ᤗᤢᤁᤠ 7:36-39

³⁶ᤑᤖᤡᤛᤡᤎᤡᤰᤗᤧ ᤕᤧᤛᤢ᤺ᤴ ᤕᤢ᤺ᤴᤇᤡᤰ ᤆᤠᤈᤠᤛᤧ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤔᤥ ᤐᤣᤀᤠᤱ ᤆᤠᤈᤠᤛᤧ ᤕᤢᤱᤛᤡᤱᤗᤥ॥

³⁷ᤂᤧᤴ ᤐᤠᤱᤈᤢᤶᤔᤥ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧ॥ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤑᤖᤡᤛᤡ᤺ᤸᤗᤧ ᤁᤢᤜᤡᤶᤔᤥ ᤆᤠᤈᤠᤛᤧ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤂᤧᤸᤗᤧ ᤀᤡᤔᤧᤸᤗᤢᤱᤒᤠ ᤐᤷᤕᤠᤔᤠᤎᤡᤰ ᤁᤢᤗᤧᤶ ᤑᤢᤱᤏᤠᤶ ᤕᤠᤱᤛᤡᤅᤧᤀᤠᤱ

³⁸ᤕᤧᤛᤢᤖᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤋᤩᤧᤀᤠᤱ ᤜᤠᤒᤧᤖ ᤕᤧᤛᤢᤖᤧ ᤁᤢᤗᤠᤱᤅᤥ ᤁᤢᤔᤡᤰᤘᤠ᤺ᤸᤗᤧ ᤘᤠᤖᤰᤂᤢᤖᤥ॥ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤀᤠᤱ ᤜᤣ᤺ᤛᤢᤖ ᤁᤢᤗᤠᤱᤅᤡᤴ ᤆᤢᤵ ᤔᤧᤳᤋᤢᤀᤠᤱ ᤂᤧᤴ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤢᤖᤥ॥

³⁹ᤜᤧᤰᤁᤣ᤺ᤸᤗᤧ ᤂᤧᤴ ᤑᤖᤡᤛᤡ᤺ᤸᤗᤧ ᤏᤡ᤺ᤛᤢᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱ. “ᤁᤴ ᤔᤏᤠ᤺ᤴ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤘᤕᤧᤸᤗᤧᤃ ᤂᤢᤏᤧ᤹ ᤁᤧᤛᤢᤔᤠ ᤔᤧᤴᤇᤢᤔᤠ᤹ᤀᤡᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤒᤠᤔᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤧᤰᤂᤠᤀᤣ ᤗᤠᤕᤥ ᤁᤧᤈᤥ᤺ᤰᤔᤠᤀᤣᤖᤥ॥”