ዬሱሲ ኪቴዳዋንቱ ኦሱዋ 3:13-24

¹³ኣብራሃሞ ፆሳይ፥ ዪሳቃ ፆሳይ፥ ያዪቆባ ፆሳይ፥ ኑ ኣዋቱዋ ፆሳይ፥ ሂንቴንቱ ኣꬂ ኢሜዳዋ ጲላፆሲ ቢላናው ቆፒ ኡቴዳ ዎዴ፥ ሂንቴንቱ ኣ ሲንꬃን፥ ‹ኑኒ ኣ ኤሮኮ› ጌዳ ባሬ ናዓ ዬሱሳ ቦንቼዳ።

¹⁴ሺን ሂንቴንቱ ጌሻኔ ፂሉዋ፥ ‹ኑኒ ኣ ኤሮኮ› ጊዴ፥ ሼምፑዋ ዎꬌዳዋ ኣ ዲራ ሂንቴንቶ ቢላናው ጲላፆሳ ዎሴዲታ።

¹⁵ዴዑዋ ኢሚያዋ ሂንቴንቱ ዎꬌዲታ፤ ሺን ፆሳይ ሃይቁዋፔ ኣ ዴንꬄዳዋሲ ኑኒ ማርካ።

¹⁶ሃ ዎባ ቢታኒያ ዬሱሳ ሱንꬃ ዎልቃይ ሚኒሴዳ፤ ሂንቴንቱ ቤዒያዌኔ ኤሪያዌካ ኢ ኣ ሱንꬃን ኣማኒያዋን ኦሴቴዳ፤ ሃ ሂንቴንቱ ኡባ ሲንꬃን ኣ ሃዋዳን ሎይꬄዳዌ፥ ዬሱሳ ኢ ኣማኒያዋ።

¹⁷«ሃዒካ ታናዳን ኣማኒያዋንቶ፥ ሂንቴንቱካ ሂንቴንታ ካሊያዋንቱዳን፥ ኤሬናን ኦꬄዳዋ ታኒ ኤራይ።

¹⁸ሺን ፆሳይ ቤኒ፥ ናባቱዋ ኡባቱዋ ዶናን፥ ‹ኪሪስቶሲ ዋዬታና ቤሴ› ያጊዴ ኦዴዳ፤ ባሬ ኦዴዳዋካ ሄዋዳን ፖሌዳ።

¹⁹ሲሚ ፆሳይ ሂንቴንቱ ናጋራ ማራናዳን፥ ጎዳ ማታፔ ኣያና ሚኖቴꬃ ዎዲ ሂንቴንቶ ያናዳኒኔ ፆሳይ ዬሱሲ ኪሪስቶሳ ካሴ ሂንቴንቶ ኦዴቶዋዳን ዬዳናዳን፥ ሂንቴንቱ ናጋራ ፓፂዴ ፆሳኮ ሲሚቴ።

²¹ፆሳይ ጌሻ ጊዴዳ ባሬ ናባቱዋ ዶናን ቤኒፔ ዶሚዴ ሃሳዬዳዋዳን፥ ኡባባይ ኦራፂያ ዎዲ ጋካናው፥ ዬሱሲ ሳሉዋን ጋሚዓናው ቤሴ።

²²ሙሴ፥ ‹ጎዳይ ፆሳይ፥ ሂንቴንቱ ዛሪያ ጊዶፔ ሂንቴንቶ ታናዳን ናቢያ ዴንꬃና፤ ሂንቴንቱ ኢ ጊያዋ ኡባ ሲሲቴ።

²³ሄ ናቢ ኦዲያዋ ሲሴና ኣሳይ ኦኒኔ ኣሳ ጊዶፔ ሻኬቲ ꬋዮ› ያጌዳ።

²⁴«ቃሲ ሳሜላፔ ዶሚዴ፥ ኣፔ ካላ ዴንዴዳ ናባቱ ኡባቱ፥ ሃ ዎዲያባ ኦዴዲኖ።