Zebur 119:80-175

⁸⁰Könglüm belgilimiliringde mukemmel bolsun; Shuning bilen yerge qarap qalmaymen.

⁸¹|כ| (Kaf) Jénim nijatliqinggha telmürüp halidin kétey dewatidu; Men söz-kalaminggha ümid baghlidim.

⁸²Közüm söz-wedengge telmürüp tügishey dédi, «Sen qachanmu manga teselli bérersen» — dep.

⁸³Chünki men islinip qurup ketken tulumdek boldum, Biraq belgilimiliringni untumaymen.

⁸⁴Qulungning künliri qanche bolidu? Manga ziyankeshlik qilghanlarni qachan jazalaysen?

⁸⁵Tekebburlar manga orilarni kolighan; Bu ishlar Tewratinggha muxaliptur;

⁸⁶Séning barliq emrliring ishenchliktur; Ular yolsizliq bilen méni qistimaqta; Manga yardem qilghaysen!

⁸⁷Ular méni yer yüzidin yoqatqili qil qaldi; Biraq men bolsam, körsetmiliringdin waz kechmidim.

⁸⁸Özgermes muhebbiting boyiche méni janlandurghaysen, We aghzingdiki agah-guwahliqliringni tutimen.

⁸⁹|ל| (Lamed) Menggüge, i Perwerdigar, Söz-kalaming ershlerde békitilgendur.

⁹⁰Séning sadaqiting dewrdin-dewrgichidur; Sen yer-zéminni muqim békitkensen, u mewjut bolup turidu.

⁹¹Séning höküm-qanuniyetliring bilen bular bügünki kündimu turidu; Chünki barliq mewjudatlar Séning xizmitingdidur.

⁹²Séning Tewrat-qanunung xursenlikim bolmighan bolsa, Azabimda yoqap kéter idim.

⁹³Men Séning körsetmiliringni hergiz untumaymen; Chünki mushular arqiliq manga hayatliq berding;

⁹⁴Men Séningkidurmen, méni qutquzghaysen; Chünki men körsetmiliringni izdep keldim.

⁹⁵Reziller méni halak qilishni kütmekte; Biraq men agah-guwahliringni könglümde tutup oylaymen.

⁹⁶Men hemme mukemmellikning chéki bar dep bilip yettim; Biraq Séning emr-kalaming cheksiz kengdur!

⁹⁷|מ| (Mem) Ah, méning Tewrat-qanununggha bolghan muhebbitim neqeder chongqurdur! Kün boyi u méning séghinip oylaydighinimdur.

⁹⁸Emrliring herdaim men bilen bille turghachqa, Méni düshmenlirimdin dana qilidu;

⁹⁹Barliq ustazlirimdin köp yorutulghanmen, Chünki agah-guwahliring séghinishimdur.

¹⁰⁰Men qérilardin köprek chüshinimen, Chünki körsetmiliringge itaet qilip keldim.

¹⁰¹Söz-kalaminggha emel qilishim üchün, Ayaghlirimni hemme yaman yoldin tarttim.

¹⁰²Hökümliringdin héch chiqmidim; Chünki manga ögetken Sen özüngdursen.

¹⁰³Sözliring tilimgha shunche shérin tétiydu! Aghzimda heseldin tatliqtur!

¹⁰⁴Körsetmiliringdin men yorutuldum; Shunga barliq saxta yolni öch körimen.

¹⁰⁵|נ| (Nun) Söz-kalaming ayighim aldidiki chiragh, Yolumgha nurdur.

¹⁰⁶Qesem ichtim, emel qilimenki, Men heqqaniy hökümliringni tutimen.

¹⁰⁷Zor azab-oqubetlerni chektim, i Perwerdigar; Söz-kalaming boyiche méni janlandurghaysen.

¹⁰⁸Qobul qilghaysen, i Perwerdigar, aghzimdiki xalis qurbanliqlarni, Manga hökümliringni ögetkeysen.

¹⁰⁹Jénimni aliqinimda daim élip yürimen, Biraq Tewrat-qanunungni peqet untumaymen.

¹¹⁰Reziller men üchün qiltaq qurdi; Biraq körsetmiliringdin adashmidim.

¹¹¹Agah-guwahliqliringni miras qilip menggüge qobul qildim; Chünki ular könglümning shadliqidur.

¹¹²Men könglümni belgilimiliringge menggüge emel qilishqa, Yeni axirghiche emel qilishqa mayil qildim.

¹¹³|ס| (Sameq) Ala köngüllerni öch körüp keldim; Söyginim bolsa, Tewrat-qanunungdur.

¹¹⁴Sen méning dalda jayim, méning qalqanimdursen; Söz-kalaminggha ümid baghlidim.

¹¹⁵Men Xudayimning emrlirige emel qilishim üchün, Mendin néri bolunglar, i rezillik qilghuchilar!

¹¹⁶Yashishim üchün, Wedeng boyiche méni yöligeysen; Ümidimning aldida méni yerge qaratmighaysen.

¹¹⁷Méni qollap quwwetligeysen, shunda men aman-ésen yürimen; We belgilimiliringni herdaim qedirleymen.

¹¹⁸Belgilimiliringdin azghanlarning hemmisini neziringdin saqit qilding; Chünki ularning aldamchiliqi quruqtur.

¹¹⁹Sen yer yüzidiki barliq rezillerni dashqaldek shallap tazilaysen; Shunga men agah-guwahliqliringni söyimen.

¹²⁰Etlirim Séningdin bolghan eyminishtin titreydu; Hökümliringdin qorqup yürimen.

¹²¹|ע| (Ayin) Men durus hökümlerni we adaletni yürgüzdum; Méni ezgüchilerge tashlap qoymighaysen;

¹²²Öz qulung üchün yaxshiliqqa kapalet bolghaysen; Tekebburlargha méni ezgüzmigeysen.

¹²³Közüm nijatliqinggha teshna bolup, Hem heqqaniyiting toghruluq wedengge telmürüp tügishey dep qaldi;

¹²⁴Özgermes muhebbiting bilen qulunggha muamile qilghaysen; Belgilimiliringni manga ögetkeysen.

¹²⁵Men Séning qulungdurmen; Agah-guwahliqliringni bilip yétishim üchün méni yorutqaysen.

¹²⁶Perwerdigar heriketke kélish waqti keldi! Chünki ular Tewrat-qanunungni bikar qiliwétidu.

¹²⁷Shu sewebtin emrliringni altundin artuq söyimen, Sap altundin artuq söyimen;

¹²⁸Shunga hemme ishlarni bashquridighan barliq körsetmiliringni toghra dep bilimen; Barliq saxta yolni öch körimen.

¹²⁹|פ| (Pé) Agah-guwahliqliring karamettur; Shunga jénim ulargha egishidu.

¹³⁰Sözliringning yéshimi nur élip kélidu; Nadanlarnimu yorutidu.

¹³¹Aghzimni échip hasirap kettim, Chünki emrliringge teshna bolup keldim.

¹³²Namingni söygenlerge bolghan aditing boyiche, Jamalingni men terepke qaritip shepqet körsetkeysen.

¹³³Qedemlirimni sözüng bilen toghrilighaysen; Üstümge héch qebihlikni höküm sürgüzmigeysen.

¹³⁴Méni insanning zulumidin qutuldurghaysen, Shuning bilen Séning körsetmiliringge itaet qilimen.

¹³⁵Jamalingning nurini qulungning üstige chachturghaysen; Manga belgilimiliringni ögetkeysen.

¹³⁶Közlirimdin yash ériqliri aqidu, Chünki insanlar Tewrat-qanununggha boysunmaydu.

¹³⁷|צ| (Tsade) Heqqaniydursen, i Perwerdigar; Hökümliring toghridur.

¹³⁸Sen agah-guwahliqliringni heqqaniyliqta buyrughan; Ular tolimu ishenchliktur!

¹³⁹Otluq muhebbitim özümni yoqitidu, Chünki méni xar qilghuchilar sözliringge pisent qilmaydu.

¹⁴⁰Sözüng toluq sinap ispatlan'ghandur; Shunga qulung uni söyidu.

¹⁴¹Men tériqtekturmen, kemsitilgenmen, Biraq körsetmiliringni untumaymen.

¹⁴²Séning heqqaniyiting ebediy bir heqqaniyettur, Tewrat-qanunung heqiqettur.

¹⁴³Péshkellik we azab manga chirmishiwaldi; Biraq emrliring méning xursenliklirimdur.

¹⁴⁴Séning agah-guwahliqliringning heqqaniyliqi ebediydur; Yashighin dep, méni yorutqaysen.

¹⁴⁵|ק| (Kof) Men pütün qelbim bilen Sanga nida qildim, i Perwerdigar; Manga jawab bergeysen; Men belgilimiliringni tutimen.

¹⁴⁶Men Sanga nida qilimen; Méni qutquzghaysen; agah-guwahliqliringgha egishimen.

¹⁴⁷Men tang atmay ornumdin turup peryad kötürimen; Söz-kalaminggha ümid baghlidim.

¹⁴⁸Wediliring üstide séghinip oylinish üchün, Tündiki jésekler almashmay turup közüm échilidu.

¹⁴⁹Özgermes muhebbiting boyiche awazimni anglighaysen; I Perwerdigar, hökümliring boyiche méni janlandurghaysen.

¹⁵⁰Qebih niyetke egeshkenler manga yéqinlashti, Ular Tewrat-qanunungdin yiraqtur.

¹⁵¹I Perwerdigar, Sen manga yéqin turisen; Barliq emrliring heqiqettur.

¹⁵²Uzundin béri agah-guwahliqliringdin ögendimki, Ularni menggüge inawetlik qilghansen.

¹⁵³|ר| (Resh) Méning xar bolghinimni körgeysen, méni qutuldurghaysen; Chünki Tewrat-qanunungni untumidim.

¹⁵⁴Méning dewayimni sorighaysen, hemjemet bolup méni qutquzghaysen; Wedeng boyiche méni janlandurghaysen.

¹⁵⁵Nijatliq rezillerdin yiraqtur; Chünki ular belgilimiliringni izdimeydu.

¹⁵⁶Rehimdilliqliring köptur, i Perwerdigar; Hökümliring boyiche méni janlandurghaysen.

¹⁵⁷Manga ziyankeshlik qilghuchilar hem méni xar qilghuchilar köptur; Biraq agah-guwahliqliringdin héch chetnimidim.

¹⁵⁸Men asiyliq qilghuchilargha qarap yirgendim, Chünki ular sözüngni tutmaydu.

¹⁵⁹Séning körsetmiliringni shunche söygenlikimni körgeysen; Özgermes muhebbiting boyiche méni janlandurghaysen, i Perwerdigar.

¹⁶⁰Söz-kalamingni mujessemligende andin heqiqet bolur; Séning herbir adil hökümüng ebediydur.

¹⁶¹|ש| (Shiyn) Emirler bikardin-bikar manga ziyankeshlik qilidu; Biraq yürikim kalaming aldidila titreydu.

¹⁶²Birsi zor olja tapqandek, Wedengdin xushallinimen.

¹⁶³Saxtiliqtin nepretlinip yirginimen; Söyginim Tewrat-qanunungdur.

¹⁶⁴Heqqaniy hökümliring tüpeylidin, Künde yette qétim Séni medhiyileymen.

¹⁶⁵Tewratingni söygenlerning zor xatirjemliki bar; Héch nerse ularni putliyalmas.

¹⁶⁶Men nijatliqinggha ümid baghlap küttüm, i Perwerdigar, Emrliringge emel qilip.

¹⁶⁷Jénim agah-guwahliqliringgha egishidu, Ularni intayin söyimen.

¹⁶⁸Barliq yollirim aldingda bolghach, Körsetmiliring hem agah-guwahliqliringgha egishimen.

¹⁶⁹|ח| (Taw) Méning peryadim aldinggha yéqin kelsun, i Perwerdigar; Kalaming boyiche méni yorutqaysen.

¹⁷⁰Yélinishim aldinggha kelsun; Wedeng boyiche méni qutuldurghaysen.

¹⁷¹Manga belgilimiliringni ögitishing üchün, Lewlirimdin medhiyiler urghup chiqidu.

¹⁷²Tilim sözüngni küylep naxsha éytidu, Chünki emrliringning hemmisi heqqaniydur.

¹⁷³Qolung manga yardemge teyyar bolsun; Chünki men körsetmiliringni talliwaldim.

¹⁷⁴Men nijatliqinggha telmürüp teshna bolup keldim, i Perwerdigar; Séning Tewrating méning xursenlikimdur.

¹⁷⁵Jénim yashisun, u Séni medhiyileydu, Séning hökümliring manga yardem qilsun.