San Juan 2:3-12

³Ijouna'ma al vino. Qui'máma' Jesús u'i'ma, timi: ―Joupa ijounapa al vino. Ailopa'a.

⁴Jesús italai'e'e'ma qui'máma', timi: ―Momá, ¿te caƚmicopa toƚta'a? A'i quixhuaiya lai'hora.

⁵Qui'máma' timila' notoc'iyalepá: ―Tonƚ'eƚe lomiyacolhuo' jiƚquiya.

⁶Jiƚpiya timana' acamts'us lan tsila' capixú lilanc'ecompola' apic. Anuli anuli timangospa amalpu' nuxans o amaxnu litro laja'. Lan xanuc' ixhuico'me laja' epajco'me liƚpime o liƚmane' o liƚ'mitsi', ma to liƚ'ejma'.

⁷Jesús timila' notoc'iyalepá: ―Toƚma'niƚe caja' iƚne ƚapixú.

⁸Timiconala': ―Itsiya tonlipa'aƚe tutani, toƚmuc'itsa tixnac'otsi cal mayordomo. Itai'me.

⁹Notoc'iyalepá, iƚniya nipa'apá al vino, iƚsina' petsi quipa'apa. Cal mayordomo aiquixina'. Ixnac'o'ma laja' joupa ipai'ipa, i'ipa avino. Ijoc'i'ma ƚamanepa,

¹⁰timi: ―Ima', itsiya quite' luhua'inga' al c'a vino. A'i toƚta'a mi'enni. Ate'a ticunni al c'a vino. Tijouƚa' tixnaƚe axpe' vino lijoc'impola', tuhua'i'mola' a'ijc'a vino.

¹¹Mipa'a Jesús liƚya' Caná al distrito Galilea toƚta'a ipango'ma imujpa lo'epa acueca'. Ts'ilihuequi imetsaico'me jiƚquiya ituca', xonca acueca', a'i to locuenaye lan xanuc'. I'huaiyijm'me.

¹²Imu'ma al 'ocay, icuaitsi liƚya' Capernaum. Qui'máma' jouc'a lipimaye jouc'a ts'ilihuequi iyejmalena'me. Jiƚpe imanenca oque' afane' quitine.