ᤔᤷᤁᤢᤛ 7:24-32

²⁴ᤕᤧᤛᤢ᤺ᤴ ᤂᤧᤴ ᤋᤧᤴᤏᤥᤗᤠᤶ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤒᤠ ᤌᤢᤶᤜᤠ᤹ᤀᤥ ᤐᤣᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰ ᤜᤡᤶᤔᤥ ᤗᤠ᤺ᤛᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤵᤔᤥ ᤋᤩᤧᤒᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤏᤡᤱᤘᤠ᤹ ᤔᤧᤱᤄᤥ᤺ᤛᤢᤴᤗ ᤁᤧᤗ᤹ᤒᤠ ᤀᤡ᤺ᤳᤋᤢᤀᤠᤱ ᤘᤕᤧ॥ ᤁᤖ ᤂᤢᤏᤧ᤹ ᤆᤡᤱᤛᤡᤱᤔᤠ ᤔᤧᤛᤢᤰᤋᤧᤴᤗᤥ॥

²⁵ᤁᤖ ᤁᤢᤛ᤻ᤛᤠ᤺ᤴ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤁᤧᤘᤠ᤹ᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤂᤢᤏᤧ᤹ ᤋᤩᤧᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤏᤠᤔᤧ᤺ᤴᤏᤣ ᤕᤧᤛᤢᤖᤥ ᤋᤩᤧᤀᤠᤱ ᤁᤢᤗᤠᤱᤈᤰᤐᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱ॥

²⁶ᤂᤧᤴ ᤔᤧᤴᤇᤢᤔᤠ᤺ᤴ ᤛᤡᤖᤡᤕᤠ ᤗᤠᤈᤣ᤹ᤛ᤻ᤔᤠ ᤛᤢᤖᤥᤑᤥᤏᤡᤛᤡᤕᤠ ᤌᤢᤶᤔᤥ ᤛᤠᤃᤧᤘᤠ᤺ᤴᤇᤡᤱᤔᤠ ᤌᤡᤶᤔᤧᤴᤍᤱ ᤛᤢᤘᤠᤱᤛ᤻ᤔᤠ ᤘᤕᤧ॥ ᤂᤧᤸᤗᤧ ᤀᤠᤛ᤻ᤛᤠ᤺ ᤆᤢᤰᤔᤧᤸᤗᤥᤗᤠᤶ ᤑᤧᤴᤛᤠᤶᤜᤠ᤹ ᤗ᤺ᤳᤋᤠᤱ ᤐᤡᤖᤠᤱᤅᤧ᤹ᤏᤠ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤑᤠᤰᤋᤢ॥

²⁷ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤖᤧ᤺ᤱᤅᤡᤴ ᤂᤠᤄᤠ ᤔᤧᤈᤖ ᤐᤥ᤺ᤱ॥ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱᤅᤡᤴ ᤏᤠᤵᤔᤠᤛᤡᤀᤠᤱ ᤁᤥ᤺ᤳᤆᤥᤜᤠ᤹ ᤐᤡᤔᤠᤛᤡ ᤏᤢ᤺ᤒᤠ ᤔᤧ᤺ᤴᤗᤥ॥”

²⁸ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤛᤧᤰᤂᤠᤀᤣᤖᤥ ᤀᤠᤍᤠᤱᤒᤣ. ᤁᤖ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤔᤧᤈᤖᤥ॥”

²⁹ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤏᤢ᤺ᤒᤠ ᤏᤛᤠ᤺ᤴ ᤁᤢᤎᤡᤶᤒᤠ ᤏᤥᤃᤵ ᤁᤧᤒᤡᤖᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤧᤜᤡᤶᤔᤥ ᤐᤣᤃᤧ᤹. ᤁᤧᤛ᤻ᤛᤠ᤺ ᤆᤢᤰᤔᤧᤸᤗᤥᤗᤠᤶ ᤑᤧᤴᤛᤠᤶᤔᤡᤴ ᤗ᤺ᤴᤍᤧ ᤐᤣᤀᤠᤱ ᤘᤠ᤹ᤖᤥ॥”

³⁰ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤁᤢᤜᤡᤶᤔᤥ ᤏᤢ᤺ᤰᤂᤧ ᤐᤣᤀᤠᤱ ᤁᤢᤛ᤻ᤛᤠ᤺ᤴ ᤏᤢ᤺ᤖᤡᤰᤁᤠᤱ ᤁᤢᤏᤧᤳᤏᤠᤀᤥ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤒᤠ ᤋᤢᤔᤢ. ᤌᤣᤀᤠᤱᤓᤧᤸᤗᤧ ᤑᤧᤴᤛᤠᤶᤜᤠ᤹ᤖᤧ ᤂᤧᤴ ᤔᤧᤗᤧᤖᤢ ᤔᤧᤎ᤺ᤀᤠᤱ ᤘᤕᤧ॥

³¹ᤕᤧᤛᤢ᤺ᤴ ᤋᤠᤕᤖᤗᤠᤶ ᤛᤡᤍᤥᤏ ᤐᤥ᤺ᤰᤂᤧᤖ ᤐᤣᤀᤠᤱ ᤂᤢᤏᤧ᤹ ᤃᤠᤗᤡᤗ ᤘᤖᤰ ᤏᤢ ᤌᤡᤒᤥ᤺ᤱ ᤐᤠᤱᤈᤢᤶᤔᤡᤸᤗᤧᤴ ᤌᤢᤶᤔᤥ ᤐᤣᤖᤥ॥

³²ᤂᤧᤵᤔᤥ ᤔᤏᤠᤜᤠ᤹ᤖᤧ ᤏᤠᤎᤠᤰᤐᤠ ᤏᤢ ᤁᤢᤒᤠ᤺ᤴ ᤔᤧᤴᤗ᤺ᤶᤔᤏᤠᤒᤠ ᤔᤏᤠᤎᤡᤰ ᤔᤧᤍᤠᤖᤢᤀᤠᤱ ᤕᤧᤛᤢᤖᤧ ᤁᤢᤜᤢᤰᤁᤡᤴ ᤁᤢᤛᤶᤍᤠᤱ ᤏᤧᤛ᤻ᤛᤢᤏᤡ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥