كْنتِ تِقٍ 16:23-33

²³عَلَتَلَ نَشَ مُنسَ يَابِ،

²⁴«عَ قَلَ حَمَ بِرِن بّ، عٍ شَ عٍ مَكُيَ كٌرَ، دَتَن، نُن عَبِرَ مِ شْنيِ رَ.»

²⁵مُنسَ نُن عِسِرَيِلَ كُنتِفِيٍ نَشَ سِفَ عَبِرَ مِ نُن دَتَن يِرٍ.

²⁶عَ نَشَ عَ قَلَ حَمَ بّ، «وٌ وٌ مَكُيَ يِ يُنُبِتْييٍ شَ لِنفِرَيٍ رَ. وٌ نَشَ دِن عٍ شَ سٍيٍ رَ، عَلَكٌ وٌ نَشَ قَ قَشَ عٍ شَ يُنُبِيٍ شَ قٍ رَ.»

²⁷حَمَ نَشَ عَ مَسِفَ كٌرَ، دَتَن، نُن عَبِرَ مِ شَ لِنفِرَيٍ رَ. دَتَن نُن عَبِرَ مِ نَشَ مِنِ عٍ شْنيِ، عٍ تِ نَادّ رَ، عٍ نُن عٍ شَ فِنّيٍ، نُن عٍ شَ دِيٍ.

²⁸مُنسَ نَشَ عَ قَلَ، «وٌ عَ كٌلٌنمَ عَ عَلَتَلَ نَن ﭑ تِشِ يِ وَلِ بِرِن نَ، ﭑ تَن مُ عَ رَ.

²⁹شَ يِ مِشِيٍ مُ قَشَ كَابَنَكٌي رَ، عَلَتَلَ مُ ﭑ شّيشِ.

³⁰كْنْ شَ عَلَتَلَ سَ كَابَنَكٌ رَبَ، عَ بْشِ رَبِ، عٍ فٌرٌ عٍ حِحّ رَ عَ كُي، عٍ تَن نُن عٍ كّ بِرِن، نَ نَن عَ مَسٍنمَ وٌ بّ، عَ عٍ بَرَ عَلَتَلَ مَبٍرٍ.»

³¹مُنسَ تٌ فّ نَ قَلَدٍ، بْشِ نَشَ رَبِ عٍ سَنيِ بُن مَ،

³²عَ عٍ فٍرُن، كٌرَ نُن عَ شَ مِشِيٍ، عٍ شَ لِنفِرَيٍ، عَ نُن عٍ شَ هَرِفٍ بِرِن.

³³عٍ نَشَ فٌرٌ عَلِفِيَمَ عٍ حِحّ رَ، عٍ تَن نُن عٍ سْتْسٍ بِرِن. بْشِ نَشَ عٍ مَكٌتٌ، عٍ نَشَ لْي حَمَ تَفِ.