1सावल मुल यो थमा सुइक्ब आन कली खेदा पा श्येत गेशा साइक्नुङमी देंना देंन गाक्बाक्माक्त। प्रेरित २२:३-१६; प्रेरित २६:९-१८; प्रेरित ८:३
2मिनु काबु यरूसलेममी बाक्ब ठेयब चढ़ेब आन कली ग्रुम्शा, दमस्कस सहर ङा ग्रुम्तीक खिं खिं ङा ठेयब मुर आन कली कागज ब्रेक्शा गेचा नङ देंशा पुना बाक्त। सावल आ पुंइशो लोव़ मार बाक्त देंशा हना “दमस्कसमी बाक्ब येसु आ लां खोइक्ब मीश मुर वोंइश मुर सु सु थिदुमी, मेको नेल्ल आन कली ग्याइश्शा फ्रेंशा, यरूसलेम चाक्नुङमी” दे पुंइशो बाक्माक्त।
3मिनु मोदेंशो कागज ताक्शा, दमस्कस सहर लशा जाक्दीत्चावानु, मार दुम्माक्त देंशा हना, सरीङ रे छेङछेङ फो ग्रूशा, आ एर ओंथ नेल्ल कोंइदा बाक्त। १कोरिन्थी १५:८
4मोपा छेङछेङ तवानु, दिङ गोल्माक्त। मिनु “सावल, सावल, गे मारदे आं कली खेदा पयी?” देंशो लोव़ नेंना बाक्त।
5मोदेंशो नेंशा “प्रभु, गे सु ननी?” दे हिल्लो पवानु “इ खेदा पशो येसु गो नङ।
6मुल छुल बोक्शा दमस्कस सहर लावो। मिनु मेकेर जाक्दीश्शा, गे मार गेय पचा माल्नेवे तुइक्पाइक्चा पुंइसीनेवे” देंशो लोव़ नेंना बाक्त।
7सावल नु काथा गाक्बपुकीमी मारेइ मतथु, लोव़ पशो ला नेंशा, वाम ग्याम दुम्मा बाक्त।
8मिनु सावल बोक्शा मिक्च पाक्शा कोव़ङानु, मिक्च मताइब दुम्शो बाक्माक्त। मिनु आ वारचपुकीमी आ गुइ रे कीशा दमस्कसमी चाक्दीत्मे बाक्त।
9दमस्कसमी जाक्दीश्शा यो नाक्त सां सम्म मिक्च मतवा बाक्त। जचा तूचा यो, प्रोना बाक्त।
10दमस्कसमी हनानीया नें पाइश्शो थमा सुइक्ब मुर का बाक्माक्त। प्रभुमी मेको मुर कली कोंइतीक कोंइशा “हनानीया” दे ब्रेत्ता बाक्त। मिनु “मार देंनी, प्रभु?” देंमेनु
11“छुल बोक्शा ग्येत्थ माइश्शो लां लावो। मेकेर जाक्दीश्शा, यहूदा आ खिं लशा, टारसस ङा सावल माइश्शो मुर कली मालो। मेकोमी प्रार्थना पाइब।
12मिनु मेकोमी कोंइतीकेमी हनानीया माइश्शो मुर ओव़शा, मिक्च तपाइक्चा कली आ तारी गुइ वोइश्शो तशो बाक्ब” देंशो लोव़ नेंना बाक्त।
13मिनु हनानीयामी “आमाइ, प्रभु, गो शुश मुर आन शोव़ रे मेको मुर आ पर्बम शुश मरिम्शो लोव़ नेंता। मेकोमी यरूसलेममी बाक्ब थमा सुइक्ब आन कली शुश श्येत गेशा, खेदा पना पन बाक्ब देंशो नेंता।
14थमा सुइक्ब आन कली ग्याइश्शा फ्रेंशा लाइक्चा कली ठेयब चढ़ेबपुकी रे अधिकार तशो बाक्माक्त, दे तुइक्ताक्ङ” देंमाक्त।
15प्रभुमी “मोदेंशो तुइक्ताक्वी हना यो, मुल छुल बोक्शा लावो। मारदे हना अर्को रागी ङा मुर, पिपपुकी नु इस्राएली आन कली आं नें तुइक्पाइक्चा, दे गो मेको कली योव़ने थुम्ता। प्रेरित १३:४६; प्रेरित २६:२; प्रेरित २७:२४
16आं नेंमी शुश श्येत जचा माल्नेवे देंशा गो मेको कली आंमान तुइक्पाइक्नुङ” दे प्रभुमी हनानीया कली माइश्शा सोइक्ता बाक्त। २कोरिन्थी ११:२१-२८
17मिनु हनानीया लशा, यहूदा आ खिं जाक्दीश्शा ओव़शा, सावल तारी आ गुइ चाक्शा “आं लोक्ब सावल, गे यरूसलेम रे पिवेनु, लांमी इ तशो प्रभु येसुम सोइक्ताक्यी। मिनु मिक्च ताइब दुमो, परमप्रभु यावे आ सोक्तीम ब्रीशो दुमो” देंमेनु,
18सावल आ मिक्च मारम फारशो बाक्मे, मेको दोक्शा, मिक्च ताइब दुम्माक्त। मिनु छुल बोक्शा, ब्वाक्कुम ख्रुम्शा ग्रुंइचा पुंइसे बाक्त।
19मिनु जशा तूशा बोल तेम्सीशा, इच्का नाक्त दमस्कस ङा थमा सुइक्बपुकी नु काथा बाक्माक्त।
20मिनु सावल ग्रुम्तीक खिं खिं लशा “येसु परमप्रभु यावे आ तौ बाक्ब” दे शेंना शेंन यहूदी आन कली येसु आ पर्बम शुश लोव़ तुइक्पाइक्मी बाक्त।
21मोदेंशो मेको आ शेंशो नेंशा “आमाइ, यरूसलेममी येसु कली थमा सुइक्ब आन कली का यो मवोइक्नुङमी देंब मेको ममाइ ङा? इं सहर ङा येसु कली थमा सुइक्ब आन कली यो ग्याइश्शा लाइश्शा, ठेयब चढ़ेब आन ङोंइती राप्पाइक्नुङमी, दे एक जाक्शो ममाइ ङा?” दे छक लाक्शा देंमुमा बाक्त। प्रेरित ८:१; प्रेरित २६:१०
22सावलमी शेंना शेंन आ शेंचा सक्ति बारपाइक्ना पाइक्न “येसु परमप्रभु यावे आ सोइश्शो ख्रीस्त बाक्ब” दे दमस्कसम बाक्ब यहूदी आन कली शेंदीमी बाक्त। मिनु सुइमी लोव़ लेन्ने मचाप्मे बाक्त। प्रेरित १८:२८
23मिनु शुश नाक्त मोपा शेंना शेंन गाक्मेनु, यहूदीपुकी गारशा सावल कली साइक्चा माल्मे बाक्त।
24मिनु सावलमी “आं कली साइक्चा माल्तीमी” दे तुइक्ता बाक्त। नाक्दो नाक्त यहूदीपुकीमी सहर ङा ओव़तीक ग्रूतीक लां मेर मेको कली बाप्बाक्मा बाक्त।
25मोपतीके काबु नाक्दो थमा सुइक्बपुकीमी सावल कली डोकोमी कुर पशा, डोरीमी क्युक्शा, सहर ङा गारो आ ची लुक्च तोइक्पा प्रोक्पदमे बाक्त। २कोरिन्थी ११:२२-२३
26सावल दमस्कस रे प्रोक्शा, यरूसलेम लेश्शा जाक्दीम्माक्त। मिनु थमा सुइक्ब नु गारशा, काथा बाक्चा मला बाक्त। तन्न मेकोपुकीमी मेको येसु आ नोले खोइक्ब दुम्त, दे थमा मसुइक्थु, हिंशा मब्रामे बाक्त। गलाती १:१७-१९
27बारनाबासमी चहिं सावल नु सोइश्शो आन कली ग्रुम्पदा बाक्त। मिनु लांमी गाक्मेनु, प्रभु कली तशो, प्रभुमी लोव़ पशो, दमस्कसमी महिंथु, येसु आ नेंमी शेंशा गाक्शो, मेको लोव़ नेल्ल बारनाबासमी रुप्पाइक्मी बाक्त।
28मिनु सावल कली ब्रामे बाक्त। मिनु सावलमी यरूसलेम सहरमी सुइ सुइ आन कली तशा महिंथु, येसु आ नेंमी शेंना शेंन गाक्माक्त।
29शेंना शेंन गाक्मेनु, ग्रीक लोव़ पाइब यहूदीपुकी यो ग्रुम्मी बाक्त। मिनु हिल्लो हिक्सी पमुमानु, जिचा बोक्माक्त। मोदेंशो दुम्मेनु, सावल कली साइक्चा माल्मे बाक्त।
30मिनु थमा सुइक्ब लोक्बपुकीमी साइक्चा माल्तेक्म, दे तुइश्शा, सिजरिया सम्म चोव़दीशा, टारसस सोइक्तमे बाक्त। गलाती १:२१
31मिनु यहूदीया, गालील नु सामरीया रागीमी बाक्ब थमा सुइक्बपुकी खेदा पचा मपुंइसीथु, बाक्चा तामे बाक्त। थमा सुइक्बपुकीमी प्रभु कली मान पा हिंशा, परमप्रभु यावे आ सोक्त रे पा वारच पचा पुंइसीशा, आन थुं बारना बारन लमाक्त। मिनु थमा सुइक्ब यो तेम्सीन सीन लमा बाक्त।
32पत्रुस शेंना शेंन गाक्शा, लिडडा सहर जाक्दीम्माक्त। मिनु मेकेर बाक्ब प्रभु आ योव़शो आन कली ग्रुमा बाक्त।
33मिनु काबु एनीयास माइश्शो मुर कली तवा बाक्त। एनीयास चहिं आ गुइ खोइल मदुक्ब रोइ पशा, ब्राख्ये रे बोक्ने मचाप्शो ८ बर्स दुम्शो बाक्माक्त।
34मिनु पत्रुसमी “एनीयास, येसु ख्रीस्तमी इ कली सापाइक्ब। मोपतीके बोक्शा, इ ब्राख्ये पोक्शा वोतो” देंमेनु, एनीयास छुल बोक्माक्त।
35मिनु लिडडा सहरम नु शारोन रागीमी बाक्ब नेल्लेमी एनीयास कली मोपा साशो तशा, आन थुं प्रभु गे लेत्मे बाक्त।
36योप्पा सहरमी तबीता नें पाइश्शो थमा सुइक्ब मीश मुर का बाक्माक्त। ग्रीक लोव़मी मेको आ नें दोरकास, किश्श रुम्सीब। तबीता गेना हना यो सुइ सुइ आन कली रिम्शो पाइबाक्माक्त। मथीब आन कली शुश वारच पाइबाक्माक्त।
37मेको तबीता रोइ पा बेक्माक्त। मिनु आ मुरपुकीमी आ बेक्शो रां चिक्शा, खिं ङा तला तार ङा कोठा लाइश्शा वोदमे बाक्त।
38लिडडा नु योप्पा नेक्नेक्था बाक्नीसी। मोपतीके थमा सुइक्बपुकीमी पत्रुस लिडडा जाक्शो बाक्ब, दे यो नेंशो बाक्मा बाक्त। मिनु आन मुर निक्शी योव़शा, पत्रुस कली “आंइ बाक्तीक रीब जाक्शा, वारच पाइक्चा नकी” दे ब्रथ सोइक्तमे बाक्त।
39मिनु पत्रुस मेको आस लोव़ नेंशा मेको नु काथा लमाक्त। मिनु जाक्मेनु, तला तारी लदमे बाक्त। तला तारी आन वोंइश बेक्शो मारेइ मथीब मीश मुर खुम्सीशा ङाक्ना ङाक्न बाक्शो बाक्मा बाक्त। मिनु पत्रुस कली “तबीतामी शुश वारच पाइक्तीकी, ओदेंशो वा फेरशा गेतीकी” दे तबीतामी फेरशा गेशो वापुकी कोंइदमे बाक्त।
40मिनु पत्रुसमी मेकेर ङाक्शा बाक्ब नेल्ल आन कली लाङगा सोइक्तीमी बाक्त। मिनु आ पोक्च थेक्शा, प्रार्थना पवा बाक्त। मिनु तबीता आ बेक्शो रां गे हिरशा कोव़शा “ए तबीता, छुल बोक्को” देंमेनु, तबीतामी आ मिक्च पाक्शा कोव़ङानु, पत्रुस कली तवा बाक्त। मर्कूस ५:४१
41मिनु पत्रुसमी आ गुइ कीशा पोक्गा बाक्त। मिनु लाङगा सोइश्शो नु प्रभु आ योव़शो नेल्ल आन कली खिं गा ब्रेश्शा, तबीता कली बेक्शो रे सेंपाइश्शो कोंइदा बाक्त।
42मोदेंशो दुम्त देंशो लोव़ योप्पा सहरमी बाक्ब नेल्लेमी नेन्मे बाक्त। मिनु शुशेमी प्रभु कली थमा सुदमे बाक्त।
43मिनु पत्रुस योप्पा ङा कुशुल नोक्ब सिमोन आ खिंमी शुश नाक्त बाक्माक्त।
