ዬሱሲ ኪቴዳዋንቱ ኦሱዋ 15:3-14

³ኣማኒያ ኣሳቱ ኡንቱንታ ኪቲዴ ኦጊያን ማዲሺን፥ ኣዪሁዳ ጊዴናዋንቱ ፆሳኮ ሲሜዳዋ ኦዲዴ፥ ፒንቂያናኔ ሳማሪያና ኣꬌዲኖ፤ ሄዌ ኢሻቱዋ ኡባ ሎይꬂ ናሼቼዳ።

⁴ኡንቱንቱ ዬሩሳላሜ ጋኬዳ ዎዴ፥ ኣማኒያዋንቱ፥ ዬሱሲ ኪቴዳዋንቱኔ ጪማቱ ኡንቱንታ ሞኬዲኖ፤ ፆሳይ ባሬንቱን ኦꬄዳዋ ኡባ ኦዴዲኖ።

⁵ሺን ፓሪሳዋቱዋ ባጋፔ ኣማኔዳ ኢቲ ኢቲ ኣሳቱ ዴንዲ ኤቂዴ፥ «ሂንቴንቱ ኡንቱንታ ቃፃራናዉኔ ሙሴ ሂጊያ ናጋና ማላ ኣዛዛናው ቤሴ» ያጌዲኖ።

⁶ዬሱሲ ኪቴዳዋንቱኔ ጪማቱ ሄዋ ዞሬታናው ሺቄዲኖ።

⁷ሎይꬂ ሃሳዬዳዋፔ ጉዪያን፥ ጴፂሮሲ ዴንዲ ኤቂዴ፥ ኡንቱንታ ሃዋዳን ያጌዳ፤ «ታናዳን ኣማኒያዋንቶ፥ ኣዪሁዳ ጊዴናዋንቱ ዎንጋላ ሚሺራቹዋ ቃላ ታ ዶናፔ ሲሲዴ ኣማናና ማላ፥ ታና ፆሳይ ሂንቴ ጊዶፔ ቤኒ ዶሬዳዋ ሂንቴንቱ ኤሪታ።

⁸ኣሳ ዎዛና ኤሪያ ፆሳይ ጌሻ ኣያና ኑሲ ኢሜዳዋዳን፥ ኡንቱንቶካ ኢሚዴ ቱማዬዳ።

⁹ኡንቱንቱ ኣማኔዳ ዲራው፥ ኢ ኡንቱንቱ ዎዛና ጌሺዴ፥ ኑ ጊዱዋኒኔ ኡንቱንቱ ጊዱዋን ዱማቴꬃ ዎꬂቤና።

¹⁰ሄዋ ዲራው፥ ኑ ኣዋቱኔ ኑኒ ቶካናው ዳንዳዪቤና ዎልቃማ ቶኩዋ ካሊያዋንቱ ሞርጊያን ዎꬂዴ፥ ሃዒ ሂንቴ ኣዪሲ ፆሳ ፓጪቴ?

¹¹ሺን ጎዳ ዬሱሲ ኪሪስቶሳ ኣꬎ ኬካቴꬃን ኡንቱንቱ ኣቴዳዋዳን፥ ኑኒካ ኣቴዳዋ ኣማኔቶ» ያጌዳ።

¹²ኣሳይ ኡባይ ጮዑ ጊዴ፥ ባርናባሲኔ ጳዉሎሲ ኣዪሁዳ ጊዴና ኣሳ ጊዶን ባሬንቱ ባጋና ፆሳይ ኦꬄዳ ማላታኔ ኦራꬃባ ኡባ ኦዲሺን ሲሴ።

¹³ኡንቱንቱ ሃሳያ ዉርሴዳዋፔ ጉዪያን፥ ያዪቆቢ ሃዋዳን ያጊዴ ዛሬዳ፤ «ኢሻቶ፥ ታኒ ጊያዋ ሲሲቴ።

¹⁴ፆሳይ ኣዪሁዳ ጊዴናዋንቱ ጊዶፔ ባሬው ሃኒያ ኣሳ ኣካናው ኣዪሁዳ ጊዴናዋንቶ ኮይሮ ዎቲ ቆፔዴንቶ ሲሞኒ ኦዴዳ።