ᤕᤢᤜᤢᤴᤏᤠ 19:14-22 in Limbu

¹⁴ ᤜᤧᤰᤁᤩᤠᤱ ᤁᤱᤃ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧ ᤌᤡᤰ ᤕᤧᤴ ᤋᤃᤡ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧ॥ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤁᤵᤔᤥ ᤘᤠ᤹ᤖᤥ॥”

¹⁵ ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ ᤛᤠ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤔᤧᤳᤋᤢ. “ᤂᤧᤴ ᤋᤣ᤹ᤖᤧ᤹ᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄” ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤢᤱᤒᤠᤒᤡ᥅” ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤜᤠᤱᤅᤡᤱᤃ ᤛᤡᤈᤖᤧᤴᤗᤰᤗᤥ॥”

¹⁶ ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤖ ᤑᤠ᤹ᤀᤠᤱ ᤜᤢᤰᤛᤢᤵᤋᤢᤛᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤔᤧᤍᤣ᤹ᤖᤢᤖᤥ॥

¹⁷ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤔᤧᤃᤢ᤺ᤳᤋᤢᤀᤠᤱ ᤔᤡᤰᤂᤥ᤺ᤰᤐᤠ ᤁᤥ᤺ᤰᤔᤠᤀᤥ ᤔᤧᤍᤣ᤹ᤖᤢᤖᤥ॥ (ᤂᤧᤴ ᤁᤥ᤺ᤰᤔᤠᤴ ᤜᤡᤒᤪᤢ ᤐᤠ᤺ᤴᤏᤥ ᤃᤗᤃᤌᤠ ᤔᤧᤔᤧᤳᤋᤢᤖᤥ॥)

¹⁸ ᤂᤧᤵᤔᤥ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢ॥ ᤂᤢᤏᤧ᤹ ᤁᤢᤈᤢᤵᤛᤠᤱ ᤏᤢ ᤁᤢᤓᤧᤴᤇᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤏᤧᤵᤑᤢ ᤔᤏᤠᤜᤠ᤹ᤀᤠᤱ ᤔᤧᤓᤥ᤺ᤴᤍᤢᤛᤡᤖᤥ॥

¹⁹ ᤐᤡᤗᤠᤋᤛᤖᤧ ᤏᤠᤛᤖᤋᤒᤠ ᤕᤧᤛᤢ ᤕᤜᤢᤍᤡ ᤜᤠᤱ ᤗ᤹ᤖᤡᤰ ᤁᤧᤒᤵᤐᤠ ᤀᤠᤵᤋᤡᤰ ᤛᤰᤁᤡᤴ ᤛᤠᤵᤋᤢᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤶᤔᤠ ᤐᤠᤱᤄᤢᤛᤡᤖᤥ॥

²⁰ ᤂᤧᤴ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤔᤧᤏᤡ᤺ᤖᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤧᤴᤏᤡᤴ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱᤅᤣ ᤏᤧᤛ᤻ᤛᤧ ᤜᤧᤰᤁᤩᤠᤱ ᤂᤧᤱᤃ ᤜᤡᤒᤪᤢ. ᤗᤩᤠᤋᤡᤏ ᤏᤢ ᤃᤪᤡᤁ ᤐᤠ᤺ᤴᤍᤠᤱᤅᤥ ᤛᤠᤵᤋᤧᤀᤠᤱ ᤐᤳᤇᤧ॥

²¹ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤐᤡᤗᤠᤋᤛᤧᤴ ᤀᤰᤂᤣ ᤔᤧᤔᤧᤳᤋᤢᤖ ᤔᤧᤀᤳᤋᤢᤖᤥ. “ᤂᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤗ᤹ᤖᤡᤰ ᤔᤧᤛᤠᤵᤋᤧᤴᤏᤧ᤹ᤀᤥ. ᤁᤖ ᤁᤴ ᤔᤏᤠ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤀᤠ ᤗ᤹ᤖᤡᤰ ᤐᤠ᤺ᤳᤋᤢᤖᤥ ᤗ᤹ᤖᤡᤰ ᤛᤠᤵᤋᤧ᤹ᤀᤥ॥”

²² ᤁᤖ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤆᤩᤠ ᤛᤠᤵᤋᤢᤱ. ᤂᤧᤴ ᤛᤠᤵᤋᤢᤱ ᤛᤠᤵᤋᤢᤱ॥”

¹⁴ हे़क्‍क्‍याङ् कङ्‌ग यहुदि चोःक्‌युम्‍भो तङ्‌नाम्‍मिल्‍ले़ थिक् ये़न् तगि ले़न्‍दिक् पोःक्‍खे़र पत्‍छे़॥ पिलातसरे़ खे़ङ्‌हाॽ मे़त्तुसि, “खिनिॽ हाङ्‌ङिन् कप्‍मो वाॽरो॥”

¹⁵ हे़क्‍केःल्‍ले़ यहुदिहाॽ साॽरिक् मे़अःक्‍ते़र मे़मे़त्तु, “खे़न् तेॽरे़ॽआङ् सिलाम्‍साक्‍मा सिङ्सम्‍दाङ् फोःन्‍दे़ॽ!” हे़क्‍केःल्‍ले़ पिलातसरे़ सेःन्‍दोसुसि, “खिनिॽ हाङ्‌ङिन् सिलाम्‍साक्‍मा सिङ्सम्‍दाङ् फोःन्‍दुङ्‌बाबि?” तुम्निङ्‌वाॽफुसाम्‍बाहाॽरे़ नोगप् मे़बिरु, “आनिगे़ हाङ्‌ङिङ्‌ग सिजरे़न्‍लक्‍लो॥”

¹⁶ हे़क्‍केःल्‍ले़ पिलातसरे़ ये़सुःन् सिलाम्‍साक्‍मा सिङ्सम्‍दाङ् मे़भोःन्‍दुर फाॽआङ् हुक्‍सुप्‍तुसिरो॥ खे़ल्‍ले़ चोगुल्‍ले़ थक्‍सुबाहाॽरे़ ये़सुःन् खे़प्‍मोलाम् मे़देॽरुरो॥

¹⁷ खे़ङ्‌हाॽरे़ ये़सुःन् कुसिलाम्‍साक्‍मा सिङ्‌ङिन् मे़गुःत्तुआङ् मिक्‍खोःक्‍पा कोःक्‍माओ मे़देॽरुरो॥ (खे़न् कोःक्‍मान् हिब्रु पाःन्‍नो गलगथा मे़मे़त्तुरो॥)

¹⁸ खे़प्‍मो ये़सुःन् सिलाम्‍साक्‍मा सिङ्‌ङो मे़भोःन्‍दु॥ खुने़ॽ कुजुप्‍साङ् नु कुभे़न्‍छाङ्‌बा सिलाम्‍साक्‍मा सिङ्‌हाॽ सम्‍दाङ् ने़प्‍फु मनाहाॽआङ् मे़भोःन्‍दुसिरो॥

¹⁹ पिलातसरे़ नासरतबा ये़सु यहुदि हाङ् लॽरिक् के़बप्‍पा आप्‍तिक् सक्‍किन् साप्‍तुआङ् सिलाम्‍साक्‍मा सिङ्सम्‍दाङ् फम्‍मा पाङ्‌घुसिरो॥

²⁰ खे़न् यरिक् यहुदिहाॽरे़ मे़निःरुरो, थेआङ्‌भे़ल्‍ले़ खे़न् ते़न्‍निन् ये़क्‌यक्‍किल्‍ले़ कुबेसाङ्‌ङे ने़स्‍से़ हे़क्‍क्‍याङ् खे़ङ्‌ग हिब्रु, ल्‍यातिन नु ग्रिक पाःन्‍दाङ्‌ङो साप्‍ते़आङ् पत्‍छे़॥

²¹ यहुदिहाॽरे़ खुनिॽ तुम्निङ्‌वाॽफुसाम्‍बाहाॽरे़ पिलातसे़न् अक्‍खे मे़मे़त्तुर मे़अत्तुरो, “खे़न् यहुदिहाॽरे़ खुनिॽ हाङ् लॽरिक् मे़साप्‍ते़न्‍ने़ॽओ, कर कन् मनाःल्‍ले़ यहुदिहाॽरे़ खुनिॽ हाङ्‌आ लॽरिक् पाःत्तुरो लॽरिक् साप्‍ते़ॽओ॥”

²² कर पिलातसरे़ खे़ङ्‌हाॽ मे़त्तुसि, “इङ्‌गाॽ च्‍या साप्‍तुङ्, खे़न् साप्‍तुङ् साप्‍तुङ्॥”