كْنتِ تِقٍ 14:17-37

¹⁷«عِ شَ عِ سّنبّ مَسٍن عٍ بّ، عَلْ عِ تَن يَتِ عَ يِتَشِ كِ نَشّ، عَ قَلَقٍ رَ،

¹⁸‹ﭑ مُ شْنْمَ مَقُرٍن مَقُرٍن. ﭑ مَ دِحّ نُن قَنيِ فبٌ. ﭑ مِشِيٍ شَ يُنُبِيٍ نُن قٍ حَاشِيٍ شَقَرِ مَ. كْنْ ﭑ مِشِ كٌبِ نُن مِشِ قَنيِ تَفِ رَ سَمَ. ﭑ بٍنبَيٍ شَ يُنُبِ سَرٍ دْشْمَ عٍ شَ دِيٍ شُن مَ هَن بْنسْي سَشَن، شَ نَ مُ نَانِ.›

¹⁹يَندِ، ﭑ بَرَ عِ مَشَندِ، دِحّ عِ شَ حَمَ شَ يُنُبِ مَ عِ شَ هِننّ شَ قٍ رَ، عَلْ عِ عَ رَبَشِ كَبِ عٍ مِنِ مِسِرَ تّمُي نَشّ.»

²⁰عَلَتَلَ نَشَ عَ يَابِ، «ﭑ بَرَ دِحّ عِ شَ مَشَندِ شَ قٍ رَ.

²¹كْنْ، ﭑ بَرَ ﭑ كَلِ، نْندِ نَن عَ رَ عَلْ ﭑ تٌ نَ نَ، عَلْ ﭑ مَ نْرّ نَشَن بْشِ رَقٍمَ،

²²شّمّ نَشَن بِرِن ﭑ مَ نْرّ نُن ﭑ مَ كَابَنَكٌي تٌشِ، ﭑ نَشٍيٍ رَبَ مِسِرَ نُن فبٍنفبٍرٍنيِ مَ، كْنْ عٍ قَ مُرُتَ ﭑ مَ هَن سَنيَ قُ تُلِ شْرْشْي رَ،

²³نٍيٍ سٍسٍ مُ بْشِ تٌمَ، ﭑ نَشَن لَايِدِشِ عٍ بٍنبَيٍ بّ. نَشَن بِرِن مُرُتَشِ ﭑ مَ، عٍ سٍسٍ مُ نَ تٌمَ.

²⁴كْنْ ﭑ مَ كٌنيِ دِ كَلٍبِ تٌ بِرَ شَشِلِ فبّتّ قْشْ رَ، عَ قَ ﭑ نَبَتُ، ﭑ عَ تَن نَسٌمَ نّ نَ بْشِ مَ، عَ نَشَن نَبّنشِ. عَ بْنسْي كّ سْتْمَ نّ نَا.

²⁵عَمَلّكِكَيٍ نُن كَنَانكَيٍ تٌ سَبَتِ فُلُنبَ كُي، تِنَ وٌ شَ وٌ مَقِندِ، وٌ شَ فبِلٍن فبٍنفبٍرٍنيِ مَ شُلُنيُمِ بَا مَبِرِ.»

²⁶عَلَتَلَ نَشَ عَ مَسٍن مُنسَ نُن هَرُنَ بّ،

²⁷«يِ حَمَ كٌبِ ﭑ مَتَندِ مَ هَن مُن تّمُي؟ ﭑ بَرَ عِسِرَيِلَكَيٍ شُي مّ، عٍ نَشَن قَلَمَ ﭑ بّ، عٍ تِ ﭑ كَنكٍ.

²⁸عَ قَلَ عٍ بّ، ‹ﭑ بَرَ ﭑ كَلِ، نْندِ نَن عَ رَ، عَلْ ﭑ تٌ نَ نَ، ﭑ عَ رَبَمَ نّ وٌ بّ عَلْ ﭑ عَ مّشِ وٌ دّ عِ كِ نَشّ.

²⁹وٌ تَن مَتَندِلَيٍ، نَشَن بِرِن كْنتِشِ عِسِرَيِلَ حَمَ يَ مَ، نَشٍيٍ شَ سِمَيَ بَرَ دَنفِ حّ مْشْحّن نَ، وٌ قَشَمَ نّ يِ فبٍنفبٍرٍنيِ مَ.

³⁰وٌ مُ سٌمَ بْشِ مَ ﭑ نَشَن لَايِدِ وٌ بّ، قٌ يٍقُنٍ شَ دِ شّمّ كَلٍبِ نُن نُنُ شَ دِ شّمّ يٌسُوٍ.

³¹وٌ شَ دِيٍ، وٌ نَشٍيٍ مَ عَ عٍ بِرِن قَشَمَ فٍرٍ نَن كُي، ﭑ نٍيٍ تَن نَسٌمَ نّ نَ بْشِ كُي، وٌ مّيشِ نَشَن نَ.

³²وٌ قَشَمَ فبٍنفبٍرٍنيِ نَن مَ، وٌ قُرٍيٍ لُمَ نَ نّ.

³³وٌ شَ دِيٍ قِندِ مَ حّرّتِيٍ نَن نَ حّ تٌنفٌ نَانِ بُن مَ يِ فبٍنفبٍرٍنيِ مَ. عٍ وٌ شَ يُنُبِ سَرٍ شَنِنمَ هَن وٌ بِرِن قَشَ فبٍنفبٍرٍنيِ مَ.

³⁴وٌ شِ شَسَبِ نَشَن نَبَ نَ بْشِ رَبّندٍ، وٌ نَ حّ شَسَبِ رَبَمَ فبٍنفبٍرٍنيِ مَ وٌ شَ يُنُبِ شَ قٍ رَ. وٌ تٌ شِ تٌنفٌ نَانِ رَبَ نَ بْشِ رَبّندٍ، وٌ قَمَ نّ حّ تٌنفٌ نَانِ رَبَدٍ فبٍنفبٍرٍنيِ مَ، عَلَكٌ وٌ شَ عَ كٌلٌن ﭑ نَ يُنُبِ شْنشِ كِ نَشّ.

³⁵ﭑ تَن عَلَتَلَ، ﭑ بَرَ فّ وْيّندٍ. ﭑ بَرَ نَ نَتّ تٌنفٌ يِ حَمَ كٌبِ شَ قٍ رَ، نَشَن تِ ﭑ كَنكٍ. عٍ بِرِن قَشَمَ نّ فبٍنفبٍرٍنيِ مَ.›»

³⁶مُنسَ شَ شّيرَيٍ تٌ فبِلٍن كٍلِقٍ نَ بْشِ رَبّندٍ، عٍ نَشَ قٍ شْرْشْي قَلَ نَ بْشِ شَ قٍ رَ هَن عِسِرَيِلَ حَمَ نَشَ تِ مُنسَ كَنكٍ.

³⁷نَ كُي، عَلَتَلَ نَشَ عٍ قَشَ كٍرٍن نَ.