رْ مَ 1:3-32

³يِ شِبَارُ قَنيِ قِندِشِ عَ شَ دِ نَن شَ قٍ رَ، نَشَن بَرِ دَوُدَ بْنسْي كُي عَ عَدَ مَ كِ مَ.

⁴شَشِلِ سّنِيّنشِ قَن بَرَ عَ مَسٍن سّنبّ رَ عَ عَلَ شَ دِ نَ عَ رَ. عَ نَ مَسٍن عَ شَ مَرَكٍلِ نَن سَابُي رَ قَشّ مَ. وٌن مَرِفِ نَن نَ عِسَ رَ، عَلَ شَ مِشِ سُفَندِشِ.

⁵عَ تَن نَن سَابُي عَ نِيَشِ عَلَ هِننّشِ مُشُ رَ مُشُ شَ قِندِ شّيرَيٍ رَ عَ شِلِ شَ قٍ رَ، عَلَكٌ سِ بِرِن شَ دَنشَنِيَ عَ مَ، عٍ شَ بِرَ عَ قْشْ رَ.

⁶وٌ قَن نَ نَ يَ مَ، عَلَ شَ مِشِ سُفَندِشِ عِسَ وٌ تَن نَشٍيٍ شِلِشِ.

⁷ﭑ يِ سّبّقٍ وٌ تَن رْ مَكَيٍ نَن مَ عَلَ نَشٍيٍ شَنُشِ، عَ نَشٍيٍ شِلِشِ وٌ شَ قِندِ عَ شَ سّنِيّنتْييٍ رَ. وٌن بَبَ عَلَ نُن عَ شَ مِشِ سُفَندِشِ مَرِفِ عِسَ شَ هِننّ نُن بْحّسَ قِ وٌ مَ.

⁸عَ قْلّ رَ، ﭑ نَن ﭑ مَرِفِ عَلَ تَنتُمَ نّ وٌ بِرِن شَ قٍ رَ عَ شَ مِشِ سُفَندِشِ عِسَ سَابُي رَ، بَرِ مَ وٌ شَ دَنشَنِيَ شِلِ بَرَ دِن دُنِحَ بِرِن نَ.

⁹ﭑ مَرِفِ عَلَ، ﭑ نَشَن بَتُمَ ﭑ نِي بِرِن نَ ﭑ تٌ عَ شَ دِ شَ شِبَارُ قَنيِ رَيٍنسٍنمَ، عَ تَن عَ كٌلٌن عَ ﭑ نَ نْندِ نَن قَلَقٍ وٌ بّ. عَ تَن نَن ﭑ سٍيدٍ رَ، قَ عَ قَلَ، ﭑ عَ مَشَندِ مَ وٌ بّ تّمُي بِرِن.

¹⁰ﭑ مَن عَلَ مَشَندِ مَ، شَ عَ سَفٌ نَ عَ رَ، عَ شَ عَ نِيَ ﭑ شَ نْ سِفَدٍ وٌ شْنيِ قَ.

¹¹بَرِ مَ وٌ تٌ شْلِ نَ ﭑ مَ كِ قَنيِ، عَلَكٌ ﭑ شَ نْ وٌ سّنبّ سٌدٍ عَلَ شَ كِ ندٍيٍ رَ.

¹²عَ شْلِ ﭑ مَ وٌن شَ وٌن بٌرٍ رَلِمَنِيَ وٌن مَ دَنشَنِيَ سَابُي رَ، وٌن بِرِن شَ سّنبّ سْتْ وٌن بٌرٍ رَ.

¹³ﭑ نفَشَكٍرٍنيِيٍ، ﭑ وَ مَ وٌ شَ عَ كٌلٌن عَ سَنمَيَ وُيَشِ نَن يِ كِ ﭑ بَرَ نَتّ تٌنفٌ ﭑ شَ سِفَ وٌ شْنيِ ﭑ شَ سَ ﭑ مَ وَلِ تِدٍ ندٍ تٌ وٌ تَفِ عَلْ ﭑ عَ تٌشِ كِ نَشّ حَمَنّ فبّتّيٍ تَفِ، كْنْ هَن تٌ عَ مُ سْونّيَ ﭑ بّ.

¹⁴قٌ ﭑ شَ وْيّن مِشِ بِرِن بّ، تَا عِدْشْييٍ نُن دَاشَ عِدْشْييٍ، شَرَن مِشِيٍ نُن شَرَنتَرٍيٍ.

¹⁵نَ نَ عَ رَ عَ شْلِ ﭑ مَ كِ قَنيِ ﭑ شَ شِبَارُ قَنيِ كَوَندِ وٌ تَن رْ مَكَيٍ قَن بّ.

¹⁶ﭑ مُ يَافِمَ مَرِفِ شَ شِبَارُ قَنيِ مَسٍندٍ مِشِ يٌ بّ، بَرِ مَ عَ تَن نَن سَابُي عَ نِيَمَ عَلَ دَنشَنِيَتْي بِرِن نَكِسِمَ. يِ كِسِ قِشِ يُوِقِيٍ نَن سِنفٍ مَ، عَ قَ قِ سِ فبّتّيٍ قَن مَ.

¹⁷يِ شِبَارُ قَنيِ بَرَ عَ مَكّنّن عَ تِنشِنيِ نَشَن كٍلِمَ عَلَ مَ عَ سْتْمَ دَنشَنِيَ نَن تُن سَابُي رَ، عَلْ عَ سّبّشِ كِتَابُي كُي كِ نَشّ؛ «مِشِ تِنشِنشِ كِسِمَ دَنشَنِيَ نَن سَابُي رَ.»

¹⁸عَلَ شَ شْنّ فٌرٌ مَ كٍلِ كٌورٍ تِنشِنتَرٍيٍ نُن كَاقِرِيٍ شِلِ مَ. يِ مِشِيٍ نْندِ نْشُنمَ عٍ شَ تِنشِنتَرٍيَ سَابُي رَ.

¹⁹عَنُن مِشِ نْمَ نَشَن كٌلٌندٍ عَلَ شَ قٍ كُي، عَ قِيشّشِ عٍ بّ قْين، بَرِ مَ عَلَ بَرَ عَ مَكّنّن عٍ بّ.

²⁰كَبِ دُنِحَ دَا تّمُي، عَلَ نَشَن مُ تٌمَ، عَ نَشَ عَ يّتّ مَسٍن. عَدَ مَدِ بِرِن نْمَ عَ كٌلٌندٍ عَ عَلَ نَ نَ يَتِ، نَشَن سّنبّ مُ دَنمَ، بَرِ مَ يِ بَرَ مَكّنّن عٍ بّ عَ قِيشّ رَ عَ شَ وَلِ قْشِ سَابُي رَ. نَ كُي، تِنشِنتَرٍيٍ مُ نْمَ سٍسٍ قَلَدٍ نَشَن كِيتِ قَنمَ عٍ بّ،

²¹بَرِ مَ هَلِ عٍ تٌ عَلَ كٌلٌنشِ، عٍ بَرَ تٌندِ عَ تَنتُدٍ، عٍ تٌندِ عَ بِنيَدٍ عَ شَ مَنفّيَ كُي. عٍ شَشِلِ بَرَ بِرَ قٍ قُقَقُ قْشْ رَ، عٍ بْحّ بَرَ لُ دِ مِ كُي.

²²عٍ عٍ يّتّ مَتْشْمَ عٍ شَ شَشِلِمَيَ رَ، كْنْ عٍ بَرَ قِندِ دَشُييٍ رَ.

²³عٍ بَرَ تٌندِ عَلَ بَتُدٍ نَشَن نَ نَ عَبَدَن، عٍ كُيٍ مَسٌلِشِيٍ بَتُ نَشٍيٍ مِسَالِشِ عَدَ مَدِ رَ نَشَن قَشَمَ، عَ نُن نَشٍيٍ مِسَالِشِ شْنِ، سُبٍ، نُن بُبُسٍ رَ.

²⁴نَ نَن عَ نِيَ عَلَ نَشَ عٍ رَبٌلٌ عٍ شَ يُنُبِ قٍيٍ كُي، عٍ بْحّ كّنّنيِ مَ. نَ كُي، عٍ نَشَ قٍ مَيَافِشِيٍ رَبَ عٍ بٌرٍ رَ.

²⁵عٍ نَشَ عَلَ شَ نْندِ مَسَرَ وُلٍ رَ، عٍ مَن قَ دَالِ بَتُ، بٍينُن عٍ شَ دَالِ مَنفّ نَن بَتُ، عَ تَن نَشَن لَن عَ شَ بَتُ عَبَدَن. عَمِنَ.

²⁶نَ نَ عَ رَ عَلَ نَشَ عٍ رَبٌلٌ عٍ شَ بِرَ عٍ وَشْنقٍ مَيَافِشِيٍ قْشْ رَ. عٍ شَ فِنّيٍ نَشَ عٍ نُن شّمّ شَ كَقُحْشْيَ مَسَرَ فِنّ قِرِن شَ كَقُحْشْيَ رَ.

²⁷شّمّيٍ قَن نَشَ مّي فِنّيٍ شَ كَقُحْشْيَ رَ، عٍ قَ بِرَ عٍ بٌورٍ شّمّيٍ كَقُحْشْيَ قْشْ رَ. عٍ نَشَ قٍ مَيَافِشِيٍ رَبَ عٍ بٌرٍ رَ، عٍ عٍ شَ وَلِ كٌبِ سَرٍ سْتْ نَشَن دَشَ.

²⁸عٍ تٌ تٌندِ عَلَ كٌلٌندٍ عَلَ رَ، عَ نَشَ عٍ رَبٌلٌ عٍ يّتّ كَن شَشِلِ كٌبِيٍ يِ، عٍ نُ قٍيٍ رَبَ نَشٍيٍ مُ رَدَشَ.

²⁹عٍ بْحّ رَقٍشِ تِنشِنتَرٍيَ مْولِ بِرِن نَ؛ وَلِ كٌبِ رَبَقٍ، وَ سَتَرٍيَ، حَاشُحَ. مِلَنتٍيَ، مِشِ قَشَقٍ، مِشِ تَفِ عِسٌقٍ، مِشِ مَيٍندٍنقٍ، نُن يَ عِشَرٍيَ مُ حْنمَ عٍ تَفِ.

³⁰نَاقِشِيٍ، مِشِ مَقَلّيٍ، عَلَ يَشُييٍ، كٌنبِتِيٍ، يّتّ عِفبٌييٍ نُن دّ عِفبٌييٍ نَن عٍ رَ. عٍ قٍ كٌبِيٍ شَبُمَ نَشٍيٍ سِنفٍ مُ نُ كٌلٌن، عٍ حَن مُ عٍ بَرِ مِشِيٍ دَنشُنمَ.

³¹شَشِلِتَرٍ، دُفُتّفّ يَنقّ، كِنِكِنِتَرٍ، نُن هِننّتَرٍ نَن نَ عٍ رَ.

³²عَلَ شَ سّرِيّ عَ مَسٍنشِ نّ، عَ نَشٍيٍ نَ قٍيٍ رَبَمَ، قَشّ نَن دَشَشِ عٍ بّ. هَلِ عٍ تٌ نَ كٌلٌن، عٍ نَ قٍ هَرَ مُشِيٍ نَن يَتِ رَبَمَ، عٍ مَن مِشِ رَلِمَنِيَمَ نَشٍيٍ قَن نَ قٍ مْولِ رَبَمَ.