülüngatin.” Iwe, ra föri fän aülüngatin.

³⁵Iwe, ewe koluk a pufetal pwelin ünükün ewe rongen asor, pwe ewe warawar a pwal uretä ren koluk.

³⁶Nge lupwen a tori fansoun asoren lekuniol, ewe soufos Elias a kan ngeni ewe rongen asor o iotek, “Ai Samol mi Lapalap, än Apraham, Isaak me Jakop we Kot, kopwe pwäri ikenai pwe en ewe Kot lon Israel, nge ngang noum chon angang. Kopwe pwal pwäri pwe üa föri ekei mettoch meinisin fän alom.

³⁷Kopwe pälüeniei, ai Samol mi Lapalap, kopwe pälüeniei, pwe ekei aramas repwe silei pwe en Kot ai Samol mi Lapalap, repwe pwal silei pwe en ka akulusefäli leluker.”

³⁸Mürin, ewe Samol mi Lapalap a tinätiu ekkei, a kenala ewe asor, ewe mwüch, ekewe fau, ewe pwül. A pwal apwasätä ewe koluk mi nom lon ewe warawar.