ᤕᤢᤜᤢᤴᤏᤠ 19:14-22

¹⁴ᤜᤧᤰᤁᤩᤠᤱ ᤁᤱᤃ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧ ᤌᤡᤰ ᤕᤧᤴ ᤋᤃᤡ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧ॥ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤁᤵᤔᤥ ᤘᤠ᤹ᤖᤥ॥”

¹⁵ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ ᤛᤠ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤔᤧᤳᤋᤢ. “ᤂᤧᤴ ᤋᤣ᤹ᤖᤧ᤹ᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄” ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤢᤱᤒᤠᤒᤡ᥅” ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤜᤠᤱᤅᤡᤱᤃ ᤛᤡᤈᤖᤧᤴᤗᤰᤗᤥ॥”

¹⁶ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤖ ᤑᤠ᤹ᤀᤠᤱ ᤜᤢᤰᤛᤢᤵᤋᤢᤛᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤔᤧᤍᤣ᤹ᤖᤢᤖᤥ॥

¹⁷ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤔᤧᤃᤢ᤺ᤳᤋᤢᤀᤠᤱ ᤔᤡᤰᤂᤥ᤺ᤰᤐᤠ ᤁᤥ᤺ᤰᤔᤠᤀᤥ ᤔᤧᤍᤣ᤹ᤖᤢᤖᤥ॥ (ᤂᤧᤴ ᤁᤥ᤺ᤰᤔᤠᤴ ᤜᤡᤒᤪᤢ ᤐᤠ᤺ᤴᤏᤥ ᤃᤗᤃᤌᤠ ᤔᤧᤔᤧᤳᤋᤢᤖᤥ॥)

¹⁸ᤂᤧᤵᤔᤥ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢ॥ ᤂᤢᤏᤧ᤹ ᤁᤢᤈᤢᤵᤛᤠᤱ ᤏᤢ ᤁᤢᤓᤧᤴᤇᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤏᤧᤵᤑᤢ ᤔᤏᤠᤜᤠ᤹ᤀᤠᤱ ᤔᤧᤓᤥ᤺ᤴᤍᤢᤛᤡᤖᤥ॥

¹⁹ᤐᤡᤗᤠᤋᤛᤖᤧ ᤏᤠᤛᤖᤋᤒᤠ ᤕᤧᤛᤢ ᤕᤜᤢᤍᤡ ᤜᤠᤱ ᤗ᤹ᤖᤡᤰ ᤁᤧᤒᤵᤐᤠ ᤀᤠᤵᤋᤡᤰ ᤛᤰᤁᤡᤴ ᤛᤠᤵᤋᤢᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤶᤔᤠ ᤐᤠᤱᤄᤢᤛᤡᤖᤥ॥

²⁰ᤂᤧᤴ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤔᤧᤏᤡ᤺ᤖᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤧᤴᤏᤡᤴ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱᤅᤣ ᤏᤧᤛ᤻ᤛᤧ ᤜᤧᤰᤁᤩᤠᤱ ᤂᤧᤱᤃ ᤜᤡᤒᤪᤢ. ᤗᤩᤠᤋᤡᤏ ᤏᤢ ᤃᤪᤡᤁ ᤐᤠ᤺ᤴᤍᤠᤱᤅᤥ ᤛᤠᤵᤋᤧᤀᤠᤱ ᤐᤳᤇᤧ॥

²¹ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤐᤡᤗᤠᤋᤛᤧᤴ ᤀᤰᤂᤣ ᤔᤧᤔᤧᤳᤋᤢᤖ ᤔᤧᤀᤳᤋᤢᤖᤥ. “ᤂᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤗ᤹ᤖᤡᤰ ᤔᤧᤛᤠᤵᤋᤧᤴᤏᤧ᤹ᤀᤥ. ᤁᤖ ᤁᤴ ᤔᤏᤠ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤀᤠ ᤗ᤹ᤖᤡᤰ ᤐᤠ᤺ᤳᤋᤢᤖᤥ ᤗ᤹ᤖᤡᤰ ᤛᤠᤵᤋᤧ᤹ᤀᤥ॥”

²²ᤁᤖ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤆᤩᤠ ᤛᤠᤵᤋᤢᤱ. ᤂᤧᤴ ᤛᤠᤵᤋᤢᤱ ᤛᤠᤵᤋᤢᤱ॥”