ዮሓኒሴ 3:24-35

²⁴ዬማና ዮሓኒሴ ሓጊ ቱኡዞ ማኣራ ቱኡቲባኣሴ።

²⁵ዒዛኮ ጊንፆ ሃንታዞንሢና ፔቴ'' ዓይሁዴ ዓሲስኬያና ባኣካ'' ዑፆ ጌኤሺፆ ካኣዦ ዛሎ'' ማርማ ዔቄኔ።

²⁶ዮሓኒሴኮ ጊንፆ ሃንታዞንሢ ዮሓኒሴ ኮራ ሙካዖ፦ «ዔርዛሢዮ! ዬይ ዮርዳኖሴ ዎሮ ሱኮይዳ ኔኤና ዎላ'' ዓኣሢ፥ ኔኤኒ ዒዛ ዛሎ'' ማርካዼሢ፥ ሓይሾ ዒዚያ ዋኣሢና ማስካኔ፤ ዓሳ ቢያ ሴካ ዒዛ ባንሢ ዓኣዻኔ» ጌዔኔ።

²⁷ዮሓኒሴ ማሃዖ፦ «ዓይጎ ዓሲታቶዋ ፆኦሲ ዒዛም ዒንጊባኣታቴ ዓይጎ ባኣዚ''ያ ዒዛኮ ዓኣያ ማዓኒ ዳንዳዑዋሴ፤

²⁸‹ዒዛኮ ቤርታ ታ ዳኪንቴያፓዓቴም ታኣኒ ሜሲሔቱዋሴ› ጌዒ ታ ዒንሢም ኬኤዜሢኮ ዒ'ንሢ ዒንሢ ቶኦኪና ታኣኮ ማርካኬ።

²⁹ዑኡቴላ ዑኡታሢሮኬ፤ ዑኡታሢኮ ዔርጎና ዓሢ ጋዓንቴ ዑኡታሢኮ ዓጫ ዔቂ፥ ዑኡታሢ ዑኡዞ ዋይዛኣና ዎዛዻኔ፤ ዬያጉዲ ታኣኮዋ ዎዛ'' ሃሢ ጎኔ ዎዛ'' ማዔኔ።

³⁰ዒዚ ዼ'ጊ ዼ'ግ ጌዔም፥ ታኣኒ ሂርኪ ሂርኪ ጋዓንዳያ ኮይሳኔ» ጌዔኔ።

³¹ዮሓኒሴ ሓሣ፦ «ዑፃፓ ሙካሢ ቢያኮ ዑሣኬ፤ ሳዓፓ ማዔሢ ሳዓ ዓሲኬ፤ ሳዓ ባኣዚ'' ዒ ኬኤዛኔ፤ ጫሪንጫፓ ሙካሢ ቢያኮ ዑፃኣኬ።

³²ዒዚ ዛጌሢና ዋይዜሢ ማርካዻኔ፤ ጋዓንቴ ዒዛኮ ማርካዺፆ ዔካይ ባኣሴ፤

³³ዒዛኮ ማርካዺፆ ዔካሢ ጋዓንቴ ፆኦሲ ጎኔ ማዔሢ ጌኤሺ'' ዔሬኔ።

³⁴ፆኦሲ ዳኬሢ' ፆኦሲ ቃኣላ ኬኤዛኔ፤ ፆኦሲያ ፔኤኮ ዓያኖ ሚርጌና ዒዛም ዒንጋኔ።

³⁵ዓዴ፡ ፔኤኮ ናዓሢ ናሽካኔ፤ ቢያ ባኮ ዒዛ ኩጫ ዒንጌኔ።