كْنتِ تِقٍ 21:7-26

⁷حَمَ نَشَ عَ قَلَ مُنسَ بّ، «مُشُ بَرَ يُنُبِ رَبَ وْيّنقٍ رَ عِ تَن نُن عَلَتَلَ مَ. عِ شَ عَلَتَلَ مَشَندِ مُشُ بّ، عَ شَ يِ بْشِمَسٍيٍ مَكُيَ مُشُ رَ.» مُنسَ نَشَ تِن نَ رَ، عَ عَلَتَلَ مَشَندِ حَمَ بّ.

⁸عَلَتَلَ نَشَ عَ يَابِ، «بْشِمَسٍ مِسَالِ رَقَلَ وُرٍ فبٍيلِ رَ، عَ فبَكُ وُرِ كُيٍ رَ. مِشِ شِنشِ نَشَن عَ يَ تِمَ نَ رَ، عَ مُ قَشَمَ.»

⁹مُنسَ نَشَ بْشِمَسٍ يَءِلَن وُرٍ فبٍيلِ رَ، عَ عَ فبَكُ وُرِ كُيٍ رَ. نَ تّمُي بْشِمَسٍيٍ مِشِ نَشٍيٍ شِنشِ، عٍ نُ نْمَ عٍ يَ تِدٍ نَ رَ، عٍ كِسِ.

¹⁰عِسِرَيِلَكَيٍ نَشَ سِفَ، عٍ سَ يٌنكِن عٌبٌتِ.

¹¹عٍ نَشَ كٍلِ مّننِ، عٍ سِفَ عِيٍ عَبَرِ مِ فبٍنفبٍرٍنيِ مَ نَشَن يَ رَقِندِشِ مٌوَبَ بْشِ مَ، سٌفٍتٍدٍ مَبِرِ.

¹²عٍ تٌ كٍلِ مّننِ، عٍ نَشَ سِفَ سٍرٍدٍ فُلُنبَ يِرٍ.

¹³عٍ تٌ كٍلِ مّننِ، عٍ نَشَ سِفَ عَرِنٌن دّ رَ، شُرٍ نَشَن نَ عَمٌرِ بْشِ مَ. عَرِنٌن نَن نَ نَانِنيِ رَ مٌوَبَكَيٍ نُن عَمٌرِكَيٍ تَفِ.

¹⁴نَ نَن عَ رَ، عَ سّبّشِ سّبّلِ ندٍ كُي، عَلَتَلَ شَ فٍرٍيٍ شَ قٍ نَ نَشَن كُي، «وَهٍبِ نُن عَ شَ فُلُنبَيٍ نَ سُقَ بْشِ مَ،

¹⁵عَرِنٌن فُلُنبَيٍ فٍشِ هَن عَرِ، عَ قِندِ مٌوَبَ نَانِنيِ نَن نَ.»

¹⁶عٍ تٌ كٍلِ، عٍ نَشَ سِفَ بٍيرِ، عَلَتَلَ عَ مَسٍن مُنسَ بّ دّننَشّ، «حَمَ مَلَن، ﭑ شَ عٍ كِ يٍ رَ.»

¹⁷عِسِرَيِلَكَيٍ يِ سُوكِ بَ نَ وَشَتِ نّ؛ «يٍ شَ تٍ كْلْنيِ رَ! وٌ شَ بّيتِ بَ عَ شَ قٍ رَ!

¹⁸مَنفّيٍ نُن كُنتِفِيٍ بَرَ عَ فٍ، مَنفّ تْنشُمَ كَنيِيٍ.»

¹⁹عٍ تٌ كٍلِ فبٍنفبٍرٍنيِ مَ، عٍ نَشَ سِفَ مَتَنَ. عٍ تٌ كٍلِ مَتَنَ، عٍ نَشَ سِفَ نَشَلِيّلِ. عٍ تٌ كٍلِ نَشَلِيّلِ، عٍ نَشَ سِفَ بَمٌتِ.

²⁰عٍ تٌ كٍلِ بَمٌتِ، عٍ نَشَ سِفَ مٌوَبَ فُلُنبَ يِرٍ، ثِسِفَ فٍيَ نَ دّننَشّ. فبٍنفبٍرٍن يِرٍ بِرِن تٌمَ نّ نَ فٍيَ قَرِ.

²¹عِسِرَيِلَكَيٍ نَشَ شّيرَيٍ شّي عَمٌرِكَيٍ شَ مَنفّ سِشْن يِرٍ عَ قَلَقٍ رَ،

²²«مُشُ وَ مَ فِرِقٍ عِ شَ بْشِ نَن مَ. مُشُ مُ شّ يِرٍ نُن وّنِ بٌفِ يِرٍ لِمَ. مُشُ مُ وٌ شَ كْلْن يٍ مِنمَ. مُشُ لُمَ مَنفّ شَ كِرَ فبَنسَن نَن شْن مَ، هَن مُشُ عِ شَ بْشِ عِفِرِ.»

²³سِشْن مُ تِن عٍ شَ دَنفِ عَ شَ بْشِ مَ. عَ نَشَ عَ شَ سْورِيٍ مَلَن، عٍ نَشَ مِنِ عِسِرَيِلَكَيٍ شِلِ مَ فبٍنفبٍرٍنيِ مَ، عٍ قَ عٍ فٍرٍ يَهَسِ.

²⁴عِسِرَيِلَكَيٍ نَشَ فٍينِ. عٍ نَشَ عٍ شَ بْشِ بِرِن تٌنفٌ كٍلِ عَرِنٌن شُرٍ مَ هَن يَبٌكٌ شُرٍ، هَن عَمٌنِكَيٍ شَ بْشِ نَانِنيِ رَ. عٍ مُ نْ دَنفِدٍ نَ رَ بَرِ مَ عَمٌنِكَيٍ سّنبّ نُ فبٌ.

²⁵كْنْ عِسِرَيِلَكَيٍ نَشَ عَمٌرِكَيٍ شَ تَايٍ بِرِن سُشُ، عٍ قَ سَبَتِ نٍيٍ كُي. عٍ نَشَ شّسِبْن قَن سُشُ، عَ نُن عَ شَ رَبِلِنيِ.

²⁶شّسِبْن نَن نُ نَ عَمٌرِكَيٍ شَ مَنفّ سِشْن شَ مَنفَتَا رَ. عَ نُ بَرَ نَ تَا بَ مٌوَبَ مَنفّ ندٍ يِ، عَ نُن عَ شَ بْشِ بِرِن هَن عَرِنٌن شُرٍ.