كَوَندِلَ 8:7-17

⁷مِشِ تٌ مُ عَ كٌلٌن قٍ نَشٍيٍ قَمَ رَبَدٍ، ندٍ نْمَ نٍيٍ تَفِ رَبَدٍ عَ بّ؟

⁸مِشِ يٌ مُ نْمَ عَ حّنفِ يَمَرِدٍ، مِشِ يٌ مُ نْمَ عَ قَشَ لْشْي سُفَندِدٍ. مِشِ مُ نْمَ كٍلِدٍ فٍرٍ شُن مَ، تِنشِنتَرٍيَ مُ قٍ كٌبِ رَبَيٍ بّحِنمَ.

⁹ﭑ بَرَ يِ بِرِن رَكْرْ سِ دُنِحَ مَ. ﭑ نَشَ مِشِ تٌ عَ نَ عَ بٌورٍ يَمَرِقٍ، عَ قَ عَ يّتّ تْورْ نَ كُي.

¹⁰ﭑ نَشَ مِشِ حَاشِيٍ تٌ نَشٍيٍ رَفَتَمَ بِنيّ كُي، مِشِيٍ نُ نَشٍيٍ مَتْشْمَ هْرْ مْلِنفِرَ يِرٍ تَا كُي. قٍ قُقَقُ نَن نَ كِ.

¹¹شَ قٍ كٌبِ رَبَيٍ مُ حَشَنكَتّ سْتْ عَ تّمُي، حَمَ قَن قَمَ نّ بِرَدٍ عٍ وَشْنقٍ حَاشِيٍ قْشْ رَ.

¹²ﭑ عَ كٌلٌن هَلِ قٍ كٌبِ رَبَيٍ فبِلٍن قٍ حَاشِ رَبَقٍ رَ هَن سَنمَيَ كّمّ، سْونّيَ تَن نَبَمَ نّ مِشِ بّ نَشَن فَاشُمَ عَلَ يَ رَ، نَشَن لُمَ عَ بَتُ رَ.

¹³كْنْ قٍ مُ سْونّيَمَ مِشِ حَاشِيٍ بّ نَشٍيٍ مُ فَاشُمَ عَلَ يَ رَ، عٍ شَ سِمَيَ شْن مُ كُيَمَ عَلْ مِشِ نِينِ.

¹⁴قٍ قُقَقُ فبّتّ نَ نَ يِ دُنِحَ مَ؛ قٍ شْرْشْي نَشَن لَن عَ شَ دْشْ مِشِ حَاشِ مَ، نَ نَن دْشْمَ تِنشِنتْي مَ. قٍ قَنيِ نَشَن لَن عَ شَ رَبَ تِنشِنتْي بّ، نَ نَن نَبَمَ مِشِ حَاشِ بّ. ﭑ شَ عَ قَلَ وٌ بّ، نَ قٍ مْولِ قِندِشِ قٍ قُقَقُ نَن نَ.

¹⁵نَ كُي عَ لَنمَ عَدَ مَ شَ سّيوَ عَ شَ دُنِحّءِفِرِ كُي. قٍ يٌ مُ نَ نَشَن قِسَ يِ بّ؛ مِشِ لَنمَ عٍ شَ عٍ دّفٍ، عٍ شَ عٍ مِن، عٍ شَ سّيوَ. نَ كِ عَ سّيوَ مَ نّ عَ شَ وَلِ رَ عَ شَ دُنِحّءِفِرِ كُي، عَلَ نَشَن قِشِ عَ مَ دُنِحَ بّندّ قُحِ قَرِ.

¹⁶ﭑ تٌ نَتّ تٌنفٌ ﭑ شَ قَهَامُي سْتْ عَدَ مَدِ شَ وَلِ شَ قٍ رَ، عَ نَشَن نَبَمَ كْي نُن يَنيِ،

¹⁷ﭑ نَشَ عَلَ شَ وَلِ مَتٌ. مِشِ يٌ مُ نْمَ سٌدٍ قٍ بِرِن كُي نَشَن نَبَمَ دُنِحَ مَ. هَلِ عَ كَتَ هَن، عَ مُ عَ كٌلٌنمَ قٍوٌ. هَلِ شَشِلِمَ نَشَن عَ قَلَمَ عَ بَرَ فّ نَ كٌلٌندٍ، عَ مُ نْمَ نَ كٌلٌندٍ يَتِ يَتِ.