36וראהו הכהן והנה פשה הנתק בעור לא יבקר הכהן לשער הצהב טמא הוא׃
37ואם בעיניו עמד הנתק ושער שחר צמח בו נרפא הנתק טהור הוא וטהרו הכהן׃
38ואיש או אשה כי יהיה בעור בשרם בהרת בהרת לבנת׃
39וראה הכהן והנה בעור בשרם בהרת כהות לבנת בהק הוא פרח בעור טהור הוא׃
40ואיש כי ימרט ראשו קרח הוא טהור הוא׃
41ואם מפאת פניו ימרט ראשו גבח הוא טהור הוא׃
42וכי יהיה בקרחת או בגבחת נגע לבן אדמדם צרעת פרחת הוא בקרחתו או בגבחתו׃
43וראה אתו הכהן והנה שאת הנגע לבנה אדמדמת בקרחתו או בגבחתו כמראה צרעת עור בשר׃
וַיִּקְרָא 13
וַיִּקְרָא 13:36-43