ማቶሳ 14:1-21

¹ሄ ዎዴ ጋሊላ ጋዲያ ኣዪሲያ ሄሮዲሴ ዬሱሳባ ሲሴዳ፤

²ያቲዴ ባሬ ቆማቱዋሲ፥ «ሃዌ ሃይቁዋፔ ዴንዴዳ ፃማቂያ ዮሃኒሳ፤ ፆሳይ ኦꬂያ ዎልቃማ ማላታ ኢ ኦꬂያዌ ሄዋሳ» ያጌዳ።

³ኣዪሲ ጎፔ፥ ሄሮዲሲ ባሬ ኢሻ ፒሊጶሳ ማቻቲ ሄሮዲያዲ ጋሶታን ዮሃኒሳ ኦይꬂ ቃሺሲዴ፥ ቃሾ ጎሌን ዬጊ ዎꬄዳ።

⁴ኣዪሲ ጎፔ፥ ዮሃኒሲ ሄሮዲሳ፥ «ኔኒ ሄሮዲያዶ፥ ኔ ኢሻ ማቻቶ ኣካናው ሂጊ ዲጌ» ያጌዳ።

⁵ሄሮዲሲ ዮሃኒሳ ዎꬋናው ኮዬዳ፤ ሺን ዪሁዳ ኣሳይ ናቢያዳን ዮሃኒሳ ፄሌዳ ዲራው፥ ኣሳው ያዬዳ።

⁶ሺን ሄሮዲሲ ዬሌቴዳ ጋላሳ ባላይ ጋኪና፥ ሄሮዲያዲ ናታ ኣሳ ሲንꬃን ዱራዴ ሄሮዲሳ ናሼቻው።

⁷ሄሮዲሲ ናቶ፥ «ኔና ሎዔዳዋ ኣያኔ ጊዶፔ፥ ታና ኦቻ፤ ታኒ ኔው ኢማና» ያጊዴ ኢዚው ጫቄዳ።

⁸ናታ ባሬ ዳይ ዞሪያ ኣካዴ ሄሮዲሳ፥ «ፃማቂያ ዮሃኒሳ ሁጲያ ሃ ዎጪቲያን ዎꬃዴ ታው ኢማ» ያጋዱ።

⁹ካቲ ኣው ቃሬቴዳ፤ ሺን ባሬ ጫቁዋ ዲራዉኔ ባሬናና ማዳን ኡቴዳ ኢማꬃ ዲራው፥ ኢዚው ዮሃኒሳ ሁጲ ኢሜታና ማላ ኣዛዜዳ።

¹⁰ካቲ ኪቲዴ፥ ዮሃኒሳ ቆꬊያ ቃሾ ጎሌን ሙጪሴዳ።

¹¹ሁጲያ ዎጪቲያን ዎꬂ ኣሂዴ፥ ናቲው ኢሜዲኖ፤ ናታ ሄ ሁጲያ ባሬ ኣቲኮ ኣፋዱ።

¹²ዮሃኒሳ ካሊያዋንቱ ዪዴ፥ ኣ ኣኃ ኣፊዴ ሞጌዲኖ፤ ሄዋፔ ሲሚዴ ሃ ዬዉዋ ዬሱሳው ቢዴ ኦዴዲኖ።

¹³ዬሱሲ ሄዋ ሲሲዴ፥ ዎንጊሪያን ጌሊዴ፥ ሄዋፔ ባሬካ ኣሳይ ባይናሳ ቤዳ፤ ኣሳይ ሄዋ ሲሲዴ፥ ካታማፔ ዴንዲዴ፥ ጌዲያን ኣ ካሌዲኖ።

¹⁴ዬሱሲ ዎንጊሪያፔ ኬሴዳ ዎዴ፥ ዳሮ ኣሳ ቤዒዴ፥ ሄ ኣሳው ቃሬቴዳ፤ ያቲዴ ኡንቱንቱና ዴዒያ ሃርጋንቻቱዋ ፓꬄዳ።

¹⁵ሳዓይ ኦማርሲያ ዎዴ፥ ዬሱሳ ካሊያዋንቱ ኣኮ ዪዴ፥ «ሃዌ ሳዓይ ኣሳይ ባይናሳ፤ ሃዒ ሳዓይ ቃሚዲጌዳ፤ ኣሳይ ኡባይ ቄሪ ካታማቱዋ ቢዴ፥ ባሬንቶ ቁማ ሻማና ማላ፥ ኣሳ ሞዪዛ» ያጌዲኖ።

¹⁶ሺን ዬሱሲ ኡንቱንታ፥ «ኣሳይ ባናው ኮሼና፤ ኣሳው ሜቴቲያባ ሂንቴንቱ ኢሚቴ» ያጌዳ።

¹⁷ኡንቱንቱ ዛሪዴ ኣ፥ «ኑሲ ሃዋን ኢቼሹ ኡኪꬃፔኔ ላዑ ሞሊያፔ ኣቲን፥ ሃራይ ባዋ» ያጌዲኖ።

¹⁸ዬሱሲ ኡንቱንታ፥ «ሄዋንታ፥ ሃ ታኮ ኣሂቴ» ያጌዳ።

¹⁹ኣሳይ ማታኒ ኡታና ማላ፥ ዬሱሲ ኣዛዜዳ፤ ኢቼሹ ኡኪꬃኔ ላዑ ሞሊያ ኦይቂዴ፥ ሳሉዋ ፑዴ ፄሊዴ፥ ፆሳ ጋላቴዳ፤ ሄ ኡኪꬃ ሜንꬂዴ፥ ባሬና ካሊያዋንቱሲ ኢሚና፥ ኡንቱንቱ ጮራ ኣሳው ጊሼዲኖ።

²⁰ኣሳይ ኡባይ ሚዴ ካሌዳ፤ ኣቴዳ ሱፓ ዶካ ታማኔ ላዑ ዛምቤሊያ ኩሜዳዋ ዴንꬄዲኖ።

²¹ሜዳ ኣሳይ ማጫ ኣሳኔ ናና ፓይዴናን፥ ኢቼሹ ሻዓ ጊዲያዋ ኬና።