ᤗᤢᤁᤠ 12:1-45

¹ᤂᤧᤵᤔᤥ ᤏᤡ᤺ᤳᤔᤧᤴᤍᤧᤳᤋᤣ ᤜᤧᤴᤇᤡᤱᤅᤠᤱᤎᤥ ᤔᤏᤠᤜᤠ᤹ ᤆᤡᤀᤧᤳ ᤆᤡᤀᤧᤳ ᤔᤧᤀᤧᤳᤇᤡᤱᤗ ᤔᤧᤈᤢᤵᤛᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ. “ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤂᤧᤴ ᤛᤡᤍᤠ᤹ ᤑᤠ᤹ᤀᤡᤴ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴᤗᤥ॥

²ᤔᤧᤎᤠ᤺ᤵᤏᤧᤴᤗ ᤑᤠ᤹ᤀᤠᤱ ᤋᤧᤵᤋᤧᤀᤠᤱ ᤁᤧᤘᤠ᤹ᤒᤠ ᤐᤠ᤺ᤴ ᤀᤡᤃᤪ ᤁᤢᤛᤡᤱ ᤏᤡ᤺ᤳᤔᤧᤍᤧᤳᤏᤧᤴᤗ ᤑᤠ᤹ᤀᤠᤱ ᤔᤠ᤹ᤖᤧᤀᤠᤱ ᤁᤧᤘᤠ᤹ᤒᤠ ᤐᤠ᤺ᤴ ᤌᤣᤀᤠᤱ ᤜᤥ᤺ᤵᤗᤥ॥

³ᤂᤧᤏᤧ᤹ ᤂᤠᤃᤧᤔᤠᤰᤐᤠᤀᤥ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤠᤃᤧᤀᤥ᤺ᤵᤐᤠᤀᤥ ᤀᤡᤱᤓᤴ ᤆᤥ᤺ᤰᤗᤥ॥ ᤜᤧᤰᤁᤩᤠᤱ ᤛᤫᤠ᤺ᤳᤋᤠᤱ ᤜᤡᤶ ᤛᤡᤃᤠᤱ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤜᤡᤶ ᤛᤶᤍᤠᤱᤗᤠᤶ ᤕᤶᤒᤠ ᤀᤡᤰᤗᤠᤀᤥ ᤀᤡᤱᤓᤴ ᤆᤥ᤺ᤰᤗᤥ॥”

⁴“ᤀᤠᤴᤈᤢᤶᤛᤣ. ᤜᤠ᤺ᤳᤗᤧ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴᤗᤰ ᤛᤧᤵᤔᤠᤀᤠᤱᤎᤥ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴ. ᤂᤧᤴᤏᤢ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥

⁵ᤁᤖ ᤜᤠ᤺ᤳᤏᤢ ᤁᤡ᤺ᤔᤠ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤔᤧᤳᤏᤡᤱᤗᤥ–ᤜᤠ᤺ᤳᤗᤧ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤧᤖᤢᤀᤠᤱ ᤂᤧᤔᤠᤕᤱᤛᤱᤅᤥ ᤗᤠᤵᤑᤢᤔᤠ ᤛᤢᤰᤋᤢ᤹. ᤂᤢᤏᤧ᤹ᤏᤢᤀᤣ ᤁᤡ᤺ᤛᤧᤶᤔᤧ᤹ᤀᤥ᥄

⁶ᤅᤠᤛᤡ ᤆᤢᤈᤢᤰᤛᤠ ᤐᤢᤜᤠ᤹ᤖᤧ ᤕᤠᤱᤏᤧᤳᤇᤡ ᤔᤧᤗᤧᤰᤏᤧᤴᤒᤡ᥅ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤀᤠᤳᤋᤡᤴᤏᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤴᤗᤥ॥

⁷ᤂᤡᤏᤡ᤹ ᤌᤧᤃᤣ᤺ᤰᤁᤥᤒᤠ ᤁᤠᤰ ᤌᤧᤃᤣ᤺ᤰᤀᤡᤜᤠ᤹ ᤂᤢᤏᤧ᤹ ᤏᤡ᤺ᤖᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ᥄ ᤂᤡᤏᤡ᤹ᤃ ᤕᤖᤡᤰ ᤆᤢᤈᤢᤰᤛᤠ ᤐᤢᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤁᤧᤈᤥᤃᤡᤖᤥ॥”

⁸“ᤀᤠᤸᤗ ᤂᤧᤵᤛᤧᤶᤔᤧ᤹ᤀᤥ. ᤜᤠ᤺ᤳᤗᤧ ᤔᤏᤠ ᤋᤃᤡ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤢᤱ ᤗ᤹ᤖᤡᤰ ᤐᤠ᤺ᤳᤋᤢ᤹. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤧᤴ ᤋᤠ᤺ᤰᤋᤢᤱᤗᤥ॥

⁹ᤁᤖ ᤜᤠ᤺ᤳᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤀᤡᤱᤃᤠ᤹ ᤏᤠ᤹ᤀᤠ. ᤀᤡᤱᤃᤠ᤹ᤀᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤏᤠ᤹ᤖᤢᤱᤗᤥ॥

¹⁰ᤜᤧᤰᤁᤩᤠᤱ ᤜᤠ᤺ᤳᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤧᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ᤹. ᤂᤧᤸᤗᤧ ᤗᤧᤵᤔᤡ ᤂᤥ᤺ᤔᤠ ᤛᤢᤰᤋᤢ᤹. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧᤴ ᤗᤧᤵᤔᤡ ᤔᤧᤄᤥ᤺ᤛᤢᤴᤗᤥ॥

¹¹ᤔᤏᤠᤜᤠ᤹ᤖᤧ ᤂᤡᤏᤡ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤜᤧᤰᤁᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤠᤛᤧᤴ ᤗᤥ᤺ᤶᤔᤠᤖᤧ ᤗᤠᤃᤡ ᤁᤧᤶᤍᤣ᤹ᤖᤡᤸᤗᤧ. ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤌᤧᤔᤠ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥

¹²ᤜᤠᤒᤠ ᤂᤧᤴ ᤕᤧᤶᤔᤥ ᤌᤣ ᤐᤠ᤺ᤵᤔᤠ ᤐᤥ᤺ᤱ ᤑᤠ᤹ᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤜᤢ᤹ᤖᤡ᤹ᤖᤥ॥”

¹³ᤜᤧᤰᤁᤩᤠᤱ ᤂᤧᤴ ᤔᤏᤠᤗᤢᤶᤔᤥᤗᤠᤶ ᤌᤡᤰ ᤔᤏᤠ᤺ᤸᤗᤧ ᤕᤧᤛᤢ᤺ᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤶᤓᤢ᤹ᤖᤧ ᤕᤠᤱᤛᤠᤁᤢᤴᤎᤣᤀᤥᤒᤠ ᤀᤡᤱᤃᤠ᤹ ᤀᤠᤗᤰᤁᤡᤴ ᤐᤡᤀᤠᤖ ᤑᤠ᤹ᤀᤠᤱ ᤔᤧᤳᤋᤠᤱ ᤐᤡᤖᤠᤱᤅᤧ᤹ᤀᤥ॥”

¹⁴ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤗᤢᤱᤅᤠᤀᤣ. ᤜᤠ᤺ᤳᤗᤧ ᤀᤡᤱᤃᤠ᤹ ᤂᤡᤴᤇᤡ᤹ ᤗᤢᤶᤔᤥ ᤕᤠᤱᤛᤠᤁᤢᤴᤎᤣ ᤁᤧᤜᤠᤒᤠ ᤁᤧᤒᤡᤒᤠ ᤆᤥᤃᤠᤱ ᤀᤡᤃᤪ ᤂᤠᤛᤧᤴᤗᤥ᤺ᤶᤒᤠ ᤆᤥᤃᤠᤱᤒᤣ᥅”

¹⁵ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤠᤰ ᤂᤡ᤺ᤶᤕᤰ ᤆᤥ᤺ᤰᤔᤥᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤔᤏᤠ᤺ᤸᤗᤧ ᤁᤳᤋᤢᤒᤠ ᤔᤢᤸᤗᤢᤰ ᤕᤠᤱᤛᤠᤁᤢᤴᤎᤣᤀᤥ ᤂᤢᤏᤧ᤹ ᤛᤧᤰᤂᤠᤒᤠ ᤁᤢᤜᤡᤱᤔᤴᤏᤡᤴ ᤔᤧᤘᤠ᤹ᤏᤧᤴᤗᤥ॥”

¹⁶ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤌᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠ᤺ᤸᤗᤧ ᤕᤖᤡᤰ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤛᤢᤵᤛᤢ᤹ᤖᤥ॥

¹⁷ᤜᤧᤰᤁᤩᤠᤱ ᤂᤧᤸᤗᤧ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ. ‘ᤀᤠᤸᤗ ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤣ᥅ ᤁᤴ ᤆᤠᤜᤠ᤹ ᤕᤢᤱᤔᤠᤍᤧᤴᤏᤣ ᤜᤥ᤺ᤵᤗᤥ॥’

¹⁸ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤀᤡ᤺ᤳᤋᤢ. ‘ᤀᤠᤸᤗ ᤀᤡᤱᤃᤠ᤹ ᤀᤰᤂᤣ ᤆᤥᤃᤢᤱ–ᤀᤢᤴᤇᤥ᤺ᤴᤒᤠ ᤆᤠ ᤕᤢᤱᤍᤧᤴᤜᤠ᤹ ᤕ᤺ᤛᤢᤱᤅᤠᤱ ᤁᤢᤛᤱ ᤕᤶᤒᤠ ᤆᤠ ᤕᤢᤱᤍᤧᤴᤜᤠ᤹ ᤆᤥᤃᤢᤱᤛᤡᤱ॥ ᤜᤧᤰᤁᤩᤠᤱ ᤁᤠᤰ ᤆᤠᤜᤠ᤹ ᤏᤢ ᤀᤠᤈᤡᤃ᤺ᤰᤘᤠᤜᤠ᤹ ᤂᤧᤵᤔᤥ ᤕᤢᤰᤂᤢᤱᤛᤡᤱᤗᤥ॥

¹⁹ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤒᤠᤅᤣ ᤀᤰᤂᤣ ᤔᤧᤳᤇᤡᤱᤅᤠ. ᤋᤣ᤺ᤱᤒᤣ. ᤕᤖᤡᤰ ᤋᤱᤒᤣ ᤌᤠᤖᤡᤰ ᤁᤧᤕᤥᤒᤠ ᤆᤠ ᤏᤢ ᤆᤡᤃ᤺ᤰᤘᤠᤜᤠ᤹ ᤛᤢᤵᤛᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤸᤗ ᤁᤢᤛᤠᤏᤢ᤺ᤖᤡᤰ ᤕᤢᤅᤧ᤹. ᤆᤧ᤹. ᤌᤢᤅᤧ᤹ᤀᤠᤱ ᤛ᤺ᤳᤋᤧ᤹ᤀᤥ᥄’

²⁰ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤳᤋᤢ. ‘ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤣ. ᤀᤠᤀᤡᤴ ᤛᤧᤴᤍᤡᤰᤛᤠ ᤂᤧᤏᤧ᤹ ᤁᤧᤜᤡᤱᤔᤴᤏᤡᤴ ᤏᤢᤵᤐᤠᤱ ᤂᤧᤏᤧ᤹ ᤁᤧᤛᤡ᤺ᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤗᤢᤵᤛᤢᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤜᤠ᤺ᤳᤗᤧᤴ ᤐᤥ᤺ᤱᤒᤠᤒᤣ᥅’”

²¹ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢ. “ᤀᤠᤒᤠᤅᤣ ᤗᤠᤃᤡᤖᤰ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤗᤢᤶᤒᤠᤀᤠᤱ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤶᤒᤥ᤺ᤱᤔᤏᤠᤒᤧᤴᤏᤠᤱ ᤒᤠ ᤜᤧᤰᤁᤣᤀᤣ ᤐᤥ᤺ᤱᤗᤥ॥”

²²ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣ᤺ᤸᤗᤧ ᤂᤧᤵᤛᤧᤶᤔᤧ᤹ᤀᤥ. ᤂᤡᤏᤡ᤹ ᤜᤡᤱᤔᤴᤏᤥ ᤌᤣ ᤆᤠᤔᤠ ᤏᤢ ᤏᤠᤛᤡᤱᤃᤧᤴ ᤌᤰᤁᤥ ᤌᤣ ᤆᤠᤱᤔᤠ ᤘᤠ᤺ᤵᤔᤠ ᤑᤠ᤹ᤀᤠᤱ ᤏᤡᤱᤛᤠᤶ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥

²³ᤌᤣᤀᤠᤱᤓᤧᤸᤗᤧ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤆᤠᤔᤠ ᤌᤢᤱᤔᤠᤏᤢ᤺ᤸᤗᤧ ᤕᤶᤒᤠᤖᤥ॥ ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤴ ᤆᤠᤱᤔᤠ ᤘᤠ᤺ᤵᤔᤠᤏᤢ᤺ᤸᤗᤧᤀᤠᤱ ᤕᤶᤒᤠᤖᤥ॥

²⁴ᤀᤠ᤺ᤰᤘᤠᤜᤠ᤹ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤥ–ᤂᤧᤱᤜᤠ᤹ᤖᤧ ᤆᤠ ᤔᤧᤴᤍᤣ᤺ᤛᤢᤴ ᤔᤧᤴᤇᤢᤵᤛᤢᤴ. ᤆᤠᤕᤢᤱᤍᤧᤴᤏᤥᤀᤠᤱ ᤕᤠᤱᤔᤧᤱᤄᤥ᤺ᤳᤋᤢᤴ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤠ᤺ᤳᤋᤢᤛᤡ᤹ ᤜᤡᤱᤄᤢᤛᤡ᤹ᤖᤥ॥ ᤂᤡᤏᤡ᤹ᤃ ᤐᤢᤜᤠ᤹ᤏᤢ᤺ᤸᤗᤧᤀᤠᤱ ᤀᤠᤰᤂᤧᤴ ᤀᤡᤔᤧᤸᤗᤢᤱᤛᤠᤒᤠ ᤁᤧᤈᤥᤃᤡ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥

²⁵ᤏᤡᤱᤛᤠᤶᤔᤥ ᤁᤧᤎᤩᤧ᤹ᤀᤡᤀᤠᤱ ᤂᤡᤏᤡ᤹ ᤜᤡᤱᤔᤴᤏᤥ ᤁᤢᤔᤢᤰᤌᤡᤰᤁᤠᤱ ᤑᤥ᤺ᤔᤠ ᤁᤧᤴᤇᤢᤰᤋᤢᤶᤔᤡᤴ॥

²⁶ᤀᤰᤋᤱᤒᤠ ᤆᤢᤰᤛᤠ ᤕᤠ᤺ᤶᤒᤰᤁᤠᤱ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤴᤏᤡᤸᤗᤧ ᤌᤣᤀᤠᤱ ᤂᤡᤏᤡ᤹ ᤏᤡᤱᤘᤠ᤹ᤒᤠᤸᤗᤧ ᤁᤧᤕᤧ᤺ᤰᤂᤡᤒᤠᤒᤣ᥅

²⁷ᤀᤠᤸᤗ ᤗᤡ-ᤗᤡ ᤑᤢᤱᤅᤡᤴ ᤐᤥ᤺ᤒᤠᤴ ᤀᤥᤔᤧᤳᤋᤧᤶᤔᤧ᤹ᤀᤥ. ᤂᤧᤱᤜᤠ᤹ᤖᤧ ᤂᤡ᤺ ᤔᤧᤴᤍᤣ᤺ᤛᤢᤴ ᤂᤡ᤺ᤀᤠᤱ ᤔᤧᤴᤗ᤺ᤴᤏᤧᤴ. ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤏᤢ᤹ᤔᤠ ᤁᤢᤍᤠ᤺ᤔᤠᤀᤥ ᤁᤴ ᤗᤡ-ᤗᤡ ᤑᤢᤱᤅᤡᤴ ᤕᤠᤖᤡᤰᤁᤠᤱ ᤏᤢ᤺ᤒᤠ ᤋᤣ᤺ᤳ ᤔᤧᤈᤠᤰᤛᤡᤱᤅᤡᤴᤗᤥ᥄

²⁸ᤀᤠᤀᤡᤴ ᤋᤠ᤺ᤴᤍᤡᤰ ᤔᤡᤀᤥ ᤗᤠᤵᤁᤧᤓᤢᤛᤡᤱᤒᤠ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤒᤠ ᤛᤢᤱᤑᤢᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧᤰᤁᤣᤗ᤹ᤖᤡᤰ ᤋᤣ᤺ᤳ ᤆᤠᤰᤋᤢᤛᤡᤸᤗᤧ ᤂᤡᤏᤡ᤹ ᤋᤣ᤺ᤳ ᤁᤧᤴᤈᤠᤰᤋᤡᤴᤒᤡ᥅ ᤏᤛᤠ᤺ᤴ ᤁᤧᤛᤢ᤺ᤶᤒᤠᤛᤣ᥄

²⁹ᤆᤠᤔᤠ ᤌᤢᤱᤔᤠᤀᤥᤖᤰ ᤂᤡᤏᤡ᤹ ᤏᤡᤱᤘᤠ᤹ ᤔᤧᤒᤡᤖᤧᤶᤔᤡᤴᤏᤧ᤹ᤀᤥ᥄ ᤂᤧᤸᤗᤧ ᤗᤠᤃᤡᤃ ᤏᤡᤱᤛᤠᤶᤔᤥᤀᤠᤱ ᤔᤧᤎᤩᤧᤶᤔᤡᤴᤏᤧ᤹ᤀᤥ.

³⁰ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤛᤢᤘᤠᤱᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤔᤧᤀᤡ᤺ᤳᤋᤢ᤹ᤖᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤐᤠ᤺ᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥᤃᤡᤒᤠᤴ ᤏᤡ᤺ᤛᤢᤖᤥ॥

³¹ᤁᤖ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴᤗᤰ ᤁᤥ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤁᤠᤰ ᤁᤴ ᤆᤡᤃ᤺ᤰᤘᤠᤜᤠ᤹ ᤂᤡᤏᤡ᤹ ᤁᤧᤶᤒᤡᤖᤡ᤹ᤖᤥ॥”

³²“ᤆᤢᤰᤛᤠ ᤔᤧᤸᤗᤢᤰ ᤛᤢᤶᤛᤣ. ᤔᤧᤃᤡᤛᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤐᤠ᤺ᤸᤗᤧ ᤁᤢᤜᤠᤱᤈᤢᤶᤔᤡᤴ ᤐᤡᤔᤠ ᤁᤢᤛᤡᤖᤠ᤹ ᤌᤠᤅᤧᤀᤠᤱ ᤘᤠ᤹ᤖᤥ॥

³³ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤆᤡᤃ᤺ᤰᤘᤠᤜᤠ᤹ ᤛᤱᤄᤧᤶᤔᤧ᤹ᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤶᤍᤣ᤺ᤛᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤵᤑᤠᤸᤗᤧᤀᤠᤱ ᤔᤧᤴᤍᤧ᤺ᤱᤔᤏᤠ. ᤔᤧᤴᤜᤱᤔᤏᤠᤒᤠ ᤛᤢ᤺ᤰᤘᤠᤀᤥ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤔᤏᤠᤒᤠ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤕᤠᤱᤛᤠᤁᤢᤴᤎᤣᤜᤠ᤹ᤖᤧ ᤌᤡᤶᤛᤧᤶᤛᤡᤶᤔᤧ᤹ᤀᤥ॥ ᤂᤧᤵᤔᤥ ᤁᤧᤄᤢ᤺ᤶᤒᤠᤜᤠ᤹ᤖᤧᤀᤠᤱ ᤔᤧᤴᤄᤢ᤺ᤳᤋᤢᤴ. ᤜᤧᤰᤁᤩᤠᤱ ᤁᤢᤒᤢ᤺ᤸᤗᤧᤀᤠᤱ ᤔᤧᤈᤏᤧᤴᤗᤥ॥

³⁴ᤌᤣᤀᤠᤱᤓᤧᤸᤗᤧ ᤀᤠᤳᤋᤥ ᤂᤧᤏᤧ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤕᤢᤰᤂᤢ᤹. ᤂᤧᤵᤔᤥᤀᤣ ᤂᤧᤏᤧ᤹ ᤁᤧᤏᤡᤱᤘᤠ᤹ᤒᤧᤴ ᤐᤣ᤺ᤰᤗᤥ॥”

³⁵“ᤂᤡᤏᤡ᤹ ᤑ᤹ᤀᤡ᤺ᤴ ᤏᤢ᤺ᤖᤡᤰᤁᤠᤱ ᤕᤢᤵᤛᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤣᤔᤡ᤺ᤴ ᤜᤠ᤺ᤴᤍᤧᤶᤔᤧ᤹ᤀᤠᤱ ᤕᤢᤰᤂᤧᤶᤔᤧ᤹ᤀᤥ॥

³⁶ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡᤖᤧ ᤆᤛᤡᤒᤠ ᤛᤣᤘᤠᤖᤥᤒᤠᤜᤠ᤹ ᤜᤧᤰᤁᤣ ᤂᤡᤏᤡ᤹ ᤐᤥ᤺ᤰᤂᤧᤶᤔᤧ᤹ᤀᤥ॥ ᤂᤢᤏᤡ᤹ ᤍᤠᤱᤒᤠᤴ ᤔᤣ᤺ᤰᤂᤡᤶ ᤛᤠᤓᤠᤱᤈᤠ ᤆᤠᤛᤧ ᤐᤣ᤺ᤰᤁᤠᤱ ᤏᤢ᤺ᤱ ᤋᤠ᤺ᤸᤗᤧ ᤂᤡᤔᤥ ᤗᤠᤶᤎᤣ᤺ᤵᤐᤧᤴ ᤜᤶᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤴᤀᤡᤶᤔᤣ ᤒᤠ ᤔᤧᤕᤢᤱᤗᤥ॥

³⁷ᤜᤧᤰᤁᤩᤠᤱ ᤍᤠᤱᤒᤠᤴ ᤏᤢ᤺ᤱ ᤋᤠ᤺ᤀᤡᤸᤗᤧ. ᤔᤧᤴᤀᤡᤶᤔᤣ ᤂᤢᤏᤧ᤹ ᤁᤧᤜᤠᤱᤒᤠᤖ ᤁᤧᤕᤢᤱᤒᤠ ᤛᤣᤘᤠᤖᤥᤒᤠᤜᤠ᤹ᤖᤧ ᤔᤢ᤹ᤀᤡᤛᤠᤶ ᤔᤧᤄᤥ᤺ᤛᤢ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤒᤠᤅᤣ ᤕᤠᤖᤡᤵ ᤆᤥ᤺ᤰᤛᤡᤱᤅᤠᤱ ᤛᤣᤘᤠᤖᤥᤒᤠᤜᤠ᤹ ᤆᤠᤔᤠᤍᤧᤴᤏᤥ ᤕᤢᤰᤂᤢᤛᤡ᤹ ᤜᤧᤰᤁᤩᤠᤱ ᤆᤠᤔᤠ ᤌᤢᤱᤔᤠᤜᤠ᤹ ᤌᤠᤒᤢ ᤐᤡᤖᤢᤛᤡ᤹ᤖᤥ॥

³⁸ᤜᤧᤰᤁᤩᤠᤱ ᤂᤧᤴ ᤜᤡᤶᤍᤠᤱᤒᤧᤴ ᤛᤧᤳᤗᤢᤶᤓᤰ ᤂᤡᤖᤡ ᤋᤠᤛᤠᤱ ᤂᤧᤱᤜᤠ᤹ ᤔᤧᤴᤀᤡᤶᤔᤣ ᤔᤧᤕᤢᤱᤒᤠ ᤋᤢᤔᤢᤛᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤁᤢᤛᤣᤘᤠᤖᤥᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥

³⁹ᤜᤡᤶᤍᤠᤱᤒᤠᤸᤗᤧ ᤂᤢ᤺ᤴᤍᤪᤡᤰᤐᤧᤴ ᤂᤢ᤺ᤴᤇᤧ ᤋᤠ᤺ ᤁᤧᤗ᤹ᤒᤠ ᤕᤧᤶᤔᤡᤴ ᤏᤡᤱᤘᤠ᤹ ᤂᤥ᤺ᤛᤢᤏᤧ ᤑᤠ᤹ᤃᤪ ᤛᤧᤰᤂᤠᤛᤠᤱ ᤂᤢ᤺ᤵᤔᤠ ᤔᤧᤒᤠᤱᤄᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥

⁴⁰ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤴ ᤕᤢ᤺ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤁᤧᤘᤕᤡᤸᤗᤧ ᤂᤢᤏᤧ᤹ ᤕᤢ᤺ᤖᤥ॥”

⁴¹ᤐᤋᤪᤢᤛᤖᤧ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤁᤴ ᤂᤧᤍᤠ᤹ᤀᤡᤴ ᤀᤠᤏᤡᤃᤧ ᤗᤠᤃᤡ ᤁᤧᤒᤠ᤺ᤳᤋᤢᤒᤠᤒᤡ. ᤀᤡ ᤘᤣ᤹ ᤁᤧᤖᤧᤰᤗᤧ ᤗᤠᤃᤡᤀᤠᤱ ᤁᤧᤒᤠ᤺ᤳᤋᤢᤒᤠᤒᤡ᥅”

⁴²ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. ᤀᤠᤳᤋᤡᤴ ᤛᤣᤘᤠᤖᤥᤒᤠᤴ ᤏᤛᤠ᤺ᤴᤛᤠᤒᤠ ᤏᤢ ᤛᤡᤰᤁᤢᤶᤛᤠᤒᤠ ᤆᤥ᤺ᤰ. ᤂᤧᤴᤏᤡᤴ ᤜᤡᤶᤍᤠᤱᤒᤠᤸᤗᤧ ᤁᤢᤜᤡᤶᤎᤠ᤺ᤱᤜᤠ᤹ ᤀᤥᤔᤧᤵᤔᤠ ᤕᤢᤰ ᤐᤡᤖᤢ᤹ ᤜᤧᤰᤁᤩᤠᤱ ᤂᤧᤸᤗᤧ ᤘᤣ᤹ ᤛᤣᤘᤠᤖᤥᤒᤠᤜᤠ᤹ ᤕᤧᤶᤕᤧᤶᤔᤥ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ᤹ᤖᤥ॥

⁴³ᤂᤧᤴ ᤜᤡᤶᤍᤠᤱᤒᤠᤴ ᤏᤢ᤺ᤱ ᤋᤠ᤺ᤸᤗᤧ ᤂᤧᤴ ᤛᤣᤘᤠᤖᤥᤒᤠᤸᤗᤧ ᤒᤠ ᤜᤧᤰᤁᤣᤀᤣ ᤆᤥᤃᤢᤖ ᤘᤠ᤹ᤒᤠ ᤋᤢᤔᤢᤏᤧ ᤑᤠ᤹ᤃᤪ ᤂᤧᤴ ᤌᤢᤶᤄᤥ ᤐᤡᤖᤢ᤹ᤖᤥ॥

⁴⁴ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤜᤡᤶᤍᤠᤱᤒᤠᤸᤗᤧ ᤂᤧᤴ ᤛᤣᤘᤠᤖᤥᤒᤠᤴ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣ ᤛᤶᤍᤠᤱ ᤕᤢᤰ ᤐᤡᤖᤢ᤹ᤖᤥ॥

⁴⁵ᤁᤖ ᤀᤠᤳᤋᤡᤴ ᤛᤣᤘᤠᤖᤥᤒᤠᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ᤒᤥ ᤀᤡᤱᤃᤠ᤹ ᤀᤠᤴᤍᤠᤱᤒᤠᤴ ᤜᤠᤖᤠ ᤔᤧᤍᤠᤏᤧᤴ ᤗ᤹ᤖᤡᤰ ᤀᤡ᤺ᤳᤋᤢᤖ ᤆ᤺ ᤌᤢᤅᤢ᤹. ᤜᤧᤰᤁᤩᤠᤱ ᤔ᤺ᤛᤡᤱᤅᤠᤱ ᤘᤣ᤹ ᤛᤣᤘᤠᤖᤥᤒᤠ ᤏᤢ ᤛᤣᤘᤠᤖᤥᤔᤠᤜᤠ᤹ ᤜᤡᤵᤋᤢᤛᤡ᤹ ᤗ᤺ᤵᤛᤢᤛᤡ᤹ᤖ ᤘᤠ᤹ᤀᤡᤸᤗᤧ