1 KING TAUDIA 22:6-48

⁶Unai dainai Ahaba ese peroveta taudia ia haboua, idia be tau 400 bamona. Idia ia nanadaia, ia gwau, “Ramoto Gileada do lau tuari henia, o do lau tuari henia lasi?” Peroveta taudia idia haere, idia gwau, “Oi lao, oi tuari henia, badina Lohiabada ese kwalimu oi dekenai do ia henia.”

⁷To Iehosapata ia gwau, “Lohiabada ena peroveta tauna ma ta iniseni ia noho lasi, a, vadaeni do ita nanadaia diba, a?”

⁸Ahaba ia haere, ia gwau, “Tau ta do noho, ia dekena amo Lohiabada ena hereva ita tahua diba, iena ladana be Mikaia, Imila ena natuna. To lau ese ia lau badu henia noho, badina ia be nega ta gau namona lau dekenai ia peroveta lasi, to gau dikadia sibona.” To Iehosapata ia gwau, “Oi ese unai bamona oi hereva be namo lasi.”

⁹Vadaeni Israela ena king ese iena hesiai tauna ta ia boiria, ia gwau, “Mikaia Imila do oi hakaua mai haraga.”

¹⁰Unai neganai unai king ruaosi Ahaba bona Iehosapata, be edia terona dekenai idia helai, mai edia king dabua danu. Uiti kwadia gabuna dekenai idia helai, Samaria hanua ikoukou edia badibadinai, bona peroveta taudia ibounai ese idia edia vairanai idia peroveta.

¹¹Vadaeni, Sedekaia Kenana ese auri doadia ia karaia, bona hereva ia gwauraia, ia gwau, “Lohiabada be ia gwau, inai gaudia dekena amo oi ese Suria taudia do oi gwadaia, ela bona idia oi hadikaia ore.”

¹²Peroveta taudia ibounai danu ese unai bamona idia peroveta. Idia gwau, “Ramoto Gileada do oi tuari henia, bona do oi kwalimu, badina be Lohiabada ese oiemu siahu henunai do ia atoa.”

¹³Hesiai tauna be Mikaia boiria totona ia lao, vadaeni hesiai tauna ese Mikaia ia hamaoroa, ia gwau, “Oi kamonai, peroveta taudia edia hereva be tamona vadaeni, idia gwau Ahaba be do ia kwalimu. Namo oi ese edia hereva oi durua.”

¹⁴To Mikaia ia gwau, “Mauri Lohiabada ena ladana dainai, lau gwauhamata inai, lau ese Lohiabada ena hereva lau dekenai sibona do lau hamaoroa.”

¹⁵Mikaia be king ena vairana dekenai ia ginidae, vadaeni Ahaba ese ia nanadaia, ia gwau, “Mikaia, ai ese Ramoto Gileada be do ai tuari henia o lasi? Mikaia ia haere, ia gwau, “Oi lao, kwalimu do oi davaria, badina be Lohiabada ese oi do ia durua.”

¹⁶To king Ahaba ese ma Mikaia dekenai ia hereva, ia gwau, “Lau dekenai oi hereva Lohiabada ena ladana neganai hereva momokani sibona do oi gwauraia. Nega hida unai bamona oi dekenai do lau oda?”

¹⁷Mikaia ia haere, ia gwau, “Lau ese Israela tuari taudia ibounai lau itaia, ororo dekenai idia heau lao, heau mai, mamoe naria tauna lasi bamona. Vadaeni Lohiabada ia gwau, ‘Inai be biaguna lasi taudia, idia ta ta ese edia ruma dekenai do idia lao namo, mai maino danu.’ ”

¹⁸Ahaba ese Iehosapata ia hamaoroa, ia gwau, “Oi lau hamaoroa, ani, ia be hereva namodia lau dekenai ia gwauraia lasi, to hereva dikadia sibona?”

¹⁹Mikaia ma ia gwau, “Harihari Lohiabada ena hereva umui kamonai: Lohiabada be iena terona dekenai ia helai lau itaia, bona guba ena aneru ibounai iena badinai idia gini noho, idiba kahanai bona lauri kahanai danu.

²⁰Lohiabada ese aneru ia nanadaia, ia gwau, ‘Daika ese Ahaba do ia koia, vadaeni do ia lao, Ramoto Gileada dekenai do ia mase?’ Aneru haida be hereva ta idia gwauraia, ma haida hereva ta.

²¹“Vadaeni lauma ta ia raka vaira, Lohiabada ena vairanai ia gini, ia gwau, ‘Lau ese do lau koia.’

²²Lohiabada ese ia nanadaia, ia gwau, ‘Edena dala dekenai do oi koia?’ “Lauma ese ia haere, ia gwau, ‘Lau be koikoi laumana do lau lao, Ahaba ena peroveta taudia edia uduna dekenai koikoi do lau atoa.’ “Lohiabada ia gwau, ‘Do oi koia, bona oiemu koikoi dekenai do oi kwalimu. Oi lao, unai bamona do oi karaia.’ ”

²³Bona Mikaia ese iena hereva ia hadokoa, ia gwau, “Inai bamona ia vara vadaeni. Lohiabada ese koikoi laumana oiemu peroveta taudia ibounai edia uduna dekenai ia atoa. Lohiabada ese hereva dikana oiemu latanai ia gwauraia vadaeni.”

²⁴Unai neganai peroveta tauna Sedekaia Kenana ia raka vaira, ia ese Mikaia ena vairana ia botaia, ia nanadaia, ia gwau, “Lohiabada ena Lauma be edena bamona lau ia rakatania, bona oi dekenai ia hereva, a?”

²⁵Mikaia ia haere, ia gwau, “Ruma ena lalona daiutu ta lalonai do oi raka vareai, do oi hunia totona. Unai neganai anina do oi diba.”

²⁶Vadaeni Israela ena king ese oda ia gwauraia, ia gwau, “Mikaia do umui dogoatao, Amono, hanua lohiana bona Ioasa, king ena natuna dekenai do umui abia lao.

²⁷Do umui gwau, ‘King Ahaba ia gwau: Inai tau be dibura ruma dekenai do umui koua, beredi bona ranu sibona do umui henia, ela bona mai mauri danu lau giroa mai.’ ”

²⁸Mikaia ia gwau, “Bema mai mauri danu oi giroa mai, vadaeni Lohiabada be lau dekena amo ia hereva lasi.” Ma Mikaia ia hereva, ia gwau, “Taunimanima ibounai e, lauegu hereva do umui kamonai namonamo.”

²⁹Vadaeni Israela ena king, Ahaba bona Iuda ena king, Iehosapata, be Ramoto Gileada dekenai idia lao.

³⁰Ahaba ese Iehosapata ia hamaoroa, ia gwau, “Lau ese lauegu toana do lau haidaua, vadaeni tuari lalonai do lau vareai, to oi ese oiemu king dabua do oi karaia.” Unai dainai Israela ena king ese iena toana ia haidaua, bona tuari lalonai ia vareai lao.

³¹Suria ena king ese iena kariota biaguna taudia 32 ia oda henia, ia gwau, “Taunimanima ta, maragina o badana, do umui tuari henia lasi, to Ahaba, Israela ena king sibona.”

³²Unai dainai kariota biaguna taudia ese king Iehosapata idia itaia neganai, idia laloa ia be Israela ena king, vadaeni idia giroa, ia dekenai idia heau, tuari henia totona. To Iehosapata be idia dekenai ia boiboi bada neganai,

³³idia itaia, ia be Israela ena king lasi, vadaeni idia tuari henia lasi.

³⁴To Suria tuari tauna ta ese diba ta ia pidia kava, Israela ena king Ahaba ena tuari dabua ena matuna maragina ta lalonai ia vareai, Ahaba ia gwadaia. Unai dainai Ahaba ese kariota ia haheaua tauna dekenai ia boiboi, ia gwau, “Bero lau davaria, kariota do oi hagiroa lou, tuari ena murimurinai lau do oi abia lao.”

³⁵Unai dina dekenai tuari be auka herea, bona king Ahaba be mai bero danu kariota lalonai ia helai. Iena kwarana be ia atoa diho lasi, to Israela taudia ese idia durua dainai, iena vairana be Suria taudia dekenai ia henia ela bona adorahi ia ore. Unai neganai ia mase, bona iena bero ena rara be kariota ena reirei dekenai ia heau diho.

³⁶Dina ia diho noho neganai, tuari orea lalonai tuari taudia haida be idia boiboi, idia gwau, “Umui ibounai emui hanua bona tano ta ta dekenai do umui heau lao!”

³⁷King Ahaba be unai bamona ia mase vadaeni, bona Samaria dekenai idia abia lao. Unuseni idia guria.

³⁸Iena kariota be Samaria ena gohu maragina dekenai idia huria, bona sisia ese iena rarana idia demaria. Unai gohu maragina dekenai be ariara hahine idia digudigu gabuna. Unai ibounai ia vara vadaeni, Lohiabada ese ia gwauraia guna hereva hegeregere.

³⁹Ahaba ena kara haida, iniseni idia torea lasi gaudia, iena noho ruma, elefante ena doana dekenai ia haginia rumana, bona hanua haida ia haginia, unai karadia ibounai be Israela Ena King Edia Sivarai Bukana lalonai idia torea vadaeni, ani?

⁴⁰Ahaba ia mase murinai, iena natuna Ahasaia be iena gabuna dekenai ia king.

⁴¹Ahaba, ia be Israela ena king lagani namba 4 lalonai, Iehosapata, Asa ena natuna, be Iuda ena king dagi ia abia hamatamaia.

⁴²Ia lohia hamatamaia neganai Iehosapata ena mauri lagani be 35, bona lagani 27 lalonai Ierusalema dekenai ia lohia. Iena sinana ena ladana be Asuba Silihi.

⁴³Iehosapata ena kara be iena tamana ena kara hegeregerena dainai, ia ese Lohiabada ena vairana dekenai kara maoromaoro ia karaia. To ataiai idia noho tomadiho gabudia be ia ese ia kokia lasi. Taunimanima ese edia boubou gaudia bona muramura mai bonana namo idia gabua noho, unai ataiai gabudia dekenai.

⁴⁴Iehosapata be Israela ena king danu maino idia karaia.

⁴⁵Iehosapata ena kara oredia, iena boga auka karadia bona iena tuari karadia be Iuda Ena King Edia Sivarai Buka lalonai idia torea vadaeni.

⁴⁶Iehosapata ese lebulebu taudia, dirava koikoi edia tomadiho gabudia dekenai ariara tatau bona ariara hahine ibounai, ia alaia ore. Badina iena tamana Asa ena nega dekena amo haida sibona idia do noho.

⁴⁷Unai neganai Edoma tano be mai ena king lasi. To Iuda ena king ese lohia tauna ta ia abia hidi, Edoma tano do ia biagua totona.

⁴⁸Iehosapata ese lagatoi badadia ia karaia, Opiri dekenai do idia lao, golo abia totona, to idia lao lasi, badina idia be Esiono Gebere dekenai idia makohia maragimaragi.