ዬሱሲ ኪቴዳዋንቱ ኦሱዋ 7:35-42

³⁵«ሄ ሙሳ ኢስራዔላቱ፤ ‹ኔና ኑና ሞዲያዋኔ ዳና ኡዲዴ ሱንꬄዳዌ ኦኔ?› ያጊዴ ኢፄዲኖ፤ ቡራ ጊዶን ኣው ቤቴዳ ኪታንቻን ሞዲያዋኔ ኣሺያዋ ጊዳና ማላ፥ ፆሳይ ኣ ኪቴዳ።

³⁶ሄ ሙሴ ኢስራዔላቱዋ ጊብፄ ጋዲያን ዞዖ ኣባኒኔ ሜላ ቢታን፥ ኦይታሙ ላይꬃው ኦራꬃባኔ ማላታ ኦꬂዴ፥ ጊብፄፔ ካሌꬄዳ።

³⁷«ኢስራዔሊያ ኣሳሲ፥ ‹ፆሳይ ታና ዴንꬄዳዋዳን፥ ሂንቴ ዛሪያ ጊዶፔ ታ ማላ ናቢያ ሂንቴንቶ ዴንꬃናዋ› ያጌዳዌ ሄ ሙሳ።

³⁸ኢ ኢስራዔሊያ ኣሳ ማባራና ኢቲፔ ሜላ ቢታን ዴዔዳዋ፤ ኢ ኑ ኣዋቱዋናኔ ሲና ዴሪያ ቦላን ባሬው ሃሳዬዳ ኪታንቻና ኢቲፔ ዴዔዳ። ያቲዴ ፆሳፔ ዴዑዋ ቃላ ኑሲ ኢማናው ኣኬዳ።

³⁹«ሙሴው ኑ ኣዋቱ ኣዛዜታናው ዶሲቤይኪኖ፤ ሺን ጌዴ ኣ ሱጊ ኦሊዴ፥ ጉዬ ጊብፄ ሲማናው ኣሞቴዲኖ።

⁴⁰ቃሲ ኣሮና፥ ‹ኑና ካሌꬂያ ፆሳቱዋ ኑሲ ሜꬋ፤ ኣዪሲ ጎፔ፥ ሃ ኑና ጊብፄፔ ኣሄዳ ሙሴ ዋኔዴንቶ ኑኒ ኤሮኮ› ያጌዲኖ።

⁴¹ሚዛ ማራ ማላቲሲዴ፥ ሄ ዎዴ ኤቃ ኦꬄዲኖ፤ ሄ ኤቃሲ ያርሹዋ ያርሺዴ፥ ባሬንቱ ኩሺ ኦꬄዳ ኦሱዋን ናሼቴዲኖ።

⁴²ሺን ፆሳይ ኡንቱንቶ ዞኪያ ዛሬዳ፤ ኡንቱንቱ ሳሉዋ ፆሊንቲያሲ ጎዪናናዳን፥ ኡንቱንታ ኣጌዳ፤ ናባቱዋ ማፃፋን፥ ‹ኢስራዔሊያ ኣሳቶ፥ ኦይታሙ ላይꬃ ኣሳይ ባይና ሳን ሹኬዳ ሜሂያኔ ያርሹዋ ታው ያርሼዲቴ?