يَيَ 9:11-24

¹¹عَ نَشَ عٍ يَابِ، «شّمّ نَشَن شِلِ قَلَمَ عِسَ، نَ نَن بّندّ يٌفٌن دّيٍ رَ، عَ عَ سَ ﭑ يَ مَ، عَ قَ عَ قَلَ ﭑ بّ، ‹سَ عِ يَ رَشَ سِلْمُ يٍ يِرٍ.› نَ كُي، ﭑ تٌ سَ ﭑ يَ رَشَ، ﭑ نَشَ سٍ تٌ.»

¹²عٍ نَشَ قَ عَ مَشْرِن، «يِ شّمّ نَ مِندٍن؟» عَ نَشَ عٍ يَابِ، «ﭑ مُ عَ كٌلٌن.»

¹³عٍ نَشَ دْنشُي رَيَلَنشِ شَنِن قَرِ سّنِيٍ يِرٍ.

¹⁴عِسَ دّيٍ مَسُنبُشِ بّندّ رَ لْشْ نَشّ، عَ دْنشُي يَ رَبْو، مَلَبُ لْشْي نَن نُ عَ رَ.

¹⁵نَ كُي، قَرِ سّنِيٍ قَن نَشَ سٌ عَ مَشْرِنقٍ، عَ يَ رَبْوشِ كِ نَشّ. عَ نَشَ عٍ يَابِ، «عَ بّندّ يٌفٌنشِ نَن سَ ﭑ يَ مَ، ﭑ عٍ رَشَ، عٍ سٍ تٌ.»

¹⁶قَرِ سّنِ ندٍيٍ نَشَ عَ قَلَ، «يِ شّمّ عِسَ، عَ مُ كٍلِشِ عَلَ شَ مَ، بَرِ مَ عَ مُ مَلَبُ لْشْي سّرِيّ رَبَتُمَ.» كْنْ فبّتّيٍ نُ عَ قَلَمَ، «يُنُبِتْي نْمَ يِ كَابَنَكٌ مْولِيٍ رَبَدٍ؟» نَ كُي، قَرِ سّنِيٍ مُ نُ لَنشِ عٍ بٌرٍ مَ.

¹⁷عٍ مَن نَشَ دْنشُي رَيَلَنشِ مَشْرِن، «عَ تٌ عِ تَن نَن يَ رَبْوشِ، عِ تَن عَ شَ قٍ تٌشِ دِ؟» عَ نَشَ عٍ يَابِ، «نَمِحْنمّ نَن عَ رَ.»

¹⁸يُوِقِ كُنتِفِيٍ نُ سِيكّشِ نَ دْنشُي شَ قٍ رَ. عٍ مُ نُ عَ كٌلٌن شَ دْنشُي يَتِ يَتِ نَن نُ عَ رَ. نَ كُي، عٍ نَشَ عَ بَرِ مِشِيٍ شِلِ،

¹⁹عٍ عٍ مَشْرِن، «وٌ شَ دِ نَن يَ، وٌ نَشَن مَ عَ عَ دْنشُشِ نَن بَرِشِ؟ عَ يَ قَ رَبْوشِ دِ؟»

²⁰عَ بَرِ مِشِيٍ نَشَ عٍ يَابِ، «مُشُ عَ كٌلٌن، عَ مُشُ شَ دِ نَن عَ رَ. مُشُ مَن عَ كٌلٌن، عَ عَ بَرِشِ دْنشُيَ نَن كُي.

²¹كْنْ عَ يَ قَ رَبْوشِ كِ نَشّ، مُشُ مُ نَ تَن كٌلٌن. مُشُ مَن مُ عَ كٌلٌن مِشِ يٌ نَ رَبَشِ عَ بّ. وٌ عَ تَن نَن مَشْرِن. دِ مّدِ شَ مُ عَ رَ، عَ يّتّ عَ شَ دّنتّفّ سَمَ.»

²²عَ شَ مِشِيٍ نَ يَابِ تِ نّ، بَرِ مَ عٍ نُ فَاشُشِ يُوِقِ كُنتِفِيٍ يَ رَ. نٍيٍ نُ بَرَ لَن عَ مَ عَ مِشِ يٌ نَشَن نَ عَ قَلَ عِسَ عَلَ شَ مِشِ سُفَندِشِ نَن عَ رَ، عٍ شَ تْنيِ دْشْ نَ كَنيِ مَ عَ نَشَ سٌ سَلِدٍ كُي.

²³نَ نَن عَ نِيَ عَ بَرِ مِشِيٍ نَشَ عَ قَلَ، «دِ مّدِ شَ مُ عَ رَ، وٌ عَ تَن نَن مَشْرِن.»

²⁴نَ كُي، قَرِ سّنِيٍ نَشَ نَ دْنشُي رَيَلَنشِ شِلِ عَ قِرِن ندٍ، عٍ عَ قَلَ عَ بّ، «عِ عِ كَلِ عَلَ رَ، عِ نْندِ قَلَ. مُشُ تَن عَ كٌلٌن عَ يُنُبِتْي نَن نَ نَ شّمّ رَ.»