ẔWA 19:10-38

¹⁰Naž Pilaton' gože' Ḻe': —¿Bi žechebo', na' bi wḻoe'elo' neda' da' žono'? ¿Bi nnezlo' nzi' ḻo na'a wdá'a Le' ḻe'e yag kroze, na' nzi' ḻo na'a wsana' Le'?

¹¹Bechebe Jesusen', na' gože' ḻe': —Bi be nzi' ḻo no'o gono' chia' chela' bi bde Dios ḻo no'o yeḻa' wnná bia' na'. Che ḻen, bennen' bdie' neda' ḻo no'o nbága'že' ẕia ka le'.

¹²Ḻa' na'ze gónele Pilaton' wsane' Jesusen', san wžéžeya'agak benne' judío wnná bia' ka', na' wnnágake': —Cha' wsano' benne' ni, bi nžago' chawe' benne' Sésar, bennen' ẕnna bi'e dot yežlyó nga. No benne' žon kwine' benne' wnná bia', ẕži'e che benne' Sésar na'.

¹³Kate' benle Pilaton' da' ni, gože' ni'a ne'e ka' chejx̱í'gake' Jesusen', na' wži'e latje chie' gan ẕchi'a ḻaže'e, latjen' nzin' Ḻi'a Ga Ẕoagak Yej Blag Ka', na' ka nak diža' hebreo nzin' Gabata.

¹⁴Ža na' naken ža za' žin Lni Pasko', na' nak wawbíž. Naž Pilaton' gože' benne' judío wnná bia' ka', na' wnné': —Nga zoa bennen' ẕnna bi'e ḻe'e.

¹⁵Wžéžeya'agake' zižje, na' wnnágake': —¡Bete'! ¡Bete'! ¡Bde'e ḻe'e yag kroze! Pilaton' gože' ḻégake': —¿Ẕnnáblele neda' wdá'a bennen' ẕnna bi'e ḻe'e ḻe'e yag kroze? Beži'igak bx̱oz wnná bia' ka', na' wnnágake': —Bi zoa yetó benne' ẕnna bi'e neto'. Toze benne' Sésar ẕnna bi'e neto'.

¹⁶Che ḻen Pilaton' bdie' Jesusen' ḻo ná'gake', nich chejdá'gake' Ḻe' ḻe'e yag kroze. Naž béx̱wgake' Jesusen', na' bché'gake' Ḻe' na'le.

¹⁷Bžoj Jesusen' ga na', na' noe'e yag kroze chie', nich cheje' latjen' dan' nzin' Latje Che Žit Yichjžo, na' kan nak diža' hebreo nzin' Gólgota.

¹⁸Ḻo latjen' bdá'gake' Jesusen' ḻe'e yag krozen', na' bdá'gake' yechope benne' ḻe'e yag kroze ka' ga na'. Cheḻá'a weje zej de'e, na' Jesusen' de'e gachje ḻáwe'le gan da'gak chope benne' ka'.

¹⁹Pilaton' bseḻe'e to benne' bzoje' to da' bde'e ḻe'e yag kroze yichjle Jesusen', da' ẕnnan ki: “Jesús, benne' Nasaret, benne' ẕnna bi'e benne' judío ka'.”

²⁰Benne' zan, benne' judío ka', beḻgake' dižan', dan' naken gawze žoa'a yež gan bdá'gake' Jesusen' ḻe'e yag krozen', na' dižan' nyejwn ḻen diža' hebreo, na' ḻen diža' griego, na' ḻen diža' latín.

²¹Bx̱oz wnná bia' ka' chegak benne' judío ka' belyi'e Pilaton', na' wnnágake': —Bi wzojo': “Benne' ẕnna bi'e benne' judío ka'.” Bzoj ki: “Ḻe' wnné' nna bi'e benne' judío ka'.”

²²Beží'i Pilaton', na' gože' ḻégake': —Da' ba bzoja', to chi'ize bzojan'.

²³Kate' benne' ka' žjake' ḻo wdiḻe, beyóž bdá'gake' Jesusen' ḻe'e yag krozen', na' béx̱wgake' laže' da' gokwe'. Wléjgaken' tápele, na' goken to kwe' weje da' gota' che chégake'. Ḻezka' béx̱wgake' lažen' da' bx̱oa yen Jesusen', na' lažen' bi ndian, san naken to wḻize.

²⁴Naž benne' ka' žjake' ḻo wdiḻe, belyi'e ljéžgake' toe' yetóe', na' wnnágake': —Bi chogžon, san gakže chawe' kwejžo da' gak bian', nich nnezlžo nolžo gaken chežo. Ka' goken, bžin dan' nyejw ḻe'e yiche la'y, da' ẕnnan: Wdísgake' laže' nakwa' che chégake', na' che laže' chia' wléjgake' da' nak bian'. Ki bengak benne' ka' žjake' ḻo wdiḻe.

²⁵Gawze gan da' Jesusen' ḻe'e yag krozen' wnníta'gak no'le ka'. Zej nake' x̱ne'e, na' no'le bile x̱ne'e, na' Lia, ẕo'le Kleofas, na' Lia Madlen.

²⁶Kate' Jesusen' bḻe'ele' x̱ne'e, na' ḻezka' bḻe'ele' benne' wsedle chie', bennen' nži'ile', zoe' ga na', gože' x̱ne'e: —Nó'ledo', bwia ẕi'no' zoe' kwito' le'.

²⁷Naž gože' benne' wsedle chie' na': —Bwia, x̱no'o zoe' kwito' le'. Ḻa' ža na'ze benne' wsedlen' bchi'e ḻe' nich chejsóe' liže'.

²⁸Wdé na', dan' nnézkzele Jesusen' yógo'te ba goken, na' nich žin da' nyejw ḻe'e yiche la'y, wnné': —Ẕbiḻa' nis.

²⁹De to že'e ga na', da' yožen nop zichj. Naž to benne' žeje' ḻo wdiḻe besbise' to da' bḻol ḻen nop zichjen', na' bzoen' ḻaw to ya x̱til, na' bde'en žoa'a Jesusen' nich x̱open'.

³⁰Beyóž we'j Jesusen' nop zichjen', na' wnné': —Ba nakten. Naž bzechwe' yichje'. Bežojte be' nakkze', na' gote'.

³¹Naž, dan' nak ža za' žin Lni Pasko', na' dan' bi žaḻa' ga'ngak benne' gat ka' ḻe'e yag kroze ka' kate' nak ža la'y chégake', na' naken to ža la'y ẕente, che ḻen benne' judío ka' góta'yoegekle' Pilaton' yi'e benne' ka' žjake' ḻo wdiḻe, chejtíchjwgake' x̱kachjgak benne' ka' dá'gake' ḻe'e yag kroze ka', na' wetíngake' ḻégake' ḻe'e yag kroze ka'.

³²Che ḻen benne' ka' žjake' ḻo wdiḻe wbíga'gake' ga na', na' bdíchjwgake' x̱kachje benne' nežw, na' ḻezka' béngake' che yetó bennen' dá'ḻene' Jesusen' ḻe'e yag kroze.

³³Kate' bžíngake' gan da' Jesusen', bḻé'egekle' ba gote', na' bi bdíchjwgake' x̱kachje'.

³⁴Naž to benne' žeje' ḻo wdiḻe godwe' yag ntoche' chie' ḻe'el sina' Jesusen', na' ḻa' bžojte žen, na' nis.

³⁵Neda', Ẕwa, bḻe'ela' da' ni, na' ẕzoa lian', na' da' ẕnnia' naken dot da' li. Nnézkzela' ẕchaḻja' da' naken dot da' li, nich ḻezka' ḻe'e chejḻe'le che Jesusen'.

³⁶Ki goken, bžin da' nyejw ḻe'e yiche la'y, da' ẕnnan: “Bi gachjw nitó žit yoe'e.”

³⁷Yetó da' nyejw ḻe'e yiche ẕnnan ki: “Wíagake' bennen' godwe' Ḻe' yag ntoche'.”

³⁸Wdé gokgak yógo'te da' ki, Jwsé, to benne' yež Arimatea, benne' žónḻene' Jesusen' tẕen, san ngáche'ze dan' ẕžebe' benne' judío wnná bia' ka', wyeje', na' wnnable' Pilato we'e ḻe' latje yeké'e Jesusen'. Pilaton' bi'e ḻe' latje. Naž bḻa' Jwsén' gan da' Jesusen' ḻe'e yag krozen', na' beké'e Ḻe'.