ᤛᤣ᤺ᤰᤕᤢᤰᤔᤡᤒᤠᤜᤠ᤹ 18:13-24

¹³ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢ. “ᤁᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧ ᤛᤠᤶᤕᤥᤌᤡᤶᤏᤢ ᤔᤧᤴᤍᤱᤔᤏᤠ ᤛᤣᤘᤠ ᤆᤥ᤺ᤰᤔᤠ ᤔᤏᤠᤜᤠ᤹ ᤜᤢᤛᤢᤛᤡᤀᤠᤱ ᤘᤠ᤹ᤖᤥ॥”

¹⁴ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤐᤠ᤺ᤵᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤃᤠᤗᤡᤕᤥᤖᤧ ᤂᤧᤴ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤕᤜᤢᤍᤡᤛᤣ. ᤁᤴ ᤔᤏᤠ᤺ᤸᤗᤧ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤏᤢ ᤁᤴ ᤔᤏᤠ᤺ᤸᤗᤧ ᤖᤥᤔᤡ ᤌᤡᤶ ᤑᤣ᤺ᤴᤍᤢᤒᤠ ᤐᤠ᤺ᤴ ᤘᤠ᤹ᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤡᤏᤡ᤹ ᤐᤠ᤺ᤴ ᤂᤧᤶᤔᤠᤀᤠᤱ ᤂᤠᤛᤧᤴ ᤗᤥ᤺ᤶᤔᤠ ᤏᤢ᤺ᤒᤠᤀᤣ ᤐᤥ᤺ᤱ॥

¹⁵ᤁᤖ ᤁᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤛᤠᤶᤕᤥᤌᤡᤶᤔᤥᤒᤠ ᤔᤡᤱᤜᤠ᤹. ᤛᤢᤳᤗᤠᤜᤠ᤹ ᤏᤢ ᤌᤡᤶᤔᤡᤸᤗᤧᤴᤗᤰ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤁᤱᤃ ᤂᤡᤏᤡ᤹ ᤀᤠᤒᤠᤅᤣ ᤋᤱᤄᤧᤶᤔᤧ᤹ᤀᤥ॥ ᤀᤡᤱᤃᤠ᤹ᤃ ᤁᤴ ᤐᤠ᤺ᤴᤜᤠ᤹ ᤂᤠᤛᤧᤴ ᤔᤧᤗᤥ᤺ᤴᤏᤠᤴᤗᤥ॥”

¹⁶ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤂᤠᤛᤧᤴᤜᤡᤶᤗᤠᤶ ᤗᤠ᤺ᤰᤁᤠᤳ ᤐᤠᤱᤄᤢᤍᤣ᤺ᤛᤢᤛᤡᤖᤥ॥

¹⁷ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤁᤧᤖᤧᤰᤗᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥ᤺ᤒᤠ ᤛᤥᤛ᤻ᤌᤣᤏᤛᤧᤴ ᤔᤧᤍᤧᤶᤛᤢᤀᤠᤱ ᤂᤠᤛᤧᤴᤜᤡᤶ ᤋᤃᤡᤀᤣ ᤔᤧᤗ᤺ᤵᤛᤢᤖᤥ॥ ᤁᤖ ᤃᤠᤗᤡᤕᤥᤖᤧ ᤂᤧᤱᤜᤠ᤹ ᤂᤧᤶᤂᤧᤶᤔᤠᤱ ᤔᤧᤗᤠᤵᤋᤢᤛᤡᤴ॥

¹⁸ᤐᤠᤘᤗᤧᤴ ᤁᤥᤖᤴᤌᤡᤀᤥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤕᤖᤡᤰ ᤕᤧᤴ ᤘᤕᤧ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤐᤪᤡᤛ᤻ᤁᤡᤗᤠ ᤜᤧᤰᤁᤩᤠᤱ ᤁᤢᤕᤧᤶᤒᤠ᤹ ᤀᤁᤫᤡᤗᤠ᤺ᤴᤏᤢ ᤛᤡᤖᤡᤕᤠ ᤗᤧᤵᤔᤠᤱ ᤘᤠᤗᤠᤶᤍᤡ᤺ᤰ ᤆᤥᤃᤧ॥ ᤁᤖ ᤂᤢᤏᤧ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ. ᤔᤠᤱᤜᤧᤰ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤐᤠᤘᤗᤖᤧ ᤁᤡᤱᤁᤪᤡᤕᤠ ᤕᤧᤰᤕᤰᤁᤥ ᤁᤢᤎᤧᤃᤣ᤺ᤰ ᤏ᤺ᤰᤂᤢᤖᤥ॥

¹⁹ᤂᤧᤱᤜᤠ᤹ ᤀᤣᤑᤡᤛᤛᤀᤥ ᤔᤧᤃᤧᤖᤧᤀᤠᤱ ᤐᤠᤘᤗᤖᤧ ᤐᤪᤡᤛ᤻ᤁᤡᤗᤠ ᤏᤢ ᤀᤁᤫᤡᤗᤠ᤺ᤴ ᤂᤧᤵᤔᤥ ᤐᤰᤌᤛᤡ॥ ᤁᤖ ᤂᤧᤵᤔᤥ ᤘᤕᤧᤸᤗᤧ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤕᤜᤢᤍᤡᤜᤠ᤹ᤏᤢ ᤐᤠ᤺ᤴᤌᤰᤋᤧᤖᤥ॥

²⁰ᤂᤧᤱᤜᤠ᤹ᤖᤧ ᤁᤢᤓᤠ ᤕᤧᤴ ᤀᤠᤏᤡᤃᤧᤏᤢᤀᤣ ᤘᤕᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤛᤠᤱ ᤂᤢᤏᤧ᤹ ᤘᤠ᤹ᤔᤠ ᤔᤧᤍᤧᤴᤍᤧᤴᤗᤥ॥

²¹ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤐᤥ᤺ᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤕᤠᤶᤔᤥ ᤋᤠᤀᤠᤖᤥ॥” ᤜᤧᤰᤁᤣ ᤔᤧᤳᤋᤢᤎᤛᤡᤀᤠᤱ ᤂᤢᤏᤧ᤹ ᤀᤣᤑᤡᤛᤛᤗᤠᤶ ᤛᤡᤈᤖᤡᤕᤠ ᤗᤧᤵᤔᤠᤱ ᤘᤠᤗᤠᤶᤍᤡ᤺ᤰᤁᤥ ᤌᤠᤛᤡᤱᤗᤥ॥

²²ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤈᤖᤡᤕᤠᤀᤥ ᤁᤧᤖᤧᤀᤠᤱ ᤂᤧᤵᤔᤥᤏᤢ ᤌᤠ᤺ᤱ ᤕᤖᤢᤛᤗᤧᤶᤔᤥ ᤐᤣᤀᤠᤱ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤀᤥ ᤆᤢᤱᤈᤡᤃᤧᤴ ᤛᤣᤘᤠ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤀᤣᤴᤋᤡᤀᤥᤰᤁᤥ ᤌᤩᤧᤖᤥ॥

²³ᤂᤧᤵᤔᤥ ᤁᤢᤓᤠ ᤕᤧᤶ ᤕᤠ᤺ᤰᤋᤧᤀᤠᤱ ᤂᤧᤵᤔᤥᤗᤠᤶ ᤐᤠᤘᤗᤧᤴ ᤃᤗᤠᤋᤡᤕᤠ ᤏᤢ ᤑᤪᤡᤃᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤕᤠᤶᤔᤥ ᤗᤠᤶᤍᤡ᤺ᤰ ᤆᤥᤃᤧᤖ ᤂᤧᤵᤔᤥᤒᤠ ᤏᤛᤠᤏᤡᤒᤠᤜᤠ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥᤃᤢᤛᤡᤖᤥ॥

²⁴ᤂᤧᤴ ᤕᤧᤶᤔᤥ ᤀᤗᤧᤰᤈᤧᤴᤍᤪᤡᤕᤠ ᤕᤧᤰᤕᤰᤁᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤵᤐᤥᤸᤗᤥᤛ ᤔᤧᤵᤔᤏᤠᤒᤠ ᤕᤜᤢᤍᤡᤎᤡᤰ ᤀᤣᤑᤡᤛᤛᤀᤥ ᤋᤩᤧ॥ ᤂᤢᤏᤧ᤹ᤃ ᤛᤠ᤹ᤖᤡᤰ ᤏᤢ᤺ᤖᤡᤰ ᤐᤠ᤺ᤵᤔᤠ ᤁᤧᤛᤢᤰᤐᤠ ᤆᤥᤃᤧ. ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠᤀᤠᤱ ᤏᤢ᤺ᤖᤡᤰ ᤗᤧᤛ᤻ᤛᤢᤀᤠᤱ ᤘᤕᤧᤖᤥ॥