ᤕᤢᤜᤢᤴᤏᤠ 3:14-25

¹⁴ᤀᤡᤛᤪᤠᤀᤡᤗᤡᤜᤠ᤹ ᤕᤧ᤺ᤱᤄᤠᤍᤧᤴᤏᤥ ᤗᤠᤶᤍᤡ᤺ᤰ ᤔᤧᤈᤥᤃᤧᤸᤗᤧ ᤔᤥᤛᤠᤖᤧ ᤐᤡᤳᤋᤥᤗᤡ ᤀᤛᤣ᤺ᤰᤐᤧᤴ ᤐᤰᤂᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤴᤇᤠᤶᤛᤠ᤺ᤴᤏᤠᤱ ᤐᤱᤗᤀᤣ ᤐᤥ᤺ᤱᤗᤥ॥

¹⁵ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥

¹⁶ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤌᤡᤰᤗᤰ ᤁᤢᤛ᤻ᤛᤠ᤺ᤴ ᤐᤠᤱᤄᤢ ᤕᤢ᤺ᤛᤢᤖᤥ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤃ ᤔᤧᤶᤔᤧᤰᤏᤧᤴ. ᤁᤖ ᤂᤧᤱᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥

¹⁷ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤢᤛ᤻ᤛᤠ᤺ᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤠᤵᤋᤡᤰ ᤁᤢ᤺ᤵᤔᤠᤛᤡ ᤑᤠ᤹ᤀᤠᤱ ᤐᤠᤱᤄᤢᤒᤠ ᤔᤧ᤺ᤴᤗᤥ ᤁᤖ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖ ᤑᤠ᤹ᤀᤠᤱ ᤐᤠᤱᤄᤢᤒᤠᤖᤥ॥

¹⁸ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧᤃ ᤂᤢᤶᤍᤡᤱ ᤔᤧᤱᤄᤥ᤺ᤛᤢᤴᤗᤥ ᤁᤖ ᤂᤢᤏᤧ᤹ᤀᤥ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤜᤠ᤹ᤖᤧᤱᤃ ᤋᤃᤡᤀᤣ ᤂᤠᤛᤧᤴ ᤐᤥ᤺ᤰᤂᤧ ᤆᤢᤖᤧᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤰᤗᤰ ᤁᤢᤛ᤻ᤛᤠ᤺ᤀᤥ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥

¹⁹ᤂᤢᤏᤡ᤹ ᤂᤠᤛᤧᤴᤏᤡᤴ ᤒᤠ ᤁᤴᤗᤥ. ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤕᤧ ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧᤒᤠᤸᤗᤧ ᤂᤧᤱᤜᤠ᤹ᤖᤧ ᤀᤥ᤺ᤳᤋᤡᤴᤏᤢ᤺ᤸᤗᤧ ᤂᤠᤍᤠᤶᤔᤠᤴᤏᤣ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧ॥

²⁰ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤀᤥ᤺ᤳᤋᤡ᤺ᤴ ᤔᤧᤈᤡ᤺ᤳᤋᤢ᤹ᤖᤥ ᤜᤧᤰᤁᤩᤠᤱ ᤂᤢᤏᤡ᤹ ᤑᤧᤴ ᤕᤠ᤺ᤶᤒᤰᤁᤡᤴ ᤏᤡᤎᤠ᤺ᤵ ᤑᤠ᤹ᤀᤠᤱ ᤔᤧᤃᤡᤀᤠᤱ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤔᤧᤴᤍᤠ᤺ᤏᤧᤴᤗᤥ॥

²¹ᤁᤖ ᤀᤠᤳᤋᤡᤴᤜᤠ᤹ ᤛᤧᤰᤂᤠᤀᤥ ᤗᤠᤱᤔᤧᤄᤣ᤺ᤰ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤈᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤏᤡᤎᤠ᤺ᤵᤗ ᤑᤠ᤹ᤀᤠᤱ ᤂᤧᤱᤜᤠ᤹ ᤀᤥ᤺ᤳᤋᤡᤀᤥ ᤔᤧᤍᤠᤖᤥ॥”

²²ᤂᤧᤴ ᤀᤣᤃᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤔᤗᤠᤶᤒᤠ ᤕᤜᤢᤍᤡᤕᤠ ᤌᤢᤶ ᤁᤒᤪᤡᤱᤒᤠ ᤗᤠᤈᤣ᤹ᤀᤥ ᤔᤧᤒᤣᤀᤠᤱ ᤂᤧᤵᤔᤥ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤘᤕᤧᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖᤥ॥

²³ᤂᤧᤴ ᤕᤧᤶᤔᤥ ᤕᤢᤜᤢᤴᤏᤠ᤺ᤴ ᤛᤠᤗᤡᤶ ᤐᤠᤱᤈᤢᤶᤔᤡᤸᤗᤧ ᤁᤢᤒᤣᤛᤠᤱ ᤀᤣᤏᤥᤏ ᤔᤧᤵᤔᤏᤠᤒᤠ ᤋᤧᤴᤏᤥ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤕᤠᤃᤧ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤕᤖᤡᤰ ᤆᤫᤠ᤺ᤳ ᤏᤧᤛ᤻ᤛᤧᤀᤠᤱ ᤔᤏᤠᤜᤠ᤹ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤂᤧᤵᤔᤥ ᤔᤧᤍᤩᤧᤖ ᤔᤧᤘᤕᤧᤖᤥ॥

²⁴(ᤁᤴ ᤒᤵᤋᤡᤛ᤻ᤔᤠ ᤐᤡᤔᤠ ᤕᤠ᤺ᤶᤒᤰᤁᤡᤱᤃ ᤕᤢᤜᤢᤴᤏᤠ᤺ᤴ ᤐᤢᤱᤗᤠᤜᤡᤶᤔᤥ ᤛᤠᤰᤔᤠᤏᤢ᤺ᤸᤗᤧ ᤋᤃᤡᤒᤠ ᤐᤠ᤺ᤴ ᤘᤕᤧᤖᤥ॥)

²⁵ᤕᤢᤜᤢᤴᤏᤠ᤺ᤸᤗᤧ ᤁᤢᤓᤠ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤜᤢᤍᤡᤎᤡᤰᤏᤢ ᤛᤣᤛᤣ ᤆᤥ᤺ᤰᤛᤡᤱᤔᤠ ᤌᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤴᤎᤱ ᤐᤥ᤺ᤰᤂᤧᤖᤥ॥