تَرُشُي 17:9-19

⁹بٍينُن عٍ شَ يَسٌن نُن عَ بٌورٍيٍ بّحِن، قٌ عٍ تٌ كْبِرِ بَ.

¹⁰نَ كْي رَ، عٍ نفَشَكٍرٍنيِيٍ نَشَ ثْلُ نُن سِلَسِ رَ سِفَ بٍيرٍ تَا. عٍ تٌ سٌ نَا، عٍ نَشَ سٌ يُوِقِيٍ شَ سَلِدٍ كُي.

¹¹نَ يُوِقِيٍ شَشِلِ نُ مَتِنسٍ دَنفِ تّسَلٌنِكِكَيٍ رَ. عٍ حَن فبَتَ نّ نَ مَسٍنيِ كٌلٌندٍ، عٍ مَن كِتَابُي كُي مَتٌ لْشْ يٌ لْشْ عَلَكٌ عٍ شَ عَ كٌلٌن عٍ نَشَن قَلَمَ عٍ بّ شَ نْندِ يَتِ نَن عَ رَ.

¹²يُوِقِ وُيَشِ نَشَ دَنشَنِيَ عٍ يَ مَ، نُن فِرّكِكَ فِنّ فٌرٌبٌنّ وُيَشِ، نُن شّمّ وُيَشِ.

¹³كْنْ يُوِقِيٍ تّسَلٌنِكِكَيٍ تٌ عَ كٌلٌن عَ ثْلُ نَ عَلَ شَ وْيّنيِ كَوَندِقٍ بٍيرٍ تَا قَن، عٍ نَشَ قَ نَا، عٍ قَ حَمَ يَ عِسٌ.

¹⁴عَوَ، دَنشَنِيَتْييٍ نَشَ ثْلُ تٌنفٌ كٍرٍن نَ، عٍ نَشَ سِفَ عَ رَ بَا قّ مَ، كْنْ سِلَسِ نُن تِمٌتٍ نَشَ لُ بٍيرٍ تَا.

¹⁵نَشٍيٍ ثْلُ مَتِ، عٍ نَشَ سِفَ عَ رَ هَن عَتّن. نَ شَنبِ عٍ نَشَ فبِلٍن عٍ حُنفُي رَ سِلَسِ نُن تِمٌتٍ شْن مَ، عٍ شَ ثْلُ لِ سِننَنيِ مَ عَتّن.

¹⁶ثْلُ نُ سِلَسِ نُن تِمٌتٍ مَمّقٍ عَتّن. عَ بْحّ نَشَ مَحَاشُ عَ رَ نَ تَا شَ كُيٍيٍ شَ قٍ رَ.

¹⁷نَ كُي، عَ نَشَ دّ مَسَرَ عٍ نُن يُوِقِيٍ رَ، عَ نُن مِشِيٍ نَشٍيٍ فَاشُشِ عَلَ يَ رَ سَلِدٍ كُي. عَ مَن نَشَ وْيّن مِشِيٍ رَ عَ نَرَلَنمَ نَشٍيٍ رَ مَلَن يِرٍ تَا كُي لْشْ يٌ لْشْ.

¹⁸عٍثِكُرِ نُن سِتٌيِسِ كَرَ مْشْيٍ نَشَ سٌ وْيّنقٍ ثْلُ رَ، عٍ نُ عَ قَلَ، «يِ وْيّنلَ مُنسٍ قَلَقٍ؟» ندٍيٍ تٌ ثْلُ شُي مّ عَ عِسَ شَ شِبَارُ مَسٍنمَ، عَ مَن نُ قَ مَرَكٍلِ قٍيٍ قَلَقٍ، عٍ نَشّ، «عَ لُشِ نّ عَلْ عَ عَلَ فبّتّيٍ نَن مَ قٍيٍ قَلَمَ.»

¹⁹عَوَ، عٍ نَشَ عَ تٌنفٌ، عٍ نَشَ سِفَ عَ رَ عَرٍيٌثَفٌ مَلَن يِرٍ، عٍ نَشَ عَ مَشْرِن، «يِ لْننِ نّينّ عِ نَشَن مَسٍنمَ، مُشُ نْمَ عَ كٌلٌندٍ دِ؟