ፒልሞና 1

1

¹ዬሱስ ኪርስቶሳ ጊሽ ቃሼቲዳ ታፔ ጳዉሎሳፔኔ ኑ ኢሻ ፂምቶሳፔ ኑ ሲቆ ኢሻ ጊዲዲ ኑናራ ኢሲፌ ኦꬂዛ ፒልሞናስ፤

²ኔ ኬꬃን ሺቂዛ ኣማኒዛ ኣሳሲኔ ኑ ሚቼዮ ኣምፒብያስ ቃሴካ ኑናራ ኢሲፌ ኪርስቶሳ ዎታዳራ ጊዲዳ ኣርኪጳሴስ፤

³ኑ ኣዋ ፆሳፌ ኑ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ።

⁴ታኒ ታ ዎሳን ኔና ቆፓሼ ኡባ ዎዴ ፆሳ ጋላታይስ።

⁵ጋሶይካ ኔ ፆሳ ኣሳ ሲቂዛይሳኔ ጎዳ ዬሱስ ኪርስቶሳን ኔ ኣማኒዛይሳ ታ ሲያዲስ።

⁶ኑኒ ኪርስቶሳስ ጊዲዳይሳኔ ኑስ ዲዛ ሎዖ ዮዖይ ዉሪ ቆንጬን ኤሬታና ማላ ኔካ ኔ ኣማኖ ሃራ ኣሳስ ቤሳና ማላ ታ ኔስ ሚና ዎሳይስ።

⁷ታ ኢሻዞ! ኔ ሃኖን ፆሳ ኣሳ ዎዝናይ ኦራፂዳ ጊሽ ኔ ሲቆይ ታ ዎዝና ኬሂ ሚንꬂዴስ።

⁸ሄሳ ጊሽ ኔ ኦꬃናስ ቤሲዛይሳ ኦꬃና ማላ ኔና ኣዛዛናስ ታስ ኪርስቶሳን ፃላቴꬅ ዴስኮሺን።

⁹ጊዲኮካ ታ ኔና ኣዛዛናፔ ሲቆራ ዎሳይስ። ጋሶይካ ታኒ ዬሱስ ኪርስቶሳ ጊሽ ቃሼታዳ ቃሾ ኬꬃን ዲዛ ጳዉሎሳ።

¹⁰ታ ኔና ዎሲዛይ ታ ቃሾ ኬꬃን ዳሼ ዬሱስ ኪርስቶሳን ዬሊዳ ና ኣናስሞሳ ጊሻሳ።

¹¹ኣናስሞሲ ሃይሳፌ ካሴ ኔና ጎዒቤና ሺን ሃዒ ጊዲኮ ኢዚ ኔናካ ታናካ ጎዒዛዴ።

¹²ታ ሃዒ ኢዛ ኔኮ ዛራ ዬዳዲስ። ታ ኔኮ ዬዲዛይ ኢዛ ጊዶንታ ታ ዎዝና ኔኮ ዛራ ዬዲዛ ማላ ቆዳይስ።

¹³ሚሺራቾ ቃላ ጋሶን ታ ሃን ቃሼታ ዲሺን ኔ ታና ኦꬃ ማዳናይሳ ኢዚ ታናራ ዴዪዳኮ ታና ኡፋይሴስ።

¹⁴ጊዶ ኣቲን ኔ ሎዖ ኦሶይ ኔ ዶሳንፔ ኣቲን ዎልቃራ ጊዶንታ ማላ ጋዳ ኔና ኦይቾንታ ኣይኮካ ኦꬃና ኮያቤይኬ።

¹⁵ኣናስሞሲ ሃኖ ጋካናስ ኔፔ ጉꬃ ዎዴ ሻኬቲኮካ ኦኔ ኤሪዛይ ሃይሳፌ ጉዬ ኡባ ዎዴ ኔናራ ዳና ዳንዳዬስ።

¹⁶ሃይሳፌ ጉዬ ኢዚ ኔናራ ዳናይ ኣይሌ ማላ ጊዶንታ ኣይሌፌ ኣꬊ ኔስ ኣሾ ኢሻ ማላ ጊዳና። ኢዚ ታስ ዶሴቲዳ ኢሻ። ጊዶ ኣቲን ኢዚ ኔና ኦꬂ ጎዓና ኣስ ጊዲዳ ጊሺኔ ኢዚ ኔስ ኪርስቶሳ ባጋራ ኢሻ ጊዲዳ ጊሽ ኔስ ኬሂ ዶሴቲዳዴ ጊዳና።

¹⁷ኑስ ዲዛ ኢሲፌቴꬃ ጋሶን ኔ ታና ኔስ ኢሻ ማላ ቆዲዛ ጊዲኮ ታና ኔ ሞካ ኤኪዛ ማላ ኢዛካ ሞካ ኤካ።

¹⁸ኢዚ ኔ ቦላ ጋꬂዳ ቆሆይ ዲኮ ዎይኮ ኔ ኣጮይ ኢዛ ቦላ ዲኮ ኢዛ ኣጮዛ ታ ቦላ ቆዳ።

¹⁹ሄኮ ታ ጳዉሎሲ “ኢዛ ኣጮዛ ታ ኔስ ቃንፃና” ጋዳ ታ ኩሼራ ፃፋዲስ። ጊዲኮካ ኔ ኪርስቶሳ ኣማኒዳይ ታ ባጋራ ጊዲዳ ጊሽ ሃራይ ኣቶሺን ኔካ ታስ ቃንፃና ኣጮይ ዲዛዴ ጊዲዳይሳ ታ ኔና ኤሪሳናስ ኮሼና።

²⁰ሂዓ ታ ኢሻዞ ሄሳ ሎዖ ኦሶ ኔ ታስ ኦꬃና ማላ ጎዳ ሱንꬃን ኪርስቶሳ ጊሽ ጋዳ ኔ ታ ዎዝና ሼምፒሳና ማላ ኔና ዎሳይስ።

²¹ታ ኔስ ሃይሳ ፃፊዳይ ኔ ታስ ኣዛዜታናይሳ ኣማናዳኮ! ታ ኔና ኦይቺዳይሳፌ ኔ ኣꬃ ኦꬃናይሳ ታ ኤራይስ።

²²ፆሲ ኢንቴ ዎሳ ሲይዲ ታ ኢንቴኮ ባና ማላ ታስ ሂዶታይ ዲዛ ጊሽ ታ ባዳ ኢንቴኮን ሼምፓናሶ ታስ ሃያና ጊጊሳ።

²³ዬሱስ ኪርስቶሳ ጋሶን ታናራ ቃሼቲዳ ኤጳፒራይ ኔና ሳሮ ጌስ።

²⁴ሄሳꬆካ ታናራ ኦꬂዛይቲ ማርቆሲ ኣርሲፂሮኮሲ፥ ዴማሲኔ ሉቃሲ ኔና ሳሮ ጌቴስ።

²⁵ጎዳ ዬሱስ ኪርስቶሳ ኪያቴꬅ ኢንቴናራ ጊዶ።