ዮሓኒሴ 20:8-17

⁸ዬካፓ ሓሣ ዬይ ቤርታ ሄሌ''፥ ዬሱሴ ጊንፆ ሃንታሢ ዱኡፖ ዔቶ'' ጌሊ ዛጋዖ ዬይ ጎኔ ማዔሢ ጉሙርቄኔ።

⁹ዒማ''ና፦ «ሓይባ''ፓ ዒዚ ዔቃንዳያ ኮይሳኔ» ጋዓ ጌኤዦ ማፃኣፖ ቃኣሎ'' ዔያታ ማሊ ጶቂሢ ዔሪባኣያኬ።

¹⁰ዬካፓ ዬንሢ ላምዖ ዬሱሴ ጊንፆ ሃንታዞንሢ ማዒ ፔ ማኣሪ ዓኣዼኔ።

¹¹ዒማ''ና ሜግዴላ ዓጮ'' ማይራማ ዬኤኪ ዬኤኪ ዱኡፖ ኮይላ'' ዔቂ ዓኣዖ፥ ሂርኪ ጌይ ዱኡፖ ዔቶ'' ጋሮ ዛጌኔ።

¹²ዒዛ ዛጋንቴ ዬሱሴኮ ሌዛ ዓኣ ቤዞይዳ ቦኦሬ ማኣዖ ማይንቴያ፥ ላምዖ ኪኢታንቾስኬንሢ ፔቴ'' ኬሮ'' ኬዴ'' ፔቴ''ሢ ቶኮ'' ዛላ'' ዴዒ ዓኣንቴ ዒዛ ዴንቄኔ።

¹³ዬንሢ ማይራሞ ኮራ፦ «ዔና! ዓይጎሮ ኔ ዬኤካይ?» ጋዓዛ፥ ዒዛ ማሃዖ፦ «ታ ጎዳሢ ሃካፓ ዔኮናኔ፤ ዓንካ ጌሦናቴያ ታ ዔሩዋሴ» ጌዔኔ።

¹⁴ዬያ ዒዛ ጋዓዖ ጊንሢም ሺሪ፥ ዬሱሴ ዔቂ ዓኣንቴ ዴንቄኔ፤ ጋዓንቴ ዬይ ዬሱሴ ማዔሢ ዒዛ ዔሪባኣሴ።

¹⁵ዬሱሴ ዒዞ ኮራ፦ «ዔና ኔ ዓይጎሮ ዬኤካይ? ሓሣ ኔ ዖና ኮዓይ?» ጌዔኔ፤ ዒዞም ዬይ ዓሢ ሚፆ ቱኮ''ና ቤዛ ማዻ ዓሲ ማሌሢሮ፦ «ጎዳሢዮ! ኔኤኒ ዒዛ ዔኬቴ ዎካ ኔ ዒዛ ጌሤቶ ሓዳራ ታኣም ኬኤዜ፤ ታኣኒ ዒዛ ዔካንዳኔ» ጌዔኔ።

¹⁶ዒማ''ና ዬሱሴ፦ «ማይራሜ» ዒዞ ኮራ ጋዓዛ፥ ዒዛ ዒዛ ባንሢ ሺራዖ ዔብሬ ዓሲ ሙኡቺና «ሬቡኒ» ጌዔኔ፤ ዬኖኮ ቡሊ''ፃ «ዔርዛሢዮ!» ጌይሢኬ።

¹⁷ዬሱሴ ዒዞም፦ «ሓጊ ታኣኒ ሌካ ታ ዓዶ ባንሢ ኬስኪባኣሢሮ ታና ዓርቂፖ፤ ጋዓንቴ ታ ጌርሲንሢ ኮራ ዓኣዺጋፓ ‹ታኣኒ ሌካ ታ ዓዶና ዒንሢ ዓዶና ባንሢ፤ ሃሣ ታ ጎዳ ማዔ ፆኦዛሢና ዒንሢኮዋ ጎዳ ማዔ ፆኦዛሢ ባንሢ ታ ዔውታንዳኔ ጌዔኔ› ጌይ ዔያቶም ኬኤዜ» ጌዔኔ።