Mgo Hinimuan 3:13-24

¹³Di nigligkat atag to Magboboot ka impokohipanow rin. Sikandin dod ka Magboboot to mgo kaap–apuan ta dongan no si Abraham, si Isaak, woy si Hakub. No ka Magboboot, ian ka nigpohipanow on to soini no otow su oyow ogkasayo si Hisus no pigsugu din kai to tano. Di sikaniu atag, nigdakop now on si Hisus no imbogoy now dio ki Gobirnador Pilatu woy nigbayungan now on. No ko impalibuwas din on porom si Hisus, nig–atangan now woy waro now palibuwasa.

¹⁴Si Hisus, ka oghingaranan to Maroyow woy ka Matuwarong su waro batasan din no maroot. Di nigligalan now ro sikandin woy nigbuyu kow ki Pilatu oyow ian din igpalibuwas ka talagbunu no tahan on no napirisu.

¹⁵Nigpohimatayan now on si Hisus no ian talag–uyag to tibo. Di nig–uyag to Magboboot sikandin ligkat to kamatayon din. No sikanami ka ogpakamalogot to sikan.

¹⁶Ka kabogbogan woy ka pogtuu noy to ngaran ni Hisus, ian ka immanokal to soini no no otow no ogkitoon now woy tahan now no natagaan no napulid. No noulian on ian sikandan kai to taliwaro now su nigligkat ki Hisus ka sikan no pogtuu noy.

¹⁷Di mgo sulod,” kagi ni Pedro, “natagaan kud to ian now impohimatoy ki Hisus su waro kow mataga ko hondoi nigligkat woy songo waro tokora to mgo igbuyag now.

¹⁸Di ko namatoy on si Hisus, natuman on ka impanangon to Magboboot to bo–bo to tibo no mgo talagnangon din dongan to ogkabaybayaran ka pig–alam din no ian ka Im–imanan to mgo Koot–otawan no oghingaranan ki Kristu,” kagi.

¹⁹“Sikan ian mgo sulod, sonditi now on ka mgo batasan now no maroot woy halina now ka goinawa now dio to Lagboy no Igbuyag ta no si Hisus oyow ogkaawo on ka mgo salo now woy oyow ogkabogayan kow to maawang no goinawa no ogligkat to ogdanian kow nikandin.

²⁰No uromo, ogpalibongon to Magboboot si Hisus kai to kaniu no ian ka Im–imanan to mgo Koot–otawan no oghingaranan ki Kristu.

²¹Di dio pad ogpokougpo si Hisus to langit taman to ogkatuman on ka tibo no impanangon to Magboboot dongan to bo–bo to mgo maroyow no talagnangon to kagi rin.

²²Sikan to ian no nigkagi ni Moisis to, ‘Duon uromo talagnangon to kagi to Lagboy no Igbuyag ta no Magboboot no ipohondio din to kaniu no ogkounawa kanak. Pamminog kow kandin ko nokoy ka ignangon din kaniu.

²³No ko duon otow no kono ogpamminog to sikan no talagnangon to kagi ku,’ kagi to Magboboot, ‘Kono ogpakalagkos to mgo sakup ku di oglogparan to waro katamanan.’ ”Sikan ka ingkasulat ni Moisis.

²⁴No kagi ni Pedro to, “Tibo no mgo talagnangon to kagi to Magboboot ligkat dongan ki Samuel lagkos to mgo sunud no mgo talagnangon to kagi rin, nakanangon to soini no oghimuon to Magboboot kai to kanta kuntoon. Ian su sikanta ka mgo pinanganak to sikan no mgo talagnangon to kagi rin, songo ogpakalagkos kid on to sikan no insabut to Magboboot kandan dongan no nigkagi ka Magboboot ki Abraham dongan to, “Duon uromo pinanganak nu no ogbogoy to karoyawan dio to tibo no kapunganan to soini no tano.” Ian ka kagi to sulat.