ዮሃኒሳ 2:3-12

³ዎይኔ ኡሻይ ዉሪን፥ ዬሱሳ ኣያ ዬሱሳኮ፥ «ኤንታው ዎይኔ ኡሻይ ዉሪስ» ያጋሱ።

⁴ዬሱሲ ዛሪዲ፥ «ታ ኣዬ፥ ኔ ሃይሳን ጌሎፓ? ታ ዎዴይ ቡሮ ጋኪቤና» ያጊስ።

⁵ዬሱሳ ኣያ ኦሳንቾታኮ፥ «ኢ ሂንቴው ኦዲያባ ኣይቢባ ጊዲኮካ ኦꬂቴ» ያጋሱ።

⁶ኣይሁዴቲ ባንታ ጌሾ ዎጋስ ጎዔቲያ ኡሱፑን ሹቻ ባꬃቲ ሄ ቤሳን ዴዖሶና። ኢሲ ኢሲ ባꬃይ ናምዑ ዎይኮ ሄꬑ ፁጋ ኦይኬስ።

⁷ዬሱሲ ኦሳንቾታኮ፥ «ባꬃታን ሃꬄ ኩንꬂቴ» ያጊስ። ኤንቲ ባꬃታስ ዶና ጋካናው ሃꬄ ኩንꬂዶሶና።

⁸ዬሱሲ ኤንታኮ፥ «ሃዒ ዱቂዲ ያጋኑዋ ኣዋቴꬃን ፖሊሴይሳስ ኢሚቴ» ያጊስ። ኤንቲ ኢያው ኤፊዲ ኢሚዶሶና።

⁹ያጋኑዋ ኣዋቴꬃን ፖሊሴይሲ ዎይኔ ኡሺ ላሜቲዳ ሃꬃ ጋንፂ ኤኪዲ ኣዉፔ ዪዳኮ ኤሪቤና፥ ሺን ሃꬃ ኩንꬂዳ ኦሳንቾቲ ኤሮሶና። ያጋኑዋ ኣዋቴꬃን ፖሊሴይሲ ማቺው ኤኬይሳ ፄጊዲ፥

¹⁰«ኦኒካ ሎዖ ዎይኔ ኡሻ ኣሳ ኮይሮቲዲ ኡሼስ። ያቲዲ ኣሳይ ኡዪ ካሊዳፔ ጉዬ ቂራሪያ ኢሜስ። ሺን ኔኒ ሎዖ ዎይኔ ኡሻ ሃኖ ጋካናው ዎꬃ ኣጋዳሳ» ያጊስ።

¹¹ዬሱሲ ሃ ኮይሮ ማላታ ጋሊላ ቢታን ቃና ካታማን ኦꬂስ፤ ሄሳን ባ ጊታቴꬃ ቤሲስ። ኢያ ታማሬቲ ኢያ ኣማኒዶሶና።

¹²ሄሳፌ ጉዬ፥ ዬሱሲ ባ ኣዬራ፥ ባ ኢሻታራኔ ባ ታማሬታራ ኢሲፌ ቂፊርናሆሜ ካታማ ቢዲ ጉꬃ ጋላስ ጋምዒስ።