1मेको बर्समी पिप हेरोदमी यरूसलेम सहरम बाक्ब थमा सुइक्ब का निक्शी आन कली खेदा पा ग्याइश्शा, शुश श्येत गेमी बाक्त।
2यूहन्ना आ लोक्ब याकूब कली तरवारमी क्योरपा साइक्पदा बाक्त। मत्ती २०:२०-२३
3हेरोदमी “आं पशो तशा यहूदीपुकी ग्येरसीनीम” दे तुइश्शा, मोदेंशो खेदा पना पन लमाक्त। मिनु पत्रुस कली यो ग्याइक्पदा बाक्त। पत्रुस कली ग्याइक्पदानु, बोरब ओख्ती मसुप्शो शोब्ले जतीक चाड जाक्शो बाक्माक्त।
4मोपतीके पास्सा चाड थुम्शा, मुर आन ङोंइती राप्पाइक्चा, दे जेल्खानमी चोक्शा, ४, ४ जना पालो पालो पा बाक्कीन, दे १६ जना सिपाही वोइक्पदा बाक्त।
5पत्रुस जेल्खानमी चोक्सीशा बाक्मेनु, थमा सुइक्ब नेल्ल थुं का दुम्शा “पत्रुस कली कोव़ङीने, प्रोंइशा सोइक्तीने” दे प्रार्थना पा बाक्मा बाक्त।
6हेरोदमी पत्रुस कली मुर आन ङोंइती राप्पाइक्चा देंशो नाक्त आ ङोंइती नाक्दो पत्रुस साङलो निक्शीमी पाइश्शा, सिपाही निक्शी आस दातेम इप्पाइश्शो बाक्माक्त। लाप्चो आ ङोंइती यो खाल पाइबपुकी बाक्मा बाक्त।
7मिनु मार दुम्माक्त देंशा हना, परमप्रभु यावे आ स्वर्ग ङा गेय पाइब का फो ग्रूशा, पत्रुस आ ङोंइती राम्माक्त। मिनु कोठा छेङछेङ तांइसे बाक्त। मिनु परमप्रभु यावे आ स्वर्ग ङा गेय पाइबमी पत्रुस कली “छुल बोक्को” दे चुशा पोक्गा बाक्त। मिनु बोक्मेनु, आ गुइमी पाइश्शो साङलो बुइश्शा खपीमी देल्माक्त। प्रेरित ५:१९
8मिनु “किप्शुर किम्सो, इ जुत्ता मुंइसो” देंमेनु, पत्रुसमी किप्शुर किप्शा, जुत्ता मुंइसे बाक्त। मिनु “इ किप्शुर किप्शा रुक्शा, आं नोले खोइय्यी” देंमाक्त।
9मिनु पत्रुस मेको आ नोनोले खोइश्शा, कोठा रे ग्रूसा बाक्त। पत्रुसमी चहिं एको नेल्ल गो कोंइतीक तना तन बाक्नुङ, दे मिम्ता बाक्त। थमा कोठा रे ग्रूङा बाक्त, दे मतुइश्शो बाक्माक्त।
10मिनु कोठा रे ग्रूशा, ङोंइती बाक्ब खाल पाइब कली लाक्शा, नोले बाक्ब कली यो लाक्शा, फलाम के सेल्शो ठेयब लाप्चो जाक्दीस्सा बाक्त। मेकेर जाक्दीस्सानु, लाप्चो रोक्से बाक्त। मिनु ग्रूशा गाक्सा बाक्त। मिनु लां का लाग्सेनु, परमप्रभु यावे आ स्वर्ग ङा गेय पाइबमी पत्रुस कली प्रोंइशा गाक्माक्त।
11मेना ब्रङ सेंसीशा “परमप्रभुमी पिप हेरोद नु आं कली खेदा पाइब यहूदी आन गुइ रे प्रोंइथ, आ गेय पाइब सोइश्शा प्रोंइयी बाक्त” दे तुइक्ता बाक्त।
12मेको तुइश्शा मर्कूस, यूहन्ना नें यो वोइश्शो, आ ममा मरीयम आ खिं गे लमाक्त। मरीयम आ खिंमी थमा सुइक्ब शुश खुम्सीशा, प्रार्थना पना पन बाक्शो बाक्मा बाक्त। प्रेरित १२:२५; प्रेरित १३:५,१३; प्रेरित १५:३७
13मिनु पत्रुस जाक्शा, लाङगा ङा लाप्चो ख्रोकोल पदा बाक्त। मिनु रोदा माइश्शो गेय पाइब मीश मुरुम सु जाक्मे, दे कोव़थ ग्रूमाक्त।
14मिनु पत्रुस आ सेंदा नेंशा, पत्रुस जाक्माक्त, दे तुइश्शा, लाप्चो मरोक्थु फ्रा लेश्शा, खिं गामी बाक्शो आन कली “आमाइ, लाप्चो ङोंइती राप्शा बाक्ब दा पत्रुस कका बाक्त” दे माइक्मी बाक्त।
15मोदेंशो नेंशा “गे मार निप्स ग्यशो लोव़ पवी?” दे आ देंशो थमा मसुदमे बाक्त। रोदामी चहिं लोव़ थोक्शा, “थमान पत्रुस जाक्त” देंमेनु “मो हना पत्रुस ममाइ। पत्रुस कली कोव़ब परमप्रभु यावे आ स्वर्ग ङा गेय पाइब बाक्म माइ?” देंमा बाक्त।
16मोपा लोव़ पना पन बाक्मानु, पत्रुसमी लाप्चो ख्रोकोल पाइक्स ङा पाइक्स बाक्माक्त। मिनु नोले लाप्चो रोक्शा कोव़ङमेनु, पत्रुस कली तशा “आल्लेइ” दे छक लाक्मा बाक्त।
17मिनु पत्रुस ओव़शा आ गुइ हिक्शा, आ शोव़ थीप थीप पा सिक्सी पा नेनीन देंशा, दोपा प्रभुमी जेल्खान रे प्रोंइशा सोइक्ता, मेको नेल्ल तुइक्पाइक्मी बाक्त। मिनु “याकूब नु इं थमा सुइक्ब लोक्ब नेल्ल आन कली एको लोव़ नेंपतीन, है” देंशा, मेकेर रे गाक्माक्त।
18जेल्खानमी चहिं मार दुम्माक्त देंशा हना, सुनी कना सिपाही नु खाल पाइबपुकीमी पत्रुस कली मतामे बाक्त। मिनु शुश हिंशा, मार दुम्मे, ते लाक्गा, दे वाइ की ब्रेम्मा बाक्त। प्रेरित ५:२१-२२
19मिनु पिप हेरोदमी पत्रुस कली माल्थ सोइक्तीमी बाक्त। माल्ना माल्न गाक्मानु, यो तेइ मथिदमे बाक्त। मिनु थिन्ने मचाप्शो तशा, पिपमी खाल पाइब आन कली ब्रेश्शा हिल्लो हिक्सी पशा यो मारेइ तुइक्ने मचाप्तीके खाल पाइब सिपाही आन कली साइक्पाइक्मी बाक्त। मिनु यहूदीया रागी रे सिजरिया सहर याक्सीशा बाक्माक्त।
20पिप हेरोद मेकेर बाक्मेनु, टायर नु सीदोन सहर ङा मुर आन कली तशा चुरमाक्त। मोपतीके मेकोपुकीमी मुर निक्शी का योव़शा, ब्लास्तस नें पाइश्शो पिप आ ठेयब गेय पाइब मुर नु गारशा, पिप कली ग्रुम्थ जाक्मा बाक्त। मिनु मेकोपुकीमी “दुशा गारशा बाक्य, सरकार” दे सेउ पदमे बाक्त। मारदे हना पिप हेरोद आ रागी रे मचाक्थु जचा मजाक्दीम्माक्त। इजीकीएल २७:१७
21मिनु काबु पिप हेरोदमी रकारी वा फेक्शा, आ ठेयब नित्तीकेमी निश्शा, मेको आन कली आ लोव़ नेंपाइक्मी बाक्त।
22मिनु आ लोव़ नेंशा “मुर आ लोव़ ममाइ, देवता आ लोव़ बाक्माक्त” देंशा, रेयके पा पिप कली ठेयब सेल्मे बाक्त। इजीकीएल २८:२
23पिप हेरोदमी परमप्रभु यावे कली मान मपथु, आंमान ठेयब सेल्सीतीके परमप्रभु यावे आ स्वर्ग ङा गेय पाइबमी मेको कली रोइ पपदा बाक्त। मिनु मेको हेरोद लुस्पु जोल्शा बेक्माक्त। दानीएल ५:२०
24परमप्रभु यावे आ लोव़ तेइ तेइ ब्रशा, शुश मुर थमा सुइक्ब दुम्मा बाक्त। प्रेरित ६:७
25बारनाबास नु सावल यरूसलेममी क्येट चोव़ने थुम्शा, एन्टीओक लेस्सा बाक्त। लेस्सानु, मर्कूस कली यो लदसे बाक्त। मर्कूस कली यूहन्ना नें यो वोइश्शो बाक्त। प्रेरित ११:२९-३०; प्रेरित १३:५
