1इं रां, रागी ङा ताम्बु खोदेंशो बाक्ब। मेको जाम्शा लाइब बाक्त। मेको जाम्शा लत हना यो, परमप्रभु यावेमी इं कली नक बाक्तीके गेब। मेको खिं गुइम सेल्शो मबाक्ब। मेको गेना हना यो लीब स्वर्ग ङा खिं बाक्ब। २पत्रुस १:१४
2गो एकेर बाक्शा, रोंका पाइनीकी, आंइ स्वर्ग ङा खिंम बाक्चा दाक्नीकी।
3मेको नक बाक्तीके ओव़चा चहिं माइत वा प्रुइश्शा, नक वा फेक्शो खोदेंशो बाक्ब। मोपा शिश्रा मदुम्नीकी।
4मुल सम्म रागी ङा रांम बाक्नीकी, सुर्ता पना पन बाक्नीकी। शिश्रा दुम्चा कली ममाइ। तन्न नक फेक्शो खोदेंशो पा, आंइ जाम्शा लाइब रां गेना हना यो ब्रोंइशा बाक्ब स्वर्ग ङा रां दुम्ल। १कोरिन्थी १५:५१-५३
5मोदेंशो दुम्चा कली परमप्रभु यावेमी आंइ कली ठीक पा वोइश्शो बाक्त। मेकोमी आंइ कली आ सोक्त बैना खोदेंशो पा गेप्तु। २कोरिन्थी १:२२; रोमी ८:१६,२३; एफिसी १:१३-१४
6मोदेंशो दुम्मेनु, ठेयब थुं पाइश्शो दुम्शा बाक्नय। रांमी बाक्यानु, प्रभु रे ङोन बाक्नीकी। हिब्रू ११:१३
7मारदे हना गो थमा सुइक्तीकेमी गाक्नीकी। ततीकेमी मगाक्नीकी।
8गो ठेयब थुं पाइश्शो बाक्नीकी। गो रां रे ङोन दुम्शा, प्रभु नु बाक्चा दाक्नीकी। फिलिप्पी १:२३
9मोपतीके गो रांम बाक्शा हना यो, मबाक्शा हना यो, प्रभु कली ग्येरपाइक्चा दाक्नीकी।
10मारदे हना गो नेल्ल ख्रीस्त आ ङोंइती निसाफ पची ना जाक्चा माल्नीकी। रांम बाक्यानु, इं रांम पशो रिम्शो नु मरिम्शो नेल्ल ताइनीकी। प्रेरित १७:३१; रोमी २:१६; रोमी १४:१०; यूहन्ना ५:२९; एफिसी ६:८
11गोपुकी प्रभु कली मान पा हिंशा तुइक्तीके गो मुर आन कली शेंनीकी। परमप्रभु यावेमी आंइ पशो नेल्ल तुइक्ब। मिनु गे यो तुइक्नीनी, दे आस पाइनीकी।
12गो आंइ कली इन ङोंइती ठेयब मसेल्सीनीकी। तन्न आंइ पर्बम बोरशा, आंम आन कली ठेयब सेल्सीबपुकीमी शोव़मी ला गेय पाइनीम। थुंमी मारेइ ममिम्नीम। मोदेंशो मुर आन कली लोव़ लेत्चा कली आंइ देंशो लोव़ तुइक्ब दुमीने। २कोरिन्थी ३:१; २कोरिन्थी १०:१२
13गो मरुप्चा ङा बाक्तक हना, गो परमप्रभु यावे कली ठेयब सेल्चा कली मोदेंशो दुम्तक। गो रुप्चा ङा बाक्तक हना, मेको इन कली दुम्ब।
14मारदे हना ख्रीस्तमी इं कली दाक्ब, दे शुश मिम्नीकी। मेको नेल्ल मुर आन पर्बम बेक्त, दे तुइश्शा, गो नेल्ल बेक्चा ङा मुर बाक्नय, दे तुइक्नीकी।
15मिनु मेको नेल्ल आन पर्बम बेक्त। मिनु ब्रोंइशोपुकी मुल रे आंम पर्बम मब्रोंइमल। तन्न येसु कली ब्रोंइमल। मारदे हना मेको आन पर्बम साइश्शा, सेंसीचा पुंइसाक्व। रोमी १४:७-८
16गो मुल रे मुर नेल्ल आन कली रागी ङा मुर खोदेंशो पा मकोव़नीकी। खेयप का गो ख्रीस्त कली मुर खोदेंशो पा कोव़तक। मुल मोदेंशो ममिम्नीकी।
17सुइ ख्रीस्त आगाम बाक्त हना, मेको नक सेल्सीशो मुर का दुम्ब। ङोंइती ङा नेल्ल जाम्शा लत। नेल्ल नक दुम्ने नुप्त। रोमी ८:१०; गलाती २:२०; गलाती ६:१५; प्रकाश २१:५
18मेको नेल्ल परमप्रभु यावेम पशो बाक्ब। परमप्रभु यावेमी आंइ कली ख्रीस्त रे पा आं नु गारपाइक्तु। मिनु आंइ कली मेको गारपाइक्तीक गेय पपाइक्तु। रोमी ५:१०
19परमप्रभु यावेमी ख्रीस्त रे पा मुर आन कली आ नु गारपाइक्तु। मेको आन मरिम्शो पशो नेल्ल प्रेंशा, गारपाइक्तीक गेय आंइ कली गेप्तु। रोमी ३:२४-२५; कलस्सी १:१९-२०
20मिनु गो ख्रीस्त आ पर्बम मुर आन कली गेय पाइब बाक्नीकी। परमप्रभु यावेमी आंइ पतीकेमी मुर आन कली ब्रेप्ब। गोपुकी ख्रीस्त आ पर्बम मुर नेल्ल आन कली “परमप्रभु यावे नु गारब दुमीने” दे शेंनीकी। लूका १०:१६
21परमप्रभु यावेमी काइ पाप मतुइश्शो ख्रीस्त कली पापी सेल्तु। मिनु गो ख्रीस्त आगाम बाक्शा, परमप्रभु यावे आ ङोंइती ठीक दुम्नीकी। यूहन्ना ८:४६; यसैया ५३:४-६; गलाती ३:१२; रोमी १:१७; १कोरिन्थी १:३०
