22בהתהלכך תנחה אתך בשכבך תשמר עליך והקיצות היא תשיחך׃
23כי נר מצוה ותורה אור ודרך חיים תוכחות מוסר׃
24לשמרך מאשת רע מחלקת לשון נכריה׃
25אל תחמד יפיה בלבבך ואל תקחך בעפעפיה׃
26כי בעד אשה זונה עד ככר לחם ואשת איש נפש יקרה תצוד׃
27היחתה איש אש בחיקו ובגדיו לא תשרפנה׃
28אם יהלך איש על הגחלים ורגליו לא תכוינה׃
29כן הבא אל אשת רעהו לא ינקה כל הנגע בה׃
30לא יבוזו לגנב כי יגנוב למלא נפשו כי ירעב׃
31ונמצא ישלם שבעתים את כל הון ביתו יתן׃
מִשְׁלֵי 6
מִשְׁלֵי 6:22-31