ᤕᤢᤜᤢᤴᤏᤠ 7:16-27

¹⁶ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤱᤃ ᤀᤠᤒᤠᤅᤣ ᤀᤡᤱᤃᤠ᤹ᤀᤡᤴ ᤔᤧ᤺ᤴᤗᤥ. ᤁᤖ ᤁᤱᤃ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠᤖᤥ॥

¹⁷ᤀᤠᤳᤋᤡᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤋᤩᤧᤒᤠᤒᤡ ᤀᤡᤱᤃᤠ᤹ ᤀᤠᤒᤠᤅᤣ ᤐᤠ᤺ᤳᤋᤢᤱᤒᤠᤒᤡ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢ᤹ᤖᤥ॥

¹⁸ᤀᤠᤒᤠᤅᤣ ᤕᤢᤰᤁᤥᤗᤠᤶ ᤁᤧᤒᤠ᤺ᤵᤐᤠᤜᤠ᤹ᤖᤧᤃ ᤀᤠᤒᤠᤅᤣ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤃᤥ᤺ᤳᤋᤢ᤹ᤖᤥ. ᤁᤖ ᤀᤠᤳᤋᤡᤸᤗᤧ ᤂᤢᤏᤧ᤹ ᤁᤧᤒᤠᤱᤒᤠᤴ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤛᤧᤰᤂᤠ ᤐᤠ᤺ᤴ ᤐᤠ᤺ᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤥ ᤌᤣᤀᤠᤱ ᤀᤡᤱᤗᤧᤰᤐᤠ ᤐᤠ᤺ᤴ ᤜᤥ᤺ᤵᤗᤥ॥

¹⁹ᤔᤥᤛᤠᤖᤧ ᤂᤡᤏᤡ᤹ ᤛᤠᤶᤕᤥᤌᤡᤶ ᤁᤧᤒᤡᤖᤡ. ᤁᤖ ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴ॥ ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤂᤡᤏᤡ᤹ ᤕᤠᤵᤔᤡ ᤛᤧᤵᤔᤠ ᤁᤧᤃᤥ᤺ᤳᤋᤡᤒᤠᤒᤣ᥅”

²⁰ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ᤃ ᤑᤧᤴᤛᤠᤶᤔᤡᤸᤗᤧ ᤁᤧᤕᤠᤱᤄᤧᤀᤠᤱ ᤁᤧᤘᤠ᤹ᤖᤥ᥄ ᤜᤠ᤺ᤳᤗᤧ ᤂᤧᤏᤧ᤹ ᤛᤧᤵᤔᤠ ᤁᤧᤃᤥ᤺ᤳᤋᤧᤒᤣ᥅”

²¹ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤗᤳᤇᤠ ᤔᤏᤠᤎᤡᤰ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤏᤢᤛᤢᤱᤅᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥

²²ᤁᤖ ᤂᤡᤏᤡ᤹ᤀᤠᤱ ᤔᤥᤛᤠᤖᤧ ᤁᤧᤒᤡᤖᤡᤒᤠ ᤜᤷᤍᤥ ᤜᤧᤰᤔᤠ ᤛᤠᤶᤕᤥᤌᤡᤶᤔᤡᤴ ᤁᤧᤏᤠ᤺ᤳᤋᤢᤶ ᤁᤧᤀᤡ᤺ᤳᤋᤢᤶᤔᤠᤱ ᤏᤠ᤺ᤶᤛᤡᤱ ᤕᤧᤴᤏᤥᤀᤣ ᤂᤡᤏᤡ᤹ ᤛᤠ᤺ᤜᤠ᤹ᤖᤧᤴ ᤜᤷᤍᤥ ᤁᤧᤜᤧᤃᤢᤶ ᤁᤧᤒᤡᤖᤢᤶᤛᤡᤶᤔᤡᤸᤗᤧ ᤂᤡᤏᤡ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤴᤍᤢᤶᤗᤥ॥ (ᤛᤧᤰᤂᤠ᤺ᤸᤗᤧ ᤁᤴ ᤜᤷᤍᤥ ᤜᤧᤰᤔᤠ ᤛᤠᤶᤕᤥᤌᤡᤶᤔᤡᤱᤃ ᤔᤥᤛᤠᤗᤠᤶ ᤔᤧ᤺ᤴ. ᤁᤖ ᤁᤱᤃ ᤀᤒᤪᤠᤜᤠᤶᤗᤠᤶ ᤐᤥ᤺ᤰᤂᤧ ᤕᤧᤒᤠᤖᤥ॥)

²³ᤀᤠᤸᤗ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤴ ᤔᤧᤒᤣ᤺ᤴᤏᤧᤴᤗ ᤑᤠ᤹ᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤛᤠ᤺ᤜᤠ᤹ᤖᤧᤴ ᤜᤷᤍᤥ ᤜᤧᤰᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤏᤧ ᤑᤠ᤹ᤃᤪ. ᤀᤡᤱᤃᤠ᤹ ᤁᤴ ᤔᤏᤠ᤺ᤴ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤏᤢᤛᤢᤱᤅᤡᤸᤗᤧ ᤌᤣᤀᤠᤱ ᤀᤡᤱᤃᤠ᤹ᤏᤢ ᤂᤡᤏᤡ᤹ ᤕᤠ᤺ᤰᤗᤧ᤹ᤒᤠᤒᤣ᥅

²⁴ᤔᤏᤠ ᤀᤥᤔᤧᤵᤔᤠᤛᤡᤀᤠᤱ ᤔᤧ᤺ᤴ ᤁᤖ ᤛᤧᤰᤂᤠᤀᤥ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹ᤀᤥ॥”

²⁵ᤂᤧᤴ ᤕᤧᤶᤔᤥ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤁᤢᤓᤠ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤔᤧ᤺ᤶᤒᤧ. ᤛᤧᤵᤔᤠ ᤔᤧᤃᤥ᤺ᤳᤋᤢᤖ ᤔᤧᤘᤠ᤹ᤒᤠ ᤔᤏᤠ᤺ᤴ ᤒᤠ ᤁᤴ ᤔᤧ᤺ᤶᤒᤡ᥅

²⁶ᤁᤖ ᤁᤱᤃ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖᤀᤣ ᤐᤠ᤺ᤳᤗ ᤘᤠ᤹ᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤌᤣᤀᤠᤱ ᤔᤧᤶᤔᤧᤳᤋᤢᤴᤗᤥ॥ ᤔᤧ᤺ᤶᤒᤧ. ᤀᤠᤏᤡ᤹ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤒᤡ᥅

²⁷ᤁᤴ ᤔᤏᤠ᤺ᤴ ᤀᤠᤳᤋᤥᤗᤠᤶ ᤋᤩᤧ ᤁᤧᤗ᤹ᤒᤠ ᤀᤠᤏᤡ᤹ ᤀᤠᤏᤡ᤺ᤛᤢᤶᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠ᤺ᤸᤗᤧᤃ ᤂᤢᤏᤧ᤹ ᤌᤠ᤺ᤶᤛᤡᤱᤗᤰᤗᤥ. ᤂᤢᤏᤧ᤹ ᤀᤠᤳᤋᤥᤗᤠᤶ ᤋᤠ᤺ ᤁᤧᤗ᤹ᤒᤠ ᤀᤠᤳᤋᤡᤸᤗᤧᤀᤠᤱ ᤔᤧᤏᤡ᤺ᤛᤢᤴᤗᤥ॥”