كْنتِ تِقٍ 22:1-32

¹عِسِرَيِلَكَيٍ نَشَ سِفَ عٍ سَ يٌنكِن مٌوَبَ قِيلِ مَ، يُرُدّن شُرٍ دّ، يٍرِكٌ يَ تَفِ.

²سِثٌرٌ شَ دِ شّمّ بَلَكِ نُ بَرَ عَ مّ عِسِرَيِلَكَيٍ نَشَن نَبَشِ عَمٌرِكَيٍ رَ.

³مٌوَبَكَيٍ نُ بَرَ فَاشُ عِسِرَيِلَ حَمَ بٍلٍبٍلٍ شَ قٍ رَ.

⁴نَ كُي، عٍ نَشَ عَ قَلَ مَدِيَن كُنتِفِيٍ بّ، «يِ حَمَ بٍلٍبٍلٍ قَمَ وٌن مَ بْشِ بِرِن شُن نَكَنَدٍ، عَلْ نِنفٍيٍ مّرّ شُن نَكَنَمَ كِ نَشّ.» بَلَكِ نَن نُ نَ مٌوَبَ مَنفّ رَ نَ تّمُي.

⁵عَ نَشَ شّيرَيٍ شّي بٍيٌرِ شَ دِ شّمّ بَلَمِ يِرٍ، نَشَن نُ سَبَتِشِ ثٍتٌرِ، عَ بَرِ تَا شُرٍ دّ رَ، عَ قَلَقٍ رَ، «حَمَ بٍلٍبٍلٍ ندٍ بَرَ كٍلِ مِسِرَ بْشِ مَ، عٍ قَ يٌنكِن ﭑ مَ بْشِ سّيتِ مَ.

⁶يَندِ، عِ شَ قَ يِ حَمَ دَنكَدٍ، بَرِ مَ عٍ سّنبّ فبٌ ﭑ بّ. تّمُندٍ، نَ كِ ﭑ نْمَ نّ عٍ بْنبْدٍ، ﭑ عٍ كٍرِ يِ بْشِ مَ. ﭑ عَ كٌلٌن، عِ نَ دُبَ نَشَن بّ، نَ بَرَ بَرِكَ. عِ مَن نَ نَشَن دَنكَ، نَ قَن بَرَ دَنكَ.»

⁷مٌوَبَ كُنتِفِيٍ نُن مَدِيَن كُنتِفِيٍ نَشَ سِفَ سٍ مَتٌي سَرٍ رَ بَلَمِ شْن، عٍ قَ بَلَكِ شَ شّيرَيَ عِبَ عَ بّ.

⁸بَلَمِ نَشَ عَ قَلَ عٍ بّ، «وٌ شَ كْي رَدَنفِ بٍ. عَلَتَلَ نَ يَابِ سٌ ﭑ يِ، ﭑ نَ قَلَمَ نّ وٌ بّ.» نَ كُي، مٌوَبَ كُنتِفِيٍ نَشَ شِ بَلَمِ شْنيِ.

⁹عَلَتَلَ نَشَ مِنِ بَلَمِ مَ، عَ عَ مَشْرِن، «ندٍ نَ يِ مِشِيٍ رَ عِ نَشٍيٍ رَ سّنّشِ عِ شْنيِ يِ كِ؟»

¹⁰بَلَمِ نَشَ عَ يَابِ، «مٌوَبَ مَنفّ سِثٌرٌ شَ دِ شّمّ بَلَكِ نَن يِ مِشِيٍ شّي، عَ عٍ شَ قَ عَ قَلَ ﭑ بّ،

¹¹‹حَمَ بٍلٍبٍلٍ ندٍ بَرَ كٍلِ مِسِرَ بْشِ مَ، عٍ قَ سَبَتِ ﭑ مَ بْشِ سّيتِ مَ. عِ شَ قَ يِ حَمَ دَنكَ، عَلَكٌ ﭑ شَ نْ عٍ كٍرِدٍ.›»

¹²عَلَتَلَ نَشَ عَ مَسٍن بَلَمِ بّ، «عِ نَشَ بِرَ يِ مِشِيٍ قْشْ رَ، عِ نَشَ نَ حَمَ دَنكَ. بَرَكَتْي حَمَ نَ عَ رَ.»

¹³نَ كُيٍ عِبَ بَلَمِ نَشَ كٍلِ، عَ عَ قَلَ بَلَكِ شَ كُنتِفِيٍ بّ، «وٌ فبِلٍن وٌ شَ بْشِ مَ، بَرِ مَ عَلَتَلَ مُ تِنشِ ﭑ شَ بِرَ وٌ قْشْ رَ.»

¹⁴نَ كُي، مٌوَبَ كُنتِفِيٍ نَشَ فبِلٍن بَلَكِ يِرٍ، عٍ عَ قَلَ عَ بّ، «بَلَمِ بَرَ تٌندِ بِرَدٍ مُشُ قْشْ رَ.»

¹⁵بَلَكِ مَن نَشَ كُنتِفِ فبٍفبٍ فبّتّ شّي، نَشٍيٍ تِدٍ دَنفِ عَ سِنفٍيٍ رَ.

¹⁶عٍ نَشَ سِفَ بَلَمِ يِرٍ، عٍ عَ قَلَ عَ بّ، «بَلَكِ شَ مَسٍنيِ نَن يَ؛ ‹ﭑ تَن سِثٌرٌ شَ دِ شّمّ بَلَكِ، ﭑ بَرَ عِ مَيَندِ، عِ نَشَ تٌندِ تَلُقٍ رَ ﭑ يِرٍ!

¹⁷ﭑ عِ سَرٍ قِمَ نّ عَ قَنيِ رَ. عِ وَ مَ نَشَن يٌ شْن، ﭑ نَ قِمَ نّ عِ مَ. يَندِ عِ شَ يِ حَمَ دَنكَ ﭑ بّ.›»

¹⁸كْنْ بَلَمِ نَشَ بَلَكِ شَ شّيرَيٍ يَابِ، «هَلِ بَلَكِ عَ شَ بَنشِ رَقٍ فبٍتِ نُن شّيمَ رَ، عَ عَ سٌ ﭑ يِ رَ، ﭑ مُ نْمَ قٍقٍ رَبَدٍ ﭑ مَرِفِ عَلَتَلَ مُ ﭑ يَمَرِ نَشَن نَ.

¹⁹وٌ نَشَن نَبَمَ، وٌ قَن شَ لُ بٍ هَن تِنَ فّيسّفّ. ﭑ مَن شَ عَلَتَلَ شَ مَسٍنيِ رَ مّ.»

²⁰عَلَتَلَ نَشَ مِنِ بَلَمِ مَ كْي رَ، عَ عَ مَسٍن عَ بّ، «يِ مِشِيٍ تٌ بَرَ قَ عِ شِلِدٍ، عِ شَ بِرَ عٍ قْشْ رَ، كْنْ ﭑ نَ نَشَن قَلَ عِ بّ، عِ نَ نَن نَبَمَ.»

²¹نَ كُيٍ عِبَ بَلَمِ نَشَ بَكِ عَ شَ سٌقَلٍ قَرِ، عَ بِرَ مٌوَبَ كُنتِفِيٍ قْشْ رَ.

²²بَلَمِ سِفَقٍ نَشَ عَلَتَلَ رَشْنْ. عَلَتَلَ شَ مَلٍكّ نَشَ سِفَ كِرَ عِبٌلٌندٍ بَلَمِ يَ رَ. عَ نُ دْشْشِ عَ شَ سٌقَلٍ قَرِ، عَ شَ وَلِكّ قِرِنيِيٍ نُ نَ عَ قْشْ رَ.

²³بَلَمِ شَ سٌقَلٍ تٌ عَلَتَلَ شَ مَلٍكّ تٌ كِرَ تَفِ، سَنتِدّفّمَ سُشُشِ عَ يِ، عَ رَ مِنِشِ عَ تّ عِ، عَ نَشَ كٍلِ كِرَ شْن مَ، عَ سٌ شّ رَ. بَلَمِ نَشَ سٌقَلٍ بْنبْ، عَلَكٌ عَ شَ عَ شُن تِ كِرَ رَ.

²⁴عَلَتَلَ شَ مَلٍكّ مَن نَشَ سَ تِ عٍ شَ كِرَ دِ شْن مَ وّنِ بِلِيٍ تّتّ قِرِنيِيٍ تَفِ.

²⁵سٌقَلٍ تٌ عَلَتَلَ شَ مَلٍكّ تٌ، عَ نَشَ عَ رَشّتّن تّتّ رَ، عَ بَلَمِ سَنيِ شّتّن تّتّ رَ عَ حَاشِ رَ. بَلَمِ نَشَ فبِلٍن عَ بْنبْ رَ.

²⁶عَلَتَلَ شَ مَلٍكّ مَن نَشَ سَ تِ يِرٍ رَشّتّنشِ عَ قَنيِ رَ. دَنفِدٍ يٌ مُ نُ نَ.

²⁷سٌقَلٍ تٌ عَلَتَلَ شَ مَلٍكّ تٌ، عَ نَشَ عَ سَ بَلَمِ بُن مَ. بَلَمِ نَشَ شْنْ عَ مَ، عَ عَ بْنبْ عَ شَ يِسُشُوُرِ رَ.

²⁸نَ كُي، عَلَتَلَ نَشَ سٌقَلٍ دّ رَ مِنِ، عَ عَ نِيَ عَ شَ عَ قَلَ بَلَمِ بّ، «عَ سَشَن ندٍ نَن يِ كِ عِ ﭑ بْنبْمَ. ﭑ مُنسٍ رَبَشِ عِ رَ؟»

²⁹بَلَمِ نَشَ عَ يَابِ، «عِ ﭑ مَتَندِشِ نّ. شَ سَنتِدّفّمَ نَ ﭑ يِ رَ نُ، ﭑ عِ قَشَمَ نّ كٍرٍن نَ.»

³⁰سٌقَلٍ نَشَ عَ قَلَ بَلَمِ بّ، «ﭑ تَن شَ مُ عِ شَ سٌقَلٍ رَ، عِ تٍمَ نَشَن قَرِ تّمُي بِرِن؟ ﭑ دَرِشِ يِ مْولِ رَبَ رَ؟» بَلَمِ نَشَ عَ يَابِ، «عَدٍ.»

³¹نَ تّمُي عَلَتَلَ نَشَ بَلَمِ يَ رَبِ مَلٍكّ تٌقٍ رَ، عَ تِشِ كِرَ تَفِ، عَ شَ سَنتِدّفّمَ بَشِ عَ تّ عِ، عَ سُشُشِ عَ بّلّشّ. بَلَمِ نَشَ عَ قٍلٍن، عَ سُيِدِ كٍرٍن نَ.

³²مَلٍكّ نَشَ عَ مَشْرِن، «مُنقٍ رَ عِ بَرَ عِ شَ سٌقَلٍ بْنبْ سَنيَ سَشَن؟ ﭑ قَشِ نّ ﭑ شَ كِرَ عِبٌلٌن عِ يَ رَ، بَرِ مَ عِ نَ كِرَ نَشَن شْن يِ كِ، مُرُتّلَ شَ كِرَ نَ عَ رَ.