ዩሁዳ 1

1

¹ዬሱስ ኪርስቶሳስ ኦꬂዛ ያቆቤ ኢሻ ዩሁዳፔ፥ ኢንቴስ ፄይጌቲዳይታስ፥ ፆሲ ኣዋይ ሲቂዛይታሲኔ ዬሱስ ኪርስቶሲ ናጊዳይታስ ኡባታስ፤

²ማሮቴꬂ፥ ሳሮቴꬂኔ ሲቆይ ኢንቴስ ዳሮ።

³ታ ሲቆቶ! ኑ ኢሲፌ ኣቲዳ ኣቶቴꬃ ጊሽ ታ ኢንቴስ ፃፋናስ ዳሮ ኮያዲሲሺን ሃዒ ቃሴ ናምዓንꬆንታ ኢሲቶ ፆሲ ኣሳስ ኢሚዳ ኣማኖ ጊሽ ኢንቴ ዳሮ ባፄታና ማላ ታ ኢንቴና ዞራይስ። ታ ኢንቴስ ፃፋናስ ታስ ቶሆ ጊዲዴስ።

⁴ኢስታ ቦላ ፒርዴታናይስ ዳሮ ዎዴፔ ካሴ ኢስታ ጊሽ ፃፌቲዳ ኣሳቲ ኢንቴኮ ካልፂ ጌሊዳ። ሄይታንቲ ፆሴ ኤሮንታይታ፤ ኑ ጎዳ ኪያቴꬃ ጮ ሜላ ላሚዛይታኔ ፆሳ ጎይኖንታይታ። ኢዚ ባርካ ኑና ሃሪዛይሳኔ ኑስ ጎዳ ጊዲዳ ዬሱስ ኪርስቶሳካ ካዴቴስ።

⁵ኢንቴ ሄሳ ኡባካ ካሴቲ ኤሪኮካ ጎዳይ ባ ዴሬዛ ጊብፄፔ ኬሲዲ ኣሺዳይሳኔ ሃንኮ ኣማኖንታይታ ጉዬፔ ꬋይሲዳይሳ ታ ኢንቴና ኣኬኪሳና ኮያይስ።

⁶ሄሳꬆካ ባ ቦንቾ ናጎንታ ኢፂዲ ባ ዲዛሶ ዬዲዳ ኪታንቻታ ኢንቴ ዩሺ ቆፓና ማላ፤ ፆሲ ኢስታ ጊታ ፒርዳ ጋላስ ጋካናስ ሜርና ቃሾስ ጊርድ ጊዳ ꬉማን ናጊ ዎꬂዴስ።

⁷ሄሳꬆካ ሶዶሜይኔ ጋሞራይ ቃሴካ ኢስታ ሄራን ዲዛ ካታማቲካ ላይማቲዳኔ ሳሎ ሜꬌቴꬃታራ ላይማታናስ ኣሞቲዳ። ሄሳ ጊሽ ኢስቲ ሜርና ታማን ፁጌታናይታስ ሌሚሶ ጊዲዳ።

⁸ሄሳꬆካ ሄይቲ ሄ ኣሳቲ ባርካ ባ ኣጉሞ ካሊዲ ባርካ ባ ኣሾ ቱኒሴቴስ። ባፔ ቦላራ ዲዛይታስ ኣዛዜቴቴና። ኢስቲ ሳሎን ቦንቾራ ዲዛይታካ ጫዬቴስ።

⁹ሃራይ ኣቶሺን ሳሎ ኪታንቻታ ሃላቃይ ሚካሌይ ሙሴ ኣሾ ጊሽ ኢዛራ ፓላሜቲሼ “ኔና ጎዳይ ሃንቄቶ!” ጊዴስ ኣቲን ኢዛስ ጫሻ ቃላ ዛሪቤና።

¹⁰ሃይቲ ኣሳቲ ቃሴ ኢስታስ ኤሬቶንታ ኢፂዳ ሚሽ ዉርሲ ጫሽ ጫዬቴስ። ኣይኮካ ኤሮንታ ሜሄታ ማላ ጮ ሜላ ቆፒ ኤኪዳ ሚሺ ኢስታስ ዲኮ ኢስቲ ሄሳን ꬋያና።

¹¹ኢስቲ ቃዬሌ ኦጌን ቢዳ ጊሽ ሚሻስ ጊዲ ባላዓሜ ማላ ባላን ኩንዲዳ። ቃሴ ቆሬይ ኤቄቲዳ ማላ ኢስቲካ ኤቄቲዲ ꬋዪዳ ጊሽ ኢስታስ ኣዬ-ኣና!

¹²ሃይቲ ሃ ኣሳቲ ዬላይ ባይንዳ ላይማ ሃኖራ ኢሲ ቦላ ኢንቴ ዲጊሴሶን ቤቲዛ ዎዴ ኢንቴስ ꬉጴ ጊዴቴስ። ኢስቲ ባስ ፃላላ ቆፔቴስ። ኢስቲ ጫርኮን ቢዛ ኢራይ ባይንዳ ሻራ ማላ። ኣይፌይ ኣይፊዛ ዎዴን ኣይፌይ ባይንዳ ፃጶፔ ꬎቃሌቲዲ ናምዑቶ ሜሊዳ ሚꬃ ማላ።

¹³ኢስቲ ዬላቺዛ ባ ኦሶዛ ዎልቃማ ኣባ ዳምባላ ማላ ጎፖንቶ ጮፑ ሂስቲዛይታ። ጊርድ ጊዳ ꬉማይ ኢስታ ሜርናስ ናጊዛይሳኔ ጮ ሜላ ዋዬቲዛ ፆሊንቴታ ማላኮ!

¹⁴ኣዳሜፔ ሃ ሲሚን ላፑንꬆ ዬሌቴꬅ ጊዲዳ ሄኖኬይ “ሄኮ ፆሲ ቆዳይ ባይንዳ ጌሻ ኪታንቻታራ ኣሳ ኡባ ቦላ ፒርዳናስ ያና።

¹⁵ሄይታ ፆሳስ ጎይኖንታ ኣሳቲ ኦꬂዳ ኢታ ኦሶ ጌዶን ኢስታ ኢዚ ቃፃያና። ኣዳፌካ ፆሲ ሄይታ ባስ ጎይኖንታ ናጋራንቻታ ቦላ ኢስቲ ሃሳዪዳ ኢታ ሚሻታ ጊሽ ኢዚ ኢስታ ቦላ ፒርዳና” ጊዴስ።

¹⁶ሄይቲ ሄ ኣሳቲ ኡባ ዎዴ ዙዙሜቲዛይታኔ ኣይ ሚሻንካ ኡፋዬቲ ኤሮንታይታ። ኢስቲ ባ ኢታ ኣሞ ካሊዛይታ፤ ኢስታ ዱናን ኦቶሬቴꬃ ቃላይ ኩሚዴስ። ባስ ባ ጎዓ ኮዪሼ ኣስ ኣዳሼቴስ።

¹⁷ኢንቴ ታ ሲቆቶ! ኑ ጎዳ ዬሱስ ኪርስቶሳ ሃዋሬቲ ሃይሳፌ ካሴ ዮቲዳ ቃላ ኣኬኪቴ።

¹⁸ኢስቲ “ዎዴ ዉርሴꬃን ፆሳ ሼኔፔ ሃኪዳይቲ ባርካ ባ ኢታ ኣሞ ካሊሼ ኣስ ቂꬊዛይቲ ያና” ጊዲ ኢንቴስ ካሴ ዮቲ ዎꬂዳ።

¹⁹ሄይቲ ኣሳ ኢሳ ኢሳፌ ሻኪዛይታ፤ ኣሾ ኣሞቴꬅ ካሊዛይታኔ ኢስታን ፂሎ ኣያናይ ባይንዳይታ።

²⁰ታ ኢሻቶ! ኢንቴ ቃሴ ኡባፌ ቦላራ ኢንቴ ጌሻ ኣማኖን ሚኒ ኤቂቴ፤ ፂሎ ኣያናንካ ሚኒ ዎሲቴ።

²¹ኑ ጎዳ ዬሱስ ኪርስቶሲ ባ ማሮቴꬃን ኢንቴና ሜርና ዴዖን ጋꬃናይሳ ናጌቲሼ ኢንቴናቴꬃ ፆሳ ሲቆን ናጊቴ።

²²ሲꬊሼ ዲዛ ኣሳታስ ሚሼቲቴ፤

²³ኢሲ ኢሲ ኣሳታ ታማፔ ኬሲ ኣሺቴ፤ ሃራታስ ያሻቴꬃን ሚሼቲቴ ሺን ናጋራን ቱኒዳ ኢስታ ኣሳቴꬅ ቦቺዳ ማዮካ ዉርሲ ኢፂቴ።

²⁴ኢንቴና ኩንዴꬃፌ ኣሻናሲኔ ኢንቴና ዎሶይ ባይንዳይታ ሂስቲዲ ኡፋይሳን ባ ቦንቾ ሲንꬂ ሺሻናስ ዳንዳዪዛይሳስ፤

²⁵ኢዚ ፃላላ ኑስ ፆሳኔ ꬋሌ ጊዲዳ ጎዳ ዬሱስ ኪርስቶሳ ባጋራ ቤኒፔ ዶሚዲ ሃዒ ጋካናሲኔ ሜርናስካ ቦንቾይኔ ጊታቴꬅ፥ ዎልቃይኔ ጎዳቴꬂ ኢዛስ ጊዶ። ኣሚን።