Taruxui 9:17-39 in Susu

¹⁷ Ananiyasi naxa siga na banxi. A to so, a naxa a bɛlɛxɛ sa Sɔlu ma. A naxa a fala a bɛ, «N ngaxakerenyi Sɔlu, Marigi Isa naxan mini i ma kira ra, a tan nan n xɛɛxi i ma, alako i xa se to, i man xa Ala Xaxili Sɛniyɛnxi sɔtɔ.»

¹⁸ Se nde naxa ba a ya ma keren na alɔ xalee, a ya naxa se to. A naxa keli, a fa a xunxa ye xɔɔra.

¹⁹ Na xanbi a naxa a dɛge, a fa sɛnbɛ sɔtɔ. Sɔlu naxa saxanyi raba Damasi a nun Isa fɔxirabirɛe.

²⁰ A naxa bɔnbɔ kawandi tife ra keren na salidee kui a nu a masen a Ala xa Di nan lanxi Isa ma.

²¹ Naxee birin a xui mɛ, e dɛ naxa ixara. E naxa a fala, «Yi xɛmɛ xa mu nu mixie ɲaxankatama Darisalamu, naxee nu maxandi tima Isa xili ra? A mu faxi xɛ be, a xa e xanin e xirixi ra sɛrɛxɛdubɛ kuntigie xɔn?»

²² Sɔlu naxa sɛnbɛ sɔtɔ. A xa masenyi naxa Damasi Yuwifie ifu, a falafe a Isa nan lanxi Ala xa Mixi Sugandixi ma.

²³ Tɛmui nde to dangi, Yuwifie naxa lan a ma e xa Sɔlu faxa.

²⁴ Sɔlu naxa e xa gundo kolon. E nu taa sode dɛ kantama kɔɛ nun yanyi alako e xa a faxa.

²⁵ Kɔnɔ kɔɛ nde ra, Isa fɔxirabirɛe naxa a ragoro tɛtɛ fari ma saga kui.

²⁶ Sɔlu to siga Darisalamu, a naxa wa bonife Isa fɔxirabirɛe ra, kɔnɔ e birin nu gaaxuxi a ya ra. E mu nu laxi a ra xa Isa fɔxirabirɛ nan yati a ra.

²⁷ Awa, Baranabasi naxa a xanin xɛɛrae xɔn. A naxa a tagi raba e bɛ Sɔlu Marigi toxi ki naxɛ, a man a xui mɛxi kira ra ki naxɛ. A naxa a masen e bɛ Sɔlu bara kawandi naxan naba Isa xili ra Damasi taa kui.

²⁸ E birin naxa dɔxɔ yire keren Darisalamu. Sɔlu nu Marigi xili kawandima sɛnbɛ ra.

²⁹ E nun Yuwifie fan naxa wɔyɛn e nu xɔrɔxɔ, Yuwifi naxee Girɛki xui falama, kɔnɔ nee nu katafe e xa Sɔlu faxa.

³⁰ A ngaxakerenyi Isayankae to na fe mɛ, e naxa a xanin Sesare, e fa a rasiga Tarise.

³¹ Danxaniyatɔɛ ɲama naxa lu bɔɲɛsa kui Yudaya, Galile, nun Samari bɔxi birin ma. E nu luma e bore ralimaniya ra, e nu e ɲɛrɛ Marigi xa yaragaaxui kui. E xun nu masama Ala Xaxili Sɛniyɛnxi saabui ra.

³² Piyɛri to nu bɔxi iɲɛrɛma, a naxa goro sɛniyɛntɔɛe yire Lida.

³³ A naxa xɛmɛ namataxi nde li naa, naxan xili Ene, a nu saxi sade ma kabi ɲɛ solomasaxan.

³⁴ Piyɛri naxa a fala a bɛ, «Ene, Isa Ala xa Mixi Sugandixi bara i rayalan. Keli, i i xa sade yailan.» A naxa keli keren na.

³⁵ Lidakae nun Sarɔnka birin to yi fe to, e naxa tuubi Marigi ma.

³⁶ Ginɛ nde nu na Yafa Isa fɔxirabirɛe ya ma. A nu xili Tabita, naxan falaxi Dɔrakasi. A nu fe fanyi gbegbe rabama, a nu tɔɔrɔmixie ki.

³⁷ Na tɛmui, fure naxa a suxu, a naxa faxa. E to a maxa, e naxa a sa koore banxi dɛki firin nde.

³⁸ Isa fɔxirabirɛe naxee nu na Yafa, e naxa a mɛ a Piyɛri na Lida. Lida mu makuya Yafa ra. Awa, e naxa xɛmɛ firin xɛɛ Piyɛri ma, e xa a mayandi a xa fa e xɔnyi mafuren.

³⁹ Piyɛri naxa keli, e nun na xɛmɛe naxa siga. E to so, e naxa a xanin koore banxi kɔn na. Kaaɲɛ ginɛe naxa a rabilin, e wama. E naxa dugie nun sosee masen a bɛ Dɔrakasi naxee yailan a nu na e ya ma tɛmui naxɛ.

¹⁷ عَنَنِيَسِ نَشَ سِفَ نَ بَنشِ. عَ تٌ سٌ، عَ نَشَ عَ بّلّشّ سَ سْلُ مَ. عَ نَشَ عَ قَلَ عَ بّ، «ﭑ نفَشَكٍرٍنيِ سْلُ، مَرِفِ عِسَ نَشَن مِنِ عِ مَ كِرَ رَ، عَ تَن نَن ﭑ شّيشِ عِ مَ، عَلَكٌ عِ شَ سٍ تٌ، عِ مَن شَ عَلَ شَشِلِ سّنِيّنشِ سْتْ.»

¹⁸ سٍ ندٍ نَشَ بَ عَ يَ مَ كٍرٍن نَ عَلْ شَلٍيٍ، عَ يَ نَشَ سٍ تٌ. عَ نَشَ كٍلِ، عَ قَ عَ شُنشَ يٍ شْورَ.

¹⁹ نَ شَنبِ عَ نَشَ عَ دّفٍ، عَ قَ سّنبّ سْتْ. سْلُ نَشَ سَشَنيِ رَبَ دَ مَسِ عَ نُن عِسَ قْشِرَبِرّيٍ.

²⁰ عَ نَشَ بْنبْ كَوَندِ تِقٍ رَ كٍرٍن نَ سَلِدٍيٍ كُي عَ نُ عَ مَسٍن عَ عَلَ شَ دِ نَن لَنشِ عِسَ مَ.

²¹ نَشٍيٍ بِرِن عَ شُي مّ، عٍ دّ نَشَ عِشَرَ. عٍ نَشَ عَ قَلَ، «يِ شّمّ شَ مُ نُ مِشِيٍ حَشَنكَتَمَ دَرِ سَلَمُ، نَشٍيٍ نُ مَشَندِ تِمَ عِسَ شِلِ رَ؟ عَ مُ قَشِ شّ بٍ، عَ شَ عٍ شَنِن عٍ شِرِشِ رَ سّرّشّدُبّ كُنتِفِيٍ شْن؟»

²² سْلُ نَشَ سّنبّ سْتْ. عَ شَ مَسٍنيِ نَشَ دَ مَسِ يُوِقِيٍ عِقُ، عَ قَلَقٍ عَ عِسَ نَن لَنشِ عَلَ شَ مِشِ سُفَندِشِ مَ.

²³ تّمُي ندٍ تٌ دَنفِ، يُوِقِيٍ نَشَ لَن عَ مَ عٍ شَ سْلُ قَشَ.

²⁴ سْلُ نَشَ عٍ شَ فُندٌ كٌلٌن. عٍ نُ تَا سٌدٍ دّ كَنتَمَ كْي نُن يَنيِ عَلَكٌ عٍ شَ عَ قَشَ.

²⁵ كْنْ كْي ندٍ رَ، عِسَ قْشِرَبِرّيٍ نَشَ عَ رَفٌرٌ تّتّ قَرِ مَ سَفَ كُي.

²⁶ سْلُ تٌ سِفَ دَرِ سَلَمُ، عَ نَشَ وَ بٌنِقٍ عِسَ قْشِرَبِرّيٍ رَ، كْنْ عٍ بِرِن نُ فَاشُشِ عَ يَ رَ. عٍ مُ نُ لَشِ عَ رَ شَ عِسَ قْشِرَبِرّ نَن يَتِ عَ رَ.

²⁷ عَوَ، بَرَنَبَسِ نَشَ عَ شَنِن شّيرَيٍ شْن. عَ نَشَ عَ تَفِ رَبَ عٍ بّ سْلُ مَرِفِ تٌشِ كِ نَشّ، عَ مَن عَ شُي مّشِ كِرَ رَ كِ نَشّ. عَ نَشَ عَ مَسٍن عٍ بّ سْلُ بَرَ كَوَندِ نَشَن نَبَ عِسَ شِلِ رَ دَ مَسِ تَا كُي.

²⁸ عٍ بِرِن نَشَ دْشْ يِرٍ كٍرٍن دَرِ سَلَمُ. سْلُ نُ مَرِفِ شِلِ كَوَندِ مَ سّنبّ رَ.

²⁹ عٍ نُن يُوِقِيٍ قَن نَشَ وْيّن عٍ نُ شْرْشْ، يُوِقِ نَشٍيٍ فِرّكِ شُي قَلَمَ، كْنْ نٍيٍ نُ كَتَقٍ عٍ شَ سْلُ قَشَ.

³⁰ عَ نفَشَكٍرٍنيِ عِسَيَنكَيٍ تٌ نَ قٍ مّ، عٍ نَشَ عَ شَنِن سٍسَرٍ، عٍ قَ عَ رَ سِفَ تَرِ سٍ.

³¹ دَنشَنِيَتْي حَمَ نَشَ لُ بْحّسَ كُي يُدَيَ، فَلِلٍ، نُن سَمَرِ بْشِ بِرِن مَ. عٍ نُ لُمَ عٍ بٌرٍ رَلِمَنِيَ رَ، عٍ نُ عٍ حّرّ مَرِفِ شَ يَرَفَاشُي كُي. عٍ شُن نُ مَسَمَ عَلَ شَشِلِ سّنِيّنشِ سَابُي رَ.

³² ثِيّرِ تٌ نُ بْشِ عِحّرّ مَ، عَ نَشَ فٌرٌ سّنِيّنتْييٍ يِرٍ لِدَ.

³³ عَ نَشَ شّمّ نَمَتَشِ ندٍ لِ نَا، نَشَن شِلِ عٍنٍ، عَ نُ سَشِ سَدٍ مَ كَبِ حّ سٌلٌمَسَشَن.

³⁴ ثِيّرِ نَشَ عَ قَلَ عَ بّ، «عٍنٍ، عِسَ عَلَ شَ مِشِ سُفَندِشِ بَرَ عِ رَيَلَن. كٍلِ، عِ عِ شَ سَدٍ يَءِلَن.» عَ نَشَ كٍلِ كٍرٍن نَ.

³⁵ لِدَكَيٍ نُن سَرْنكَ بِرِن تٌ يِ قٍ تٌ، عٍ نَشَ تُوبِ مَرِفِ مَ.

³⁶ فِنّ ندٍ نُ نَ يَقَ عِسَ قْشِرَبِرّيٍ يَ مَ. عَ نُ شِلِ تَبِتَ، نَشَن قَلَشِ دْرَكَسِ. عَ نُ قٍ قَنيِ فبٍفبٍ رَبَمَ، عَ نُ تْورْ مِشِيٍ كِ.

³⁷ نَ تّمُي، قُرٍ نَشَ عَ سُشُ، عَ نَشَ قَشَ. عٍ تٌ عَ مَشَ، عٍ نَشَ عَ سَ كٌورٍ بَنشِ دّكِ قِرِن ندٍ.

³⁸ عِسَ قْشِرَبِرّيٍ نَشٍيٍ نُ نَ يَقَ، عٍ نَشَ عَ مّ عَ ثِيّرِ نَ لِدَ. لِدَ مُ مَكُيَ يَقَ رَ. عَوَ، عٍ نَشَ شّمّ قِرِن شّي ثِيّرِ مَ، عٍ شَ عَ مَيَندِ عَ شَ قَ عٍ شْنيِ مَقُرٍن.

³⁹ ثِيّرِ نَشَ كٍلِ، عٍ نُن نَ شّمّيٍ نَشَ سِفَ. عٍ تٌ سٌ، عٍ نَشَ عَ شَنِن كٌورٍ بَنشِ كْن نَ. كَاحّ فِنّيٍ نَشَ عَ رَبِلِن، عٍ وَ مَ. عٍ نَشَ دُفِيٍ نُن سٌسٍيٍ مَسٍن عَ بّ دْرَكَسِ نَشٍيٍ يَءِلَن عَ نُ نَ عٍ يَ مَ تّمُي نَشّ.