عِسِرَيِلَ مَنفّيٍ ١ 3:3-22

³سُلٍمَنِ نُ عَلَتَلَ شَنُمَ، عَ مَن نُ بِرَ مَ عَ بَبَ دَوُدَ شَ يَامَرِيٍ قْشْ رَ، كْنْ عَ قَن نُ سّرّشّ نُن سُرَيِ بَمَ فٍيَيٍ نَن قَرِ عَلْ بٌورٍيٍ.

⁴مَنفّ نَشَ سِفَ فَبَيٌن سّرّشّ بَدٍ، بَرِ مَ نَ فٍيَ تِدٍ نُ فبٌ. سُلٍمَنِ نَشَ سّرّشّ فَن دَاشِ وُلُ كٍرٍن بَ مّننِ نَ سّرّشّبَدٍ قَرِ.

⁵عَلَتَلَ نَشَ مِنِ سُلٍمَنِ مَ شِيٍ كُي فَبَيٌن كْي رَ. عَلَ نَشَ عَ قَلَ عَ بّ، «عِ وَ مَ قٍ نَشَن يٌ شْن، عَ قَلَ ﭑ بّ ﭑ شَ عَ قِ عِ مَ.»

⁶سُلٍمَنِ نَشَ عَ يَابِ، عَ نَشّ، «عِ بَرَ هِننّنتٍيَ بٍلٍبٍلٍ رَبَ عِ شَ كٌنيِ ﭑ بَبَ دَوُدَ بّ، بَرِ مَ عَ عَ حّرّ نّ عِ يَ عِ نْندِ رَ، تِنشِنيِ رَ، نُن حَنِفٍ قِيشّ رَ. عِ بَرَ هِننّ عَ رَ، عِ دِ قِ عَ مَ، نَشَن مَفٌرٌشِ عَ شَ كِبَنيِ كُي. نَ نَن عَ نِيَشِ ﭑ بّ تٌ.

⁷يَكْسِ، ﭑ مَرِفِ عَلَتَلَ، عِ تَن نَن ﭑ مَفٌرٌشِ مَنفّ كِبَنيِ كُي ﭑ بَبَ دَوُدَ حْشْي رَ. ﭑ لُشِ عَلْ دِ مّدِ يِ مَنفّيَ كُي.

⁸ﭑ نَ عِ شَ حَمَ سُفَندِشِ تَفِ، نَشَن وُيَ هَن عٍ كْنتِ مُ نْمَ كْنتِدٍ.

⁹شَشِلِمَيَ قِ ﭑ مَ، عَلَكٌ ﭑ شَ نْ حَمَ رَحّرّدٍ عَ قَنيِ رَ، ﭑ شَ نْ قٍ قَنيِ نُن قٍ حَاشِ تَفِ رَ سَدٍ. شَ نَ مُ، ندٍ قَتَ يِ حَمَ رَحّرّدٍ؟»

¹⁰سُلٍمَنِ شَ مَشَندِ نَشَ رَقَن مَرِفِ مَ.

¹¹نَ كُي، عَلَ نَشَ عَ مَسٍن سُلٍمَنِ بّ، «عِ تٌ وَشِ شَشِلِمَيَ نَن شْن يِ حَمَ رَحّرّقٍ رَ، عِ مُ سِمَيَ شْنكُيٍ شَ مَشْرِنشِ، عِ مُ بَننَيَ شَ مَشْرِنشِ، عِ مُ عِ يَشُييٍ قَشَقٍ شَ مَشْرِنشِ،

¹²ﭑ بَرَ عِ شَ مَشَندِ سُشُ. ﭑ شَشِلِمَيَ قَنيِ قِمَ نّ عِ مَ، نَشَن مَنِيّ مُ تٌشِ سِندٍن، عَ مَن مُ تٌمَ تّمُييٍ مَ نَشٍيٍ سَ قَمَ.

¹³ﭑ بَننَيَ نُن بِنيّ قِمَ نّ عِ مَ، نَشٍيٍ مَنِيّ مُ تٌمَ مَنفّ فبّتّيٍ يِ عِ شَ وَشَتِ، هَلِ عِ تٌ مُ عٍ مَشْرِنشِ.

¹⁴شَ عِ بِرَ ﭑ مَ كِرَ قْشْ رَ، عِ ﭑ مَ سّرِيّ نُن ﭑ مَ يَامَرِ رَتِنمّ، عَلْ عِ بَبَ دَوُدَ عَ رَبَ كِ نَشّ، ﭑ عِ شَ سِمَيَ عِكُيَمَ نّ.»

¹⁵نَ تّمُي سُلٍمَنِ نَشَ شُنُ نَ شِيٍ مَ. عَ نَشَ فبِلٍن دَرِ سَلَمُ عَلَتَلَ شَ سَاتّ كَنكِرَ يِرٍ. عَ نَشَ سّرّشّ فَن دَاشِيٍ نُن شَنُنتٍيَ سّرّشّيٍ بَ، عَ قَ نَ دٌن عَ تَن نُن عَ شَ مِشِيٍ بِرِن نَ.

¹⁶لَنفٌي فِنّ قِرِن نَشَ سِفَ مَنفّ يِرٍ كِيتِ قٍنقٍ رَ عَ يِ.

¹⁷نَ فِنّ ندٍ نَشَ عَ قَلَ عَ بّ، عَ نَشّ، «ﭑ مَرِفِ عِ شَ عِ هَاكّ تٌ ﭑ بّ. ﭑ نُن يِ فِنّ، مُشُ بِرِن نَن نَ بَنشِ كٍرٍن كُي. ﭑ نَشَ دِ بَرِ عَ يَ شْرِ.

¹⁸شِ سَشَن تٌ دَنفِ، عَ قَن نَشَ دِ بَرِ. مُشُ دٌرٌ نَن تُن نُ عَ رَ، مِشِ فبّتّ يٌ مُ نُ نَ بَنشِ كُي قٌ مُشُ قِرِن ثٍتِ.

¹⁹كْي ندٍ كُي، يِ فِنّ نَشَ عَ سَ عَ شَ دِ قَرِ، عَ شَ دِ نَشَ قَشَ.

²⁰عَ تٌ نَ تٌ، عَ نَشَ ﭑ مَ دِ تٌنفٌ ﭑ سّيتِ مَ، عَ قَ عَ شَ دِ قَشَشِ سَ ﭑ تَن قّ مَ. ﭑ نُ شِقٍ، ﭑ مُ نُ نَ سٍسٍ كٌلٌن.

²¹فّيسّفّ ﭑ تٌ كٍلِ ﭑ شَ شِحّ قِ ﭑ مَ دِ مَ، ﭑ نَشَ عَ تٌ نَ دِ بَرَ قَشَ. كْنْ ﭑ تٌ عَ عِفبّ قَ عَ قَنيِ رَ، ﭑ نَشَ عَ تٌ ﭑ مَ دِ مُ عَ رَ، ﭑ نَشَن بَرِشِ.»

²²بٌورٍ فِنّ نَشَ وْيّنيِ تٌنفٌ، عَ عَ قَلَ، «عَ مُ نَ نَ كِ شّ. ﭑ مَ دِ نَن بَلٌشِ، عِ تَن نَن شَ دِ قَشَشِ.» فِنّ سِنفٍ نَشَ بٌورٍ مَتَندِ عَ قَلَقٍ رَ، «عِ وُلٍ! ﭑ مَ دِ شَ مُ قَشَشِ، ﭑ فبٍ نَن بَلٌشِ.» عٍ نُ وْيّنمَ نَ كِ نّ مَنفّ يَ شْرِ.